Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

[p. 364v]

De zendbrief Pauli an Titum.

Cap.j.

[p. 365r]

1

PAulus eęn dienstknecht Godes, auer eęn Apostel Iesu Christi, na dem ghelooue der wtuerkorenen Godes, end der kennisse der waerheit, welcke is na der Godßaligheyt in hope des eęwighen leuens:

2

Welck toeghezegt heeft de onlœghenachtighe God ^* voor den eęwighen tijden:

* Ro.16.d.24 Coloss.1.d.26 Ephes.1.b.9 end .3.b.9 2.Tim.1.c.10 1.Petr.1.d.20

3

Heeft auer gheopenbaert t’zynen tijden zijn word door de prediking, ^‡ die my vertrauwt is, na dem beuele Godes onzes Zalighmakers:

‡ Act.20.e.24 Gal.1.a.1

4

^* Tito [mynem] oprechten zone na ghemeynem ghelooue, ^‡ Ghenade, barmhertigheyt [end] vrede van Gode dem Uader, ⁺ end dem Heęre Iesu Christo onzem Zalighmaker.

* Act.16.a.3 Gal.2.a.3 2.Cor.8.c.16

‡ Ephe.1.a.2 Col.1.a.2 1.Petr.1.a.2

+ B

5

Deßhaluen liet ick dy in Creta, dat du wat dar noch ghebrack, volbeterdest, ^* end bezettdest de steden allenthaluen mit Olderlinghen, als ick dy verordent had.

* 2.tim.2.a.2

6

^* Zo iemand is, onanklaeghlick, eęnes wijfs mann, die gheloouighe kinders hebbe, niet beruchtight mit ouerdadigheyt, of wederspannigh.

* 1.Tim.3.a.2

7

Want eęn Opziener moet onanklaeghlick zijn, ^* als eęn huyßholder Godes, niet eyghenzinnigh, niet toornnmoedigh, ^‡ niet wijnzuchtigh, gheęn slagher, gheęn vuylghewinnzoucker,

* mat 24 d.45 1.Cor.4.a.1

‡ Leui.10.b 9 Ephe.5.d.18

8

⁺Mer herberghigh der vrémdelinghen, eęn liefhebber der goedigheyt, nuchter, oprechtigh, heyligh, matigh,

+ C

9

Uastholdigh an dem trauwen wor-

[p. 365v]

de welck is na der leęre: op dat hy oock machtigh zy te vermanen door heylßame leęre, end te wederlegghen de wederzegghers.

10

^* Want dar zijn vele wederspannighen end ijdelsprekighen, end ghemoed’ueruoerers, zonderlick die wt der Besnijdenisse zijn.

* Act.15.a.1

11

Welcken men moet den mond stoppen, die ^* dar gansche huyßghezinden verkeęren, end leęren dat niet behoorlick is, om des schandlicken ghewinns willen

* 2.Tim.3.b.6 Matt.23.b.12

12

⁺Eęn wt hen hœr eyghen ⁺ Propheet heeft ghezegt, De Creters zijn altijd lœghenachtigh, quade ghedierten, vuyle buycken.

+ D

+ Epimenides

13

Dit ghetuyghniß is waar. Om der oorzaken willen wederlegg ze dapperlick, op dat zy heylßaem zijn in dem ghelooue,

14

End niet achten op ^* Iœdische verdichtinghen, end menschen gheboden die zick van der waerheyt afwenden.

* Esa.29.d.13 Matt.15.a.9 Coloss.2.d.22 1.Timo.1.a.4 end .4.b.7. end .6.d.20 2.Tim.2.c.16

15

^‡ Den reynen is wel alles reyn: ^* den beuleckten auer end ongheloouighen is niets reyn, mer beuleckt is oock hœr ghemoed end consciency.

‡ Mat.15.b.11 Act.10.c.15 Rom 14.d.20

* mat.23.c.24 Ro.14.d.24

16

Zy belijden dat zy God kennen, auer mit den wercken verloochenen zy het: nademmael zy eęn gruwel zijn, end onghezegghelick, end tot allem goedem wercke ondooghßaem.