Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.iij.

[p. 389v]

1

MYne broeders, ^* niet eęn ieghelick werde leęrmeęster, end wetet ^‡ dat wy deß te meęr gherichtes entfanghen zullen.

* Matt.23.a.6

‡ Ezech 3.d.18 end .33.b.6 Hebr.13.c.17

2

Want wy mißtreden alle menighfuldighlick. ^* Wie in gheęnem worde mißtreedt, die is eęn volkommen mann, end kann oock het gansche lijf im toome holden.

* Ecc.14.a.1 end .19.c.16 end .25.b.11

3

Zie, den pærden doen wy toomen in de monden, op dat zy ons ghehoorzaem zijn, end wenden hœre gansche lijf omm.

4

Zie oock de schepen, hoewel zy zo groot zijn, end van harden winden ghedreuen werden, werden doch omm ghestuert mit eęnem zeęr kleynen stuerroere, zo waer de begærte des stuerers will.

5

^+* Alzo is oock de tong eęn kleyn lidmaat, end berommt zick grooter dinghen: zie, eęn kleyn vuer hoe groot eęnen bosch steeckt het an.

+ B

* Eccl.28.b.13

6

End de tong is eęn vuer, [ia] de wæreld der ongherechtigheyt. Alzo werdt de tong ghestelt onder onzen lidmaten, welcke beuleckt het gansche lijf, end entsteeckt den loop ⁺ des leuens, end werdt entsteken van der helle.

+ Gr. der gheboorten.

7

Want alle aard der ghedierten end der gheuoghelten end der kruypenden end der zeęschen dieren werdt ghetemmt, end is ghetemmt van der menschlicker natuere:

8

Auer de tong kann gheęn mensch temmen [als die dar is] eęn onbedwinglick quaad, voll doodlicken verghifts.

9

⁺Door ze zeghenen wy God end den Uader, end door ze veruloucken wy de menschen ^* die na der ghelijckenisse Go-

+ C

* Genes.1.d.27 Sap.2.d.23

[p. 390r]

des ghemaeckt zijn.

10

Wt eęnem monde gaet zeghening, end vlouck. Dit behoort niet, myne broeders, alzo toe te gaen.

11

Wærpt doch eęn springbornn wt eęnem gate zuet end bitter?

12

Kann oock myne broeders, eęn vijghboom olijuen, of eęn wijnstock vijghen voordbringhen? Alzo kann gheęn springbornn ghezolten end zuet water gheuen.

13

Wie is wijß end verstandigh onder v? ^* die bewijze wt dem goeden wandel zyne wercken in zachtmoedigher wijßheyt

* Ephe.5.b.8.9

14

^+* Hebbet ghy auer bitteren ijuer end twist in uwen herten, zo berommet v niet, end lieghet niet teghen de waerheyt

+ D

* Rom.13.d.14

15

^* Dit is niet de wijßheyt die van bouen hæra kommt, mer ærdisch, vernuftigh [end] duuelsch.

* 1.Cor.2.b.6

16

^* Want waer ijuer end twist is, daer is onghestadigheyt end alle booze handel

* 1.Cor.3.a.3 Gal 5.c.19

17

De wijßheyt auer van bouen hær, is eęrstlick reyn, daerna vreedßaem, redelick, ghezegghelick, voll barmhertigheyt end goeder vruchten, onpartyegh end onbeueynßt.

18

Eęn vrucht auer der gherechtigheyt werdt ghezayt in vreden den, die dar vrede maken.