Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.iij.

1

ENd dem Enghel der Ghemeynte te Sardis, schrijf: Dit zegt die de [zeuen] gheęsten Godes heeft, end de zeuen sterren. Ick weet dyne wercken: want du hebst den naem dat du leefst, end bist dood.

2

Zy wacker, end stærck dat ander dat stæruen will: want ick heb dyne wercken niet volkommen beuonden voor Gode.

3

Zo ghedenck nu hoe du entfanghen end ghehoort hebst, end bewaer het, end doe ghemoedbetering. Zo du nu niet wacker bist, zal ick ouer dy kommen ^* als eęn dief, end du zalt niet weten welcker stonde ick ouer dy kommen zal.

* Matt.24.d.44 1.Thes.5.a.2 2.Petr.3.c.10 Apoc.16.c.15

4

Du hebst weynighe namen oock in Sardis, die hœre kleęders niet bezudelt

[p. 415v]

hebben, end zy zullen mit my wandelen in witten [kleęderen], want zy zyn’s wærd.

5

Wie ouerwinnt, die zal mit witten kleęderen bekleędt werden: end ick zal zynen naem gheęnßinns wtwisschen ^* wt dem bouck des leuens, ^‡ end zal zynen naem belijden voor mynem Uader end voor zynen Enghelen. ⁺

* Exo.32.g.32 Psal.69.f.29 Phili.4.a.3 Apoc.20.d.2 end .21.g.27

‡ Mat.10.d.32 Luc.12.b.8

+ B

6

Wie ooren heeft, die hoore wat de Gheęst den Ghemeynten zegt.

7

End dem Enghel der Ghemeynte te Philadelphia schrijf: Dit zegt de Heylighe, de Waerachtighe, ^* die dar heeft den slœtel Dauids, die dar opdoet, end niemand toesluytt: die dar toesluytt, end niemand opdoet:

* Iob.12.c.14 Esa.22.f.22 Apoc.1.d.18

8

Ick weet dyne wercken: zie, ick heb dy voorghegheuen eęn opene dœr, end niemand kann ze toesluyten: want du hebst eęn kleyne macht, end hebst mijn word bewaert, end hebst mynen naem niet gheloochent.

9

Zie, ick gheue wt Satans Synagoghe die dar zegghen, zy zijn Iœden, end zijn’t niet, mer lieghen: zie, ick zal ze maken dat zy kommen, end anbidden voor dynen voeten, end dat zy kennen dat ick dy ghelieft heb.

10

Dewijl du hebst bewaert het word myner gheduld, zo zal ick dy oock bewaren voor der vre der verzoucking, ⁺ die dar toekomstigh is ouer den ganschen ærdbodem, te verzoucken die dar wonen op ærden.

+ C

11

Zie, ick komme haestlick: hold wat du

[p. 416r]

hebst, op dat niemand dijn kroon neme.

12

Wie ouerwinnt, den zal ick maken tot eęnem pilaer in dem tempel mijns Godes, end hy zal gheęnßinns meęr hénwt gaen: end ick zal op hem schrijuen den naem mijns Godes, end ^* den naem des nieuwen Hierusalems, der stad mijns Godes, die van dem hemel hæraf daalt van mynem Gode, end mynen naem den nieuwen.

* Apoc.21.a.2

13

Wie ooren heeft, die hoore wat de Gheęst den Ghemeynten zegt.

14

End dem Enghel der Ghemeynte te Laodicea schrijf: Dit zegt de Amen, de gheloofßame end waerachtighe tuygh, ^* het beghinn des schepsels Godes:

* Colos.1.b.15

15

Ick weet dyne wercken, dat du noch kold noch wærm bist: och of du kold of wærm warest.

16

⁺Dewijl du auer lauw bist, end noch kold noch wærm, zal ick dy wtspuywen wt mynem monde.

+ D

17

Want du zegst: Ick bin rijck, end bin verrijckt, end ick behouue niets: end du weetst niet dat du bist ellendigh end iammerlick, end arm, end blind, end bloot.

18

Ick rade dy dat du gold van my koopest dat vam vuere gloedigh is, dat du rijck werdest: ^* end witte kleęders, dat du bekleędt werdest, end niet openbaert werde ⁺ de schande dyner blootheyt: end bezalf dyne ooghen mit ooghzalue, dat du zien moghest.

* 2.Cor.5.a.3 Apoc.16.c.15

+ of, dijn schandlicke. etc.

19

^* Alle die ick lief heb, die straffe end tuchtighe ick: zo zy nu ijuerigh, end doe ghemoedbetering.

* Iob.5.c.17 Pro.3.b.10 Heb.12.b.6

[p. 416v]

20

Zie, ick sta voor der dœre, end kloppe: Zo iemand mijn stemm hooren zal, end de dœr opdoen, tot dem zal ick hénin gaen, end het auendmael mit hem holden, end hy mit my.

21

Wie ouerwinnt, ^* dem zal ick gheuen mit my op mynem throon te zitten, ghelijck als oock ick ouerwonnen heb, end bin ghezeten mit mynem Uader op zynem throon.

* Sap.3.b.8 Matt.19.d.28 1.Cor.6.a.2

22

Wie ooren heeft, die hoore wat de Gheęst den Ghemeynten zegt.