Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

[p. 367v]

De zendbrief Pauli an Philemon.

1

PAulus eęn ghebonden Iesu Christi, end Timotheus de broeder, Philemoni dem gheliefden end onzem medearbeyder,

2

End Apphia der gheliefder, end Archippo onzem medestrijder, end der Ghemeynte die te dynem huyze is:

3

^* Ghenade zy v end vrede van Gode onzem Uader, end dem Heęre Iesu Christo.

* Rom.1.a.7 Gal.1.a.3 1.Petr.1.a.2

4

^‡ Ick dancke mynem Gode, end ghedencke dyner altijd in mynen ghebeden:

‡ Colos.1.a.3 1.Thes.1.a.2 2.Thes.1.a.3

5

Na dem ick hoore van dyner liefde end ghelooue, welcke du hebst an den Heęre Iesum, end teghen allen Heylighen:

6

Op dat de ghemeynschap dijns ghelooues krachtigh werde door kenniß alles goedes, welck in v is tot Christo Iesu

7

⁺Want wy hebben groote vrœghde end troost in dyner liefde, dat de Heylighen hertgrondlick verquickt zijn door dy, broeder.

+ B

8

Daerom hoewel ick groote vrijmoedigheyt heb in Christo, dy te ghebieden wat dy betaemt,

[p. 368r]

9

Zo vermane ick [nochtans] veel meęr om der liefde willen, die ick eęn zulcker bin, naemlick eęn olde Paulus, nu auer oock eęn ghebonden Iesu Christi.

10

Ick bidd dy vœr mynen zoon ^* Onesimo, ^‡ den ick gheboren heb in mynen banden:

* Colos.4.b.9

‡ 1.Cor.4.c.15 Gal.4.c.19 Iaco.4.c.18

11

Welcker voortijden dy onnutt, nu auer dy end my zeęr nutt,

12

⁺Welcken ick weder ghezonden heb: du auer neem hem (dat is, ⁺ myne innerlickheyden) an.

+ C

+ of. mijn hert

13

Welcken ick begærde by my te holden, op dat hy my in diener statt diende in den banden des Euangelij:

14

Auer zonder dijn bewilling heb ick niets willen doen: op dat dijn goed niet ware als wt bedwang, mer als ghewilligh.

15

Want misschien is hy hierom eęn tijd lang entweken, op dat du en eęwighlick kreghest:

16

Nu niet meęr als eęnen dienstknecht, mer meęr dan eęnen dienstknecht, als eęnen gheliefden broeder, zonderlick my: hoe veel meęr auer dy, oock na dem vleęsche end na dem Heęre?

17

Zo du nu my holdest vœr dynen medeghenoot, zo neem hem an als my.

18

⁺Zo hy auer dy ærghent in veronghelijckt heeft of schuldigh is, dat rekenn my toe.

+ D

19

Ick Paulus heb [dit] gheschreuen mit myner hand, Ick zal’t betalen: ick zwijghe, dat du oock dy zeluen daerbeneuen my schuldigh bist.

[p. 368v]

20

Ia broeder, gunne dat ick dyner gheniete in dem Heęre: verquick myne innerlickheyden in dem Heęre.

21

Ick heb wt toeuerzicht dyner ghehoorzaemheyt dy gheschreuen, dewijl ick wiste dat du oock meęr doen zalt dan ick zeg.

22

Daerbeneuen bereyd my oock herbergh: want ick hope dat ick door uwe ghebeden v gheschoncken zal werden.

23

Dy groeten ^* Epaphras mijn medegheuanghene in Christo Iesu. ^‡ Marcus, ^* Aristarchus, ^‡ Demas, [end] ^* Lucas myne medearbeyders.

* Coloss.1.a.7 end .4.c.12

‡ Colo.4.b.10 2 Tim.4.c.11

* Act.27.a.2 Colo.4.b.10

‡ Colo.4.d.14 2.tim.4.b.10

* Col.4.d.14 2.tim.4.c.11

24

De ghenade onzes Heęren Iesu Christi zy mit uwem gheęst. Amen.

An Philemon gheschreuen van Romen [ghezonden] door den huyßknecht Onesimum.