Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.iiij.

1

VAn waer kommt strijd end gheuecht onder v? is het niet hierwt, wt uwen wellusten die dar strijden in uwen lidmaten?

2

Ghy zijt begærigh, end hebbet’t niet: Ghy ⁺ benijdet end ijueret, end ghy konnet’t niet verwæruen. Gy vechtet end strijdet, end hebbet’t niet, daerom dat gy’t niet

+ Of doodet

[p. 390v]

begæret.

3

Ghy begæret, end entfanghet niet, ^* daerom dat ghy qualick begæret, op dat ghy’t in uwen wellusten verteeret.

* Matt.20.c.22 Rom.8.e.26

4

Echtbrekers end echtbrekersche, wetet ghy niet dat der wæreld vriendschap, Godes viandschap is? ^* Zo wie nu der wæreld vriend zijn wil, ⁺ die werdt Godes viand ghestelt.

* Ioan.15.c.19 Gala.1.b.10 1.Ioan.2.b.15

+ B

5

Of meynet ghy, de Schrift zegghe ijdelick. ^* De Gheęst die zijn woonstede in ons ghemaeckt heeft, heeft hy eęn verlanghen tot nijd?

* Gene.6.b. end .8.d

6

Hy gheeft auer meęrder ghenade. Daerom zegt hy: ^* God wederstaet den houærdighen, den nederighen auer gheeft hy ghenade.

* Prou.3.d.34 1.Petri.5.b.5

7

Zo zijt nu Gode onderdanigh, ^* wederstaet dem duuel, end hy zal van v vliehen.

* Ephe.4.f.27 1.Petr.5.c.9

8

Naket v tot Gode, end hy zal zick tot v naken. Reynighet [uwe] handen ghy zondaers, end kuysschet [uwe] herten, ghy dobbelmoedighe.

9

^+* Zijt ellendigh, end trœret end schreyet: uwe lachen verkeęre zick in weęnen, end de vrœghde in droufniß.

+ C

* Luc.6.d.25

10

^* Uernederet v voor dem Heęre, end hy zal v verhooghen.

* Iob.22.d.29. Pro.29.d.23 Matt.23.a.11 Luc.14.c.11 end .18.c.14 1.Petr.5.b.5

11

Achterredet niet teghen malckanderen, broeders: wie zynem broeder achterreedt, end wie zynen broeder richt, die achterreedt der Wet, end die richt de Wet. Richtest du auer de Wet, zo bist du gheęn dader der Wet, mer eęn richter.

12

Dar is eęn Wetsteller die kann zalighmaken end verdæruen: ^* Wie bist du, die

* Rom.14.a.4

[p. 391r]

du eęnen anderen richtest?

13

Wel an die ghy nu zegghet: ^* Huyden end morghen ⁺ latet ons gaen in die stad, ⁺ end daer eęn iaar ouerbringhen, end koophandel end ghewinn doen:

* Luc.12.c.18

+ anders. zullen wy gaen. etc.

+ D

14

(Die ghy niet wetet wat van dem morghen zijn zal. ^* Want wat is uwe leuen? Eęn damp is het die eęn kleyne tijd verschijnt, daerna auer verzwindt hy.)

* Esa.40.b 6 Eccli.14.c.17 1.Corin.7.f.31 Iaco.1.b.10 1.Pet.1.d.24 1.Ioan.2.c.17

15

Waervœr ghy zegghen zoldet: ^‡ Zo de Heęre will, end wy leuen, zo latet ons dit of dat doen.

‡ Act.18.f.21 1.Cor.4.d.19 Hebr.6.a.4

16

Nu auer rommet ghy v in uwen hooghmoedigheyden: alle zulckerley romm is booß.

17

^* Daerom die dar weet goed te doen, end niet doet, dem is het zonde.

* luc.12.f.47