Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.iij.

1

HEt is eęn ghewiß word: Zo iemand na eęn ⁺ Opzienerschap lust heeft, die begært eęn goed werck.

+ of, Bisschops ampt

2

^* Zo moet nu eęn Opziener onstraflick zijn, eęner vrauwen mann, wacker, nuchter, tuchtigh, herberghigh der vrémdelinghen, ^* gheschickt te leęren.

* Tit.1.b.6

* 2.tim.2.d.24

3

Niet wijnzuchtigh, gheęn slagher, gheęn vuylgewinnzoucker, mer redelick, gheęn vechter, ongheldghierigh,

4

Die zynem eyghenen huyze wel vœrsta, die ghehoorzame kinders hebbe mit aller ghestadigheyt.

5

⁺(Zo auer iemand zynem eyghenen huyze niet weet vœr te staen, hoe zal hy de Ghemeynte Godes vœrzorghen?)

+ B

6

Gheęn nieuwlingk, op dat hy zick niet opblaze, end dem ⁺ lasteraer in’t gherichte valle.

+ Of. duuel

7

^* Hy moet auer oock eęn goed tuyghniß hebben van den, die buyten zijn, op dat hy niet dem lasteraer

* Deut.1.c.13 Act.1.d.21 end .6.a.3 end .16.a.2

[p. 356v]

in smaedheyt end strick valle.

8

^* Deßghelijcken de Dienaers [der armen moeten zijn] eęrbaer, niet tweętonghigh, niet wijnzuchtigh, gheęne vuylghewinnzouckers:

* Act.6.a.3

9

^+* Die de verborghenheyt des ghelooues hebben in reyner consciency.

+ C

* 1.Tim.1.d.19

10

De zelue auer late men oock eęrst beprouuen: daerna late men ze dienen, zo zy onanklaghlick zijn.

11

Deßghelijcken hœre vrauwen [moeten zijn] ghestadigh, gheęne nalastersche, nuchtere, trauw in allen dinghen.

12

De Dienaers [der armen] zullen zijn eęn ieghelick eęnes wijfs mann die hœren eyghenen kinderen end huyzen wel vœrstaen.

13

^* Want die wel ghedient zullen hebben, die verwæruen zick zeluen eęnen goeden trap, end eęn groote vrijmoedigheyt im ghelooue welck is in Christum Iesum.

* Mat.25.b.21

14

⁺Zulcks schrijue ick dy, end hope kortlick tot dy te kommen: op dat du wetest zo ick vertouue, hoe men verkeęren moet in dem huyze Godes, welcke is de Ghemeynte des leuendighen Godes, ^* eęn pielaer end gronduastigheyt der waerheyt.

+ D

* Matt.16.c.18

15

End onwederspreecklick groot is de verborghenheyt der Godßaligheyt. ^* God is gheopenbaert im vleęsche, gherechtuærdight im Gheęst, ghezien van den Enghelen, ^‡ ghepredickt onder den Heydenen, ghelooft in der wæreld, opgenomen in heęrlicheyt.

* Ioan.1.b.14 Baru.3.d.38

‡ Ephes.3.a.5 b.6