Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.ij.

1

MYne broeders, hebbet niet het ghelooue in Iesum Christum onzen Heęre der heęrlicheyt, ^* mit annemen des wterlicken anziens.

* Leuit.19.c.15 Deut.1.c.17 end .16.d.19 Pro.24.c.23 Eccli.42.a.1

2

Want zo in uwe Synagoogh quame eęn mann mit golde gheuingheringt in cierlicker kleędinghe, dar quame auer oock eęn arme in vuyler kleędinghe,

3

End ghy ziet op den, die de cierlicke kleęding draeght, end zegghet tot hem, Zit du hier eęrlick: end zegghet tot dem armen, Sta du aldaer: of, zit hier onder mijn voetbanck:

4

⁺ Zijt ghy oock niet verordeęlt in v zeluen end zijt richters gheworden boozer ghedachtenissen?

+ of, End ghy zijt niet. etc

5

^* Hooret toe myne gheliefde broeders, heeft niet God verkoren de armen dezer wæreld, die am ghelooue rijck zijn, end ærfghenamen des kœningkrijcks, welck hy toeghezegt heeft den, die hem lief hebben?

* Ioan.7.g.48 1.Cor.1.d.24

6

⁺Ghy auer hebbet den armen onteęrt. Ouerweldighen v niet de rijcken, end de zelue trecken zy v niet voor de richtstoulen?

+ B

[p. 388v]

7

End de zelue, lasteren zy niet den goeden naem die ouer v angheropen is?

8

Zo ghy nu de kœninglicke Wet vollendt na der Schrift, [naemlick] ^* Du zalt dynen naesten lief hebben als dy zeluen: zo doet ghy wel.

* Leui.19.d.18 Mat.22.d.38 Marc.12.c.31 Rom.13.c.9 Gal.5.c.14 Ephe.5.a.2 1.Thes.4.b.9

9

Zo ghy auer het wterlick anzien annemet, zo doet ghy zonde, end werdet ghestraft van der Wet, als ouertreders.

10

^‡ Want zo wie de gansche Wet gheholden zal hebben, end mißtreedt an eęnem, die is an allen schuldigh gheworden.

‡ Eze.18.f.28 Matt 5.c.19.

11

Want die dar ghezegt heeft, ^* Du zalt niet echtbreken: die heeft oock ghezegt, Du zalt niet dooden. Zo du nu niet echtbrekest, doodest auer, zo bist du eęn ouertreder der Wet gheworden.

* exo.20.c.14 Matt.5.d.27

12

Alzo spreket, end alzo doet, als die dar zullet door de Wet der vrijheyt ghericht werden.

13

^* Want dar zal eęn onbarmhertigh ghericht ouer den gaen, die gheęn barmhertigheyt ghedaen zal hebben. ⁺ End de barmhertigheyt rommt zick teghen het gherichte.

* Matt.6.b.15 end .18.d.35 Marc.11.d.25 Luc.16.f 25

+ C

14

^* Wat helpt het myne broeders, dat iemand zegghe, hy hebbe ghelooue, end hebbe gheęne wercken? kann en doch het ghelooue zaligh maken?

* Matt.7.d.26 Iacob.1.d.23

15

^* Zo auer eęn broeder of zuster naackt ware, end kommer hadden des daghlickschen voedsels,

* Luc.3.c.11 1.Ioan.3.c.17

16

End iemand onder v zeyde tot hen: Gaet hén mit vreden, wærmet end zadighet v, end gauet hen auer niet wat des lijfs nooddurft is, wat hulpe het ze?

[p. 389r]

17

Alzo oock het ghelooue, wanneęr het gheęne wercken heeft, zo is het dood an zick zeluen.

18

Auer iemad zal zegghen, Du hebst ghelooue, end ick heb wercken: bewijß my dijn ghelooue ⁺ wt dynen wercken, end ick zal dy bewijzen mijn ghelooue wt mynen wercken.

+ anders. zonder dyne. etc.

19

Du gheloofst dat dar eęn God is? du doest wel. ^* De duuels gheloouen’t oock end beuen. ⁺

* Marc.1.c.24

+ D

20

Wilt du auer weten, o ijdel mensch dat het ghelooue zonder de wercken dood zy?

21

Is niet Abraham onze vader door wercken gherechtuærdight ^* doe hy zynen zoon Isaac op den altaer offerde?

* Gen.22.b.10

22

Ziest du niet dat het ghelooue medeghewracht heeft an zynen wercken, end door de wercken het ghelooue volkommen gheworden is?

23

End de Schrift is veruult, die dar zegt, ^* Abraham heeft Gode ghelooft, end het is hem ter gherechtigheyt toegerekent, end is eęn vriend Godes geheeten.

* Gen.15.a.6 Rom.4.a.3 Gal.3.a.6

24

Ziet ghy nu dat eęn mensch door wercken gherechtuærdight werdt, end niet door ghelooue alleęnlick?

25

Deßghelijcken auer oock de hoere ^* Raab, is zy niet door wercken gherechtuærdight doe zy de boden opnamm, end liet ze eęnen anderen wegh hénwt?

* Iosue.2.a.1 end .6.c.23 Hebr.11.f.31

26

Want ghelijckerwijß het lijf zonder gheęst dood is, alzo is oock het ghelooue zonder de wercken dood.