Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.vij.

1

⁺ DEze Melchisedec auer [was] eęn kœningk Salem, eęn Priester Godes des allerhooghsten, die Abraham enteghen ghingk, doe hy van dem slagh der kœninghen wederkeęrde, end zeghende en:

+ Gene.14.c.18

2

Welckem oock Abraham deęlde de tiende aller goederen: welcker eęrstlick beduydt werdt eęn kœningk der gherechtigheyt: daerna auer is hy oock eęn kœningk Salem, dat is, eęn kœningk des vredes,

[p. 375r]

3

Uaderlooß, moederlooß, gheslæchtlooß, end heeft noch beghinn der daghen, noch ende des leuens, hy is auer vergheleken dem Zone Godes, end blijft Priester in eęwigheyt.

4

Schauwet auer hoe groot deze gheweeßt zy, dem oock Abraham de Oueruader de tiende gaf van der buyte.

5

End die ia, die onder den zonen Leui het Priesterdomm entfanghen, ^* hebben eęn ghebod te vertienden het volck, dat is, hœre broeders, na der Wet, hoewel zy wt den lendenen Abrahe kommen zijn.

* Num.18.c.19 Deut.18.a.1 Ios.14.a.3.4 2.Par.31.b.4

6

Auer die na dem gheslæchte niet gherekent werdt onder hen, ^* namm de tiende van Abraham, end zeghende den, die de toezegghinghen had. ⁺

* Gen.14.d.20

+ B

7

Nu is het zonder eęnigh wederspreken alzo, dat dat mindere van dem beteren ghezeghent werdt.

8

End hier nemen de tienden ⁺ stærflicke menschen: daer auer [namm ze] die dar betuyght is dat hy leue.

+ of. die dar stæruen

9

End, op eener wijze van spreken, is oock Leui, die de tienden neemt, vertient door Abraham:

10

Want hy was noch in den lendenen zijns vaders, doe dem zeluen Melchisedec enteghen ghingk.

11

^* Was dar nu eęn volkommenheyt door het Leuitisch Priesterdomm, (want onder dem zeluen heeft het volck de Wet entfanghen:) wat was het meęr van nooden, dat dar eęn ander Priester opstonde na der ordeninghe Melchisedec, end die niet na der ordeninghe Aarons heeten zolde?

* Gal.2.d.22

[p. 375v]

12

Want wanneęr het Priesterdomm verzett werdt, zo is het noodigh dat oock der Wet verzetting gheschiehe.

13

Want van welckem zulcks ghezegt werdt, die is eęnes anderen gheslæchtes medeghenoot, wt welckem niemand des altaers ghepleeght heeft.

14

⁺Want het is openbaer ^* dat van Iuda wtghesproten zy onze Heęr: tot welckem gheslæchte Moses niets ghesproken heeft van dem Priesterdomm.

+ C

* Esa.11.a.1 Matt.1.a.3

15

End het is oock noch meęr openbaer, zo na der ghelijckenisse Melchisedec eęn ander Priester opstaet, die niet na der Wet des vleęschlicken ghebods ⁺ gheworden is, mer na der kracht des onuerscheydelicken leuens.

+ of. ghemaeckt

16

Want hy betuyght: ^* Du bist eęn Priester in eęwigheyt na der ordeninghe Melchisedec.

* Psal.110.a.4 Hebr.5.b.6

17

Want des vorighen ghebods vernieting gheschiedt om zyner zwackheyt end onnuttigheyt willen.

18

^* Want de Wet heeft niets volkommen ghemaeckt, ^‡ mer was eęn anuoering tot eęner beterer hope, door welcke wy tot Gode ghenaken.

* Act.13.f.38 Rom.3.d.28 end .8.a.3 Gal.2.c.16

‡ Rom.3.c.20 end .7.b.7

19

End alzo veel als ⁺ dit niet [gheschiedt is] zonder eędzweering, (want ghene zijn wel zonder eędzweęring Priesters gheworden:

+ versta. Ouerpriester te werden

20

Deze auer mit eęner eędzweeringhe door den, die tot hem zegt: ^* De Heęr heeft ghezworen, end het zal hem niet berauwen: Du bist eęn Priester in eęwigheyt na der ordeninge Melchisedec:)

* psal.110.a.4

[p. 376r]

21

⁺Zo veel is Iesus eęnes beteren ⁺ Testaments burgh gheworden.

+ D

+ Uerbonds

22

End ghener zijn wel vele die dar Priesters gheworden zijn, daeromm dat zy des doods haluen verhindert wurden te volblijuen:

23

Deze auer, daeromm dat hy in eęwigheyt blijft, heeft eęn onuerzettlick Priesterdomm.

24

Waerwt hy oock volkommelick zalighmaken kann die door hem tot Gode kommen, dewijl hy altijd leeft ^* vœr ze eęn vœrbidding te doen.

* 1.Ioan.2.a.1 1.Tim.2.b.5

25

Want zulcken eęnen Ouerpriester betaemde’t zick ons te hebben, [die dar ware] heyligh, onnoozel, onbeuleckt, afghezondert van den zondaren, end hoogher gheworden dan de hemels zijn:

26

Dem daghlicks niet van nooden ware, ghelijckerwijß den Ouerpriesteren, ^* eęrstmael vœr zyne eyghene zonden offer te doen, daerna vœr des volcks zonden. Want dit heeft hy eęnmael ghedaen, doe hy zick zeluen offerde.

* Leui.9.b.7 end .16.b.6 Hebr.5.a.3

27

Want de Wet zett menschen tot Ouerpriesteren, die dar zwackheyt hebben: het word auer der eędzweering, welcke ⁺ achter de Wet is, den Zoon in eęwigheyt volkommen.

+ versta. ten tijden Dauidis na dem anwijzen ps.110.a 4