Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.x.

1

⁺ VUant de Wet die dar eęn schaduwe had der toekomstighen goederen, niet het [wezentlick] beeld der dinghen, kann nymmermeęr die dar héntoe gaen, mit den zeluen offeren die zy alle iaar stadelick opofferen, volkommen maken.

+ Deut.16.c.14 Colos.2.c.17 Hebr.8.b.5

2

Anders, hadden zy niet opgheholden gheoffert te werden? daerom dat die, die an den Godsdienst zijn, gheęn consciency meęr hadden van zonden, wanneęr zy eęnmael ghereynight waren.

3

Mer dar gheschiedt nu door de zelue [offers] eęn ghehœghniß der zonden alle iaar.

4

^* Want het is onmoghelick dat stieren end bocken bloed zonden zolde weghnemen.

* Leui.16.c.14 Num.19.a.4 Hebre.9.d.13

5

Daerom als hy in de wæreld inkommt, zegt hy: ^* Slaghtoffer end offer hebst du niet ghewolt, eęn lijf auer hebst du my toebereydt.

* Psal.40.b.7 Esa.1.c.11 Iere.6.e.20 Amos.5.f.21

6

⁺An brandofferen end zondofferen hebst du gheęn welgheuallen ghehadt.

+ B

7

Alsdan zeyde ick: Zie, ick komme (im anuangk des boucks is van my gheschreuen) dat ick doe dynen will die du God bist.

8

Te voren als hy zeyde, Slaghtoffer end offer end brandoffer end zondoffer (welcke na der Wet gheoffert werden,) hebst du niet ghewolt, zy hebben dy oock niet welgheuallen.

9

Alsdan zeyde hy, Zie, ick komme te doen

[p. 379v]

dynen will die du God bist: hy neemt het eęrste wegh, op dat hy het ander vast zette.

10

In welckem wille wy gheheylight zijn ^* door de opoffering deß lijfs Christi eęnmael [gheschiedt].

* Hebr.9.c.12

11

End eęn ieghelick Priester stond wel dat hy alle daghe Godes dienst pleeghde, end menighmael eęnerley slaghtoffers opofferde, ⁺ welcke de zonden nymmermeęr konnen weghnemen:

+ C

12

Deze auer doe hy heeft eęnen slaghtoffer vœr de zonden opgheoffert, ^* is stadelick ghezeten ter rechter hand Godes:

* Psal.110.a.1 Act.2.e.32 1.Cor.15.c.25 Ephes.1.d.20 Coloss.3.a.1 Hebr.1.d.13

13

End verwacht deß dat noch ouerigh is, tot dat zyne vianden tot eęner onderuoetbancke zyner voeten ghelegt werden.

14

Want mit eęner opofferinghe heeft hy eęwighlick volkommen ghemaeckt die gheheylight werden.

15

Het betuyght ons auer deß oock de heylighe Gheest: nademmael hy nu te voren voorzegt hadde,

16

^* Dit is het Testament dat ick hen maken zal na den zeluen daghen, zegt de Heęr, ick zal myne Wetten in hœre herten gheuen, end in hœre ghemoeden zal ick ze schrijuen:

* Ierem.31.f.31 32.33.34 Rom.11.d.27 Hebr.8.c.8

17

End hœrer zonden end hœrer Wetbrekeryen zal ick niet meęr ghedencken.

18

⁺Waer auer der zeluen vergheuing is daer is niet meęr opoffering vœr de zonde.

+ D

19

Zo wy dan nu, broeders, vrymoedigheyt hebben ^* tot dem inganghe in de

* Ioan.10.b.9 end .14.a.6 Rom.5.a.2 Ephes.2.d.17 end .3.c.12

[p. 380r]

Heylighe, in dem bloede Iesu,

20

Door eęnen wegh welcken hy ons versch end leuendigh anghericht heeft, door den voorhangk, dat is, door zijn vleęsch:

21

End [hebben oock] eęnen grooten Priester ouer het huyß Godes,

22

Zo latet ons héntoe gaen mit waerachtighem herten, in ghewissem ghelooue, door besprenghing afghewischt in [onzen] herten van boozer consciency,

23

End ghewasschen an dem lijue ^* mit reynem water, latet ons vast holden an der belijdinghe der hope, die niet wanckelbaer zy: (Want hy is trauw die ze toeghezegt heeft)

* Ezech.36.e.25

24

End latet ons malckanderen waernemen mit verwecken ter liefden end goeden wercken: ⁺

+ E

25

End niet verlaten onze te hoopkomming, als zommighe eęn wijze hebben, mer vermanen [malckanderen]: end dat zo veel meęr, zo veel ghy ziet dat zick de dagh hærby maeckt.

26

^* Want zo wy moetwillighlick zondighen, na dem wy de kennenschap der waerheyt entfanghen hebben, zo is ons gheęn offer meęr voor handen vœr de zonden,

* Num.15.c.30 Matt.12.d.45 Hebr.6.a.5 2.Pet.2.d.20

27

Mer eęn schricklick verwachten des gherichtes, end vuerijuer, die de wederstreuers verteeren zal.

28

Zo iemand de Wet Mosi verwærpt, die stærft zonder erbarminghen ^* door tweę of drij tuyghen:

* num.35.d.30 Deut.17.b.6 end .19.d.15 Mat.18.c.16 Ioan.8.b.17 2.Cor.13.a.1

29

Hoe veel ærgher straffe meynet ghy, zal die wærdigh zijn, die den Zoon Godes

[p. 380v]

vertreden, ⁺ end het bloed des Testaments waerdoor hy gheheylight is, vœr ghemeyn gheholden, end den Gheęst der ghenaden besmadight zal hebben?

+ F

30

Want wy weten den, die ghezegt heeft: ^* De wrake is mijn, ick zal’t verghelden, spreeckt de Heęr. End wederom: ^‡ De Heęr zal zijn volck richten.

* Deut.32.e.35 Rom.12.d.19 Eccli.28.a.1

‡ Deut.32.e.36

31

Schricklick is het in de handen des leuendighen Godes vallen.

32

Ghedencket auer an de vorighe daghen, in welcken ghy verlicht, verdraghen hebbet eęnen grooten kamp des lijdens:

33

End zijt ia eęnsdeęls door smadigheyden end verdruckinghen tot eęnem schauwhandel voorghestelt: eęnsdeęls auer medeghenooten gheworden der, die alzulcken wandel voerden.

34

Want ghy hebbet ^* mit mynen banden medelijden ghehadt, end de afroouing uwer hauen mit vrœghden anghenomen, ⁺ als die ghy wistet in v zeluen ^* dat ghy eęn beter end blijuende haue in hemelen hebbet.

* Act.21.f.33

+ G

* Matt.5.b.12

35

Daerom wærpet niet van v uwe vrijmoedigheyt, welcke eęn groote loonuerghelding heeft.

36

^* Gheduld auer is v noodigh, op dat ghy, na dem ghy den wille Godes ghedaen zullet hebben, de toezegghing verwæruet.

* Leui.21.d.17

37

^* Want noch ouer eęn zeęr kleyne tijd [end] die dar toekomstigh is, zal kommen, end zal niet vertouuen.

* Abacuc.2.a.3 1.Pet.1.a.6 end .5.c.10

38

^‡ De gherechtighe auer zal wt dem

‡ Abacu.2.a.4 Rom.1.b.17 Gal.3.b.11 Ioan.3.d.36

[p. 381r]

ghelooue leuen: end zo hy zick entreckt, zo heeft mijn ziel gheęn welgheuallen an hem.

39

Wy auer zijn niet des entreckens ter verdærfnisse, mer des ghelooues ter verwæruinghe der ziele.