Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.v.

[p. 398r]

1

DE Olderlinghen die onder v zijn, vermane ick de Medeolderlingk end ghetuygh des lijdens Christi, end medeghenoot der heęrlicheyt welcke ontdeckt zal werden:

2

^* Weydet het kuddeken Christi ⁺ dat onder v is, end hebbet opzicht daerop, niet wt bedwanghe, mer ghewillighlick: niet om vuyl ghewinns willen, mer wt gheneyghdem ghemoede:

* Act.20.f.28

+ Of, zo veel als in v is,

3

^* Niet als die ouer het toeuertrauwde volck heęrschappy drijuen, ^‡ mer als die dar gheworden zijn voorbeelden des kuddekens:

* 2 cor.1.d.24

‡ 1.tim.4.c.12 Tit.2.b.7

4

⁺End wanneęr de ^* Ouerhærder verschijnen zal, ^‡ zullet ghy de onuerwælcklicke kroon der heęrlicheyt behalen.

+ B

* Esa.40.c.11 Eze.34.f.23 Ioan.10.b.11 Hebr.13.d.20

‡ 1.cor.9.d.25 2.Tim.4.b.8 Iacob.1.b.12

5

Deßghelijcken ghy ionghers, zijt onderdanigh den Olderlinghen. ^* Ghy auer alle, zijt malckanderen onderdanigh, end verknoopet [in v] de ootmoedigheyt: ^‡ want God wederstaet den houærdighen: auer den nederighen gheeft hy ghenade.

* rom.12.c.10 Philip.2.a.3

‡ Prou.3.d.34 Iacob.4.b.6

6

^* Zo vernederet v nu onder de krachtighe hand Godes, op dat hy v verhooghe t’zyner tijd.

* iob 22 d.29 Pro.29.d.23 Matt.23.a.11 Luc.14.c.11 Iacob 4.c.10

7

^+‡ Alle uwe zorghfuldigheyt wærpet op hem: ^* want hy zorght vœr v.

+ C

‡ Psa.55.d.23 Mat.6.c.25 1.Timo.6.b.8

* Sap.12.b.13

8

Zijt nuchter, waket: ^‡ want uwe wederparty de duuel gaet ommhær als eęn briesschende leęuw, end zouckt welcken hy verslinde:

‡ Iob.1.b.7 Luc.22.d.31

9

^* Dem wederstaet, vast im ghelooue: end wetet dat uwe broeders die in der wæreld zijn, het zelue lijden volluoeren.

* Iacob.4.b.7

[p. 398v]

10

De God auer aller ghenaden die ons gheropen heeft tot zyner eęwigher heęrlicheyt in Christo Iesu, ^* die will v, die ghy eęn kleyne tijd gheleden hebbet, ⁺ volmaken, beuestighen, bekrachtighen [end] gronduestighen.

* Hebr.10.d.37 1.Petr.1.a.6

+ D

11

Dem zeluen zy prijß end gheweld van eęwigheyden tot eęwigheyden. Amen.

12

Door uwen trauwen broeder Siluanum, als ick holde, heb ick v eęn weynigh gheschreuen, te vermanen end te betuyghen dat dit zy de rechte ghenade Godes daer ghy inn staet.

13

U groett de medeuerkorene [Ghemeynte] die in Babylonia is, end Marcus mijn zoon.

14

^* Groetet malckanderen mit eęnem kuß der liefde. Urede zy v allen die dar zijt in Christo Iesu. Amen.

* Rom.16.c.15 1.Cor.16.d.20 2.Cor.13.d.12 1.thes.5.d.26