Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.ij.

1

ZO vermane ick nu dat men voor allen dinghen doe smeęken, ghebeden, vœrbeden end danckzegghinghen vœr alle menschen,

2

^* Uœr kœninghen end vœr alle die in Ouerheyt zijn: op dat wy eęn gherust end still leuen leyden in aller Godßaligheyt end eęrbaerheyt.

* Iere.29.b.7 Baruc.1.c.11

3

Want zulcks is goed end anghenaem voor Gode onzem Zalighmaker,

4

^+* Die dar wilt dat alle menschen zaligh werden, end ter kennisse der waerheyt kommen.

+ B

* Ezech.18.e.23 2.Pet.3.b.9

5

^* Want dar is eęn God oock eęn ^‡ Middelaer tusschen Gode end menschen, eęn mensch Christus Iesus,

* Ioan.17.a.3

‡ Gal.3.c.19 Hebr.9.d.15

6

^* Die zick zeluen ghegheuen heeft vœr alle tot verrandzoening, op dat het t’zynen tijden ghetuyght wurde,

* mat.20.d.28 Ephes.1.b.7 Coloss.1.b.14

7

^‡ Waertoe ick ghezett bin eęn Prediker end Apostel (^* ick zeg de waerheyt in Christo, ick lieghe niet,) eęn Leęrmeęster der heydenen im gelooue end in waerheyt

‡ Act.9.c.15 end .13.a.2 end .22.e.21 Gal.1.c.16 end .2.b.8 Ephes.3.b.8 2.Tim.1.c.11

* Rom.1.b.9

8

⁺Zo will ick nu dat de mannen ^‡ bidden an allen plaetsen, ^* end opheffen heylighe handen zonder toornn end twisting.

+ C

‡ Ioan.4.c.23

* Psa.134.a.2 Esa.1.d.15

9

^‡ Deßghelijcken oock de vrauwen dat zy zick in tuchtigher kleędinghe mit schamelheyt end ghematigheyt cieren, niet mit vlechtinghen, of golde, of pærlen, of kostlickem bekleędsele:

‡ Tit.2.a.3 1.Pet.3.a.3

10

Mer als het vrauwen betaemt, die Godßaligheyt ⁺ belijden door goede wercken.

+ of. bewijzen

11

⁺Eęn vrauwe leęrne in stilheyt mit

+ D

[p. 356r]

aller onderdanigheyt.

12

^* Eęner vrauwen auer ghestadighe ick niet dat zy leęre, ^‡ of heęrschappy bruycke ouer den mann: mer dat zy still zy.

* 1.cor.14.g.34

‡ Gene.3.c.16 Ephe.5.e.24

13

^* Want Adam is eęrst gemaeckt, daerna Eua.

* Gene.1.d.27 end .2.d.22

14

^‡ End Adam ward niet mit list veruoert, auer de vrauw ward mit list veruoert, end is in ouertredinghe geweeßt:

‡ Gene.3.a.6

15

Zy zal auer zaligh werden door kindbaring, zo zy ⁺ blijue im ghelooue end liefde, end heylighmakinghe mit ghematigheyt.

+ Gr. blijuen