Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.v.

1

⁺ VUel an nu ghy rijcken, weęnet end huylet ouer uwen ellendigheyden, die ouer v kommen zullen.

+ Pro.11.d.28 Amos.6.a.1 Luc.6.d.24 1.Tim.6.b.9

2

Uwe rijckdomm is verrott, end uwe kleęders zijn mottenaaß gheworden.

3

Uwe gold end ziluer is verroest, end hœre roest zal v ter tuyghniß zijn, end zal uwe vleęsch vereeten als eęn vuer. ^* Ghy hebbet eęnen schatt opghelegt in den lesten daghen.

* Rom.2.a.5

4

Zie, ^* de loon der werckluyden die uwe landen ghemayt hebben, welcke van v verkortt is, roupt: end.het roupen der mayeren is kommen voor de ooren des Heęren Sabaoth.

* Leui.19.c.13 Deu.24.c.14 Iob.4.c.15

5

^* Ghy hebbet in wellust gheleeft op ærden, end zijt dærtel gheweęßt: ghy hebbet uwe herten gheuoedt als op den slaghtdagh.

* Iob.21.b.13 Luc.16.e.19 f.25

[p. 391v]

6

⁺Ghy hebbet den gherechtighen verordeęlt end ghedoodt, [end] hy wederstaet v niet.

+ B

7

Zo zijt nu langmoedigh broeders, tot op de toekomst des Heęren. Zie, de landbauwer wacht op de kostlicke vrucht der ærden, end wacht daerop langmoedighlick tot dat hy entfanghe den morghenreghen end auendreghen.

8

Zo zijt oock ghy langmoedigh, [end] beuestighet uwe herten: want de toekomst des Heęren is naby.

9

Uerzuchtet niet teghen malckanderen, broeders, op dat ghy niet verdommt werdet. Zie, de richter staet voor der dœre.

10

Nemet, myne broeders, tot eęnem exempel des lijdens end der langmoedigheyt, de Propheten, die dar ghesproken hebben in dem name des Heęren.

11

⁺Zie, ^* wy holden vœr gheluckzaligh die dar verdraghen. ^‡ De gheduldigheyt Iob hebbet ghy ghehoort, end het ende des Heęren hebbet ghy ghezien, ^* dat de Heęr zeęr barmhertigh is end medelijdigh.

+ C

* Matt.5.b.11

‡ Iob.1.d.21 22.

* Nu.14.c.28 Psal.103.b.8

12

Uoor allen dinghen auer myne broeders, ^* zweeret niet, noch by dem hemel, noch by der ærden, noch by eęnighem anderen eęde: uwe Ia auer, zy Ia: end [uwe] Neęn, Neęn: op dat ghy niet in beueynßtheyt vallet.

* Matt.5.e.34 2.Cor.1.d.18

13

Is iemand in lijden onder v? die bidde. Is iemand goedes moeds? die zinghe psalmen.

14

Is iemand kranck onder v? die ent-

[p. 392r]

biede de Olderlinghen der Ghemeynte, end late ze ouer hem bidden, ^* end hem zaluen mit oly in dem name des Heęren.

* Marc.6.b.14

15

End het ghebed des ghelooues zal den krancken helpen, end de Heęre zal en oprichten: ⁺ end zo hy heeft zonden ghedaen, die zullen hem quijtghelaten werden.

+ D

16

Belijdet malckanderen de mißuallen, end biddet vœr malckanderen, op dat ghy ghezond werdet. Eęnes gherechtighen ghebed vermagh veel, wanneęr het krachtigh is.

17

^* Helias was eęn mensch mit ons ghelijcken beweghinghen onderworpen, end bad mit ghebede dat het niet reghenen zolde: end het reghende niet op ærden in dryen iaren end zeß maanden.

* 1.Reg.17.a.1 Luc.4.d.25

18

^* End hy bad andermael, end de hemel gaf reghen, end de ærde bracht hœr vrucht voord.

* 1.reg.18.g.45

19

Broeders, ^* zo iemand onder v dwaelde van der waerheyt, end iemand bekeęre en,

* Matt.18.b.15

20

Die wete, dat die den zondaer bekeęrt zal hebben van der dwalinghe zijns weghs, eęn ziel helpen zal van dem doode, end zal bedecken de veelheyt der zonden.