Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.iiij.

1

⁺ ZO betuyghe ick nu voor Gode end dem Heęre Iesu Christo, die dar richten zal de leuendighen end de dooden in zyner verschijninghe end in zynem kœningkrijcke:

+ Rom.1.b.9 end .9.a.1 2.Cor.1.d.23 end .11.g.31 Gal.1.d.20 Philip.1.b.8 1.Thes.2.a.5 1.Tim.5.d.21

2

Predick het word, hold an tijdighlick [end] ontijdighlick, wederlegg, bedreygh, vermaen, in aller langmoedigheyt end leęre.

3

Want dar zal eęn tijd zijn dat zy de heylßame leęre niet zullen dulden, mer na hœren eyghenen lusten, dewijl zy ooriuckigh zijn, zullen zy zick zeluen leęrmeęsters ophoopen:

4

End zullen het ghehoor van der waerheyt afwenden, end zick tot verzierßelen keęren.

5

Du auer, zy wacker in allen dinghen lijd teghenspoet, doe het werck eęnes Euangelisten, ⁺ volbring dynen dienst.

+ B

[p. 364r]

6

^* Want ick werde nu gheoffert, end de tijd myner ⁺ ontbinding is voor handen.

* 2.Petr.1.c.14

+ Of. verscheyding.

7

Ick heb den goeden kamp ghekampt, ick heb den loop vollendt, ick heb het ghelooue gheholden.

8

^* Uoordan my is toeghelegt de kroon der gherechtigheyt, welcke my gheuen zal de Heęr die eęn gherechtigh richter is, an ghenem daghe: auer niet alleęnlick my, mer oock allen die zijn verschijning lief ghehadt hebben.

* 1.Cor.9.d.25 1.Petr.5.b.4

9

Spoedigh dy dat du haestlick tot my kommest.

10

Want ^* Demas heeft my verlaten op deze teghenwordighe wæreld verlieft, end is na Thessalonica ghetoghen: ⁺ Cresces in Galatiam, Titus na Dalmatiam.

* Colo.4.d.14 Philem.d.23

+ C

11

^* Lucas is alleęn by my. ^‡ Marcum neem mede, end bring en mit dy: want hy is my zeęr nuttigh ten dienste.

* Colo.4.d.14

‡ Act.15.g.37 Col.4.b.10 Philem.d.23

12

^* Tichicum auer heb ick na Epheson wtghezonden.

* Act.20.a.4 Colo.4.b.7

13

Den reyßmantel den ick te Troada liet by Carpo, bring mede wanneęr du komst: end de boucken, zonderlick de pergamentbrieuen.

14

^* Alexander de koperslagher heeft my veel quaads bewezen: de Heęr verghelde hem na zynen wercken,

* 1.Tim.1.d.20

15

Uoor welckem verhoed dy oock: want hy heeft onzen worden zeęr wederstaen.

16

In myner eęrster verandwordinghe.

[p. 364v]

stond my niemand by, mer verlieten my alle: ⁺ het werde hen niet toegherekent.

+ D

17

De Heęr auer stond my by, end bekrachtighde my, op dat door my de prediking veruult wurde, end ze alle Heydens hoorden: end ick bin verlost van des leęuwes muyle.

18

Oock zal my de Heęr verlossen van allem boozen wercke, end zal my zaligh maken tot zynem hemelschen kœningkrijcke: welckem zy prijß van eęwigheyden tot eęwigheyden. Amen.

19

Groett ^* Priscam, end Aquilam, end het huyß ^‡ Onesiphori.

* Act.18.a.2 Rom.16.a 3

‡ 2.tim.1.d.16

20

^* Erastus is ghebleuen te Corinthen: ^‡ Throphimum auer heb ick te Mileto kranck ghelaten.

* rom.16.d.22

‡ Act.20.a.4 end .21.f.29

21

Spoedigh dy dat du voor dem winter kommest. Dy groett Eubulus end Pudens end Linus end Claudia, end alle de broeders.

22

De Heęr Iesus Christus zy mit dynem gheęst. De ghenade zy mit v. Amen.

An Timotheum der Ghemeynte van Epheso eęrsten Opziener mit kœrstemmen ghekoren, de ander, gheschreuen van Romen, doe Paulus nu andermael voor den Keyzer ghestelt ward.