Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.iij.

1

⁺ DIt auer weet, dat in den lesten daghen zullen gruwelicke tijden anstaen:

+ 1.Tim.4.a.1 2.Pet.3.a.3 Iude.c.18

2

Want de menschen zullen zijn eyghenlieuigh, gheldghierigh, pochchers, houærdigh, lasteraers, den olderen onghehoorzaem, ondanckbaer, onheyligh,

3

Zonder natuerlick beweghen, verbondbrekers, valsche beschuldighers, onmatigh, wreęd, niet liefhebbigh der goeder ⁺ dinghen.

+ Of. menschen

4

Uerraders, onbedachtßaem, opgheblazen, wellustlieuigh meęr dan Godslieuigh,

5

Die dar hebben eęn ⁺ ghedaente eęner ⁺ Godßaligheyt, auer der zeluer

+ Of. ghebær

+ Godlicken diensts

[p. 363r]

kracht hebben zy verloochent. ^{+ *} Oock van zulcken wend dy af.

+ B

* Matt.18.a.8 Rom.16.c.16 2.Thes.3.b.6 Tit.3.c.10

6

^‡ Want van den zeluen zijn die in de huyzen insluypen, end voeren de vrauwkens gheuanghen, die mit zonden ouerladen zijn, end werden ghedreuen door menigherley begærlickheyden:

‡ Tit.1.c.11 2.Ioan.d.10 Matt.23.b.12

7

Leęrnen altijd, end konnen nimmer meęr ter kennisse der waerheyt kommen.

8

^* Ghelijckerwijß auer Iannes end Iambres Mosi wederstonden, alzo wederstaen oock deze der waerheyt, menschen van verdoruenem ghemoede, onduchtigh tot dem ghelooue.

* Exod.7.b.11

9

⁺Auer zy zullen niet meęr voorduaren: want hœr verstandlooßheyt zal openbaer zijn eęnem ieghelicken, ghelijck oock der ghener was.

+ C

10

Du auer hebst achteruolght mijn leęr, anleyding, voorzett, ghelooue, langmoedigheyt, liefde, lijdßaemheyt,

11

Ueruolghinghen, lijden, die my wederuaren zijn ^* te Antiochia, ^‡ te Iconio, [end] te ^* Lystran: welcke veruolghinghen ick dar leed, ^‡ end wt allen heeft my de Heęr verlost.

* Act.13.g.50

‡ Act.14.a.2

* Act.14.c.18

‡ 2.Cor.1.b.10 Psal.34.d.20

12

^* End oock alle die Godßalighlick leuen willen in Christo Iesu, die zullen veruolght werden.

* Eccli.2.a.1 Luc.24.d.25 Act.14 d.22 1.Thes.3.a.3

13

⁺Auer de booze menschen end ⁺ behendighe bedrieghers zullen voorduaren tot dem ærghsten, veruoeren end laten zick veruoeren.

+ D

+ of. verdoouers

14

^* Du auer blijf in dem, dat du gheleęrnt hebst, ⁺ end dat dy vertrauwt is,

* 2.Tim.1.d.13

+ Of, waerin du gheloouigh worden bist,

[p. 363v]

nademmael du weetst van wem du het gheleęrnt hebst:

15

End dat du van kindheyt op de heylighe Schriften gheweten hebst, welcke dy wijß konnen maken ter zaligheyt door’t ghelooue welck is in Iesu Christo.

16

^* Alle Schrift is van Gode inghegheuen, end nuttigh ter leęringhe, ter wederlegghinghe, ter verbeteringhe, ter tuchtinge welcke is in gherechtigheyt:

* 2.Pet.1.d.20

17

Op dat de mensch Godes volkommen zy, tot allem goeden wercke gheschickt.