Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.v.

[p. 350v]

1

VAn den tijden auer end den wijlen, broeders, is niet van nooden v te schrijuen.

2

Want ghy zelue wetet ghewißlick, ^* dat de dagh des Heęren toekomstigh is als eęn dief in der nacht.

* Mat.24.d.43 2.Pet.3.c.10 Apoc.3.a.3 end .16.c.15

3

Want wanneęr zy zullen zegghen, Het is vrede end zekerheyt, alsdan hangt hen eęn snelle verdærfniß op den halß: ghelijckerwijß de barensnood der zwangherer vrauwen, end zullen gheęnßinns entuliehen.

4

^* Ghy auer, broeders, zijt niet in duysternisse, dat v die dagh als eęn dief beuanghe.

* Ephe.5.b.8

5

Ghy zijt alle t’zamen kinders des lichts, end kinders des daghs: wy zijn niet der nacht noch der duysterniß.

6

^* Zo latet ons nu niet slapen, ghelijck oock de anderen, ⁺ mer latet ons waken end nuchter zijn.

* rom.13.c.11.13 Ephe.5.c.14

+ B

7

Want die dar slapen, die slapen des nachts: end die dar droncken zijn, die zijn des nachts droncken.

8

Wy auer die wy des daghs zijn, latet ons nuchter zijn, angedaen mit der borstwapen des ghelooues end der liefde, ^* end mit dem hælmm der hope op de zaligheyt.

* Ephe.6.c.17 Esa.59.c.17

9

Want God heeft ons niet ghezett tot toornn, mer de zaligheyt te verwæruen door onzen Heęre Iesum Christum,

10

Die vœr ons ghestoruen is: ^* op dat, het zy wy waken of slapen, wy mit hem te ghelijck leuen.

* Rom.14.b.7 2.Cor.5.c.15 Gal.2.d.20 1.Pet.4.a.2

11

Daerom vermanet malckanderen,

[p. 351r]

end stichtet de eęne den anderen, ghelijckerwijß ghy oock doet.

12

⁺Wy bidden v auer, broeders, ^* dat ghy bekennet die an v arbeyden, end die v vœrstaen in dem Heęre, end v vermanen:

+ C

* Rom.15.f.27 1.Cor.9.b.11 Gal.6.b.6 Phili.2.d.29 1.Tim.5.c.17 Hebr.13.a.7 c.17

13

End dat ghy ze zeęr hoogh achtet door liefde, omm hœrs wercks willen: [end] zijt vreedßaem mit hen.

14

Wy bidden v auer, broeders, vermanet de ongheschickten, troostet de kleynmoedighen, richtet de zwacken op, zijt langmoedigh teghen allen.

15

^* Ziet toe dat niemand quaad vœr quaad iemanden verghelde, mer iaghet altijd dem goede na, oock teghen malckanderen end teghen allen.

* Leu.19.d.18 Pro.20.c.22 end .24.d.29 Matt.5.f.39 Rom.12.d.17 1.Cor.6.b.7 1.Pet.3.b.9

16

^‡ Zijt altijd vroylick.

‡ Matt.5.b.12 Luc.10.d.20 Rom.12.c.12 Philip.4.a.4

17

^* Biddet zonder onderlaat.

* Luc.18.a.1 Rom.12.c.12

18

^‡ Zijt dancbaer in allen dinghen: want dit is de wille Godes in Christo Iesu an v

‡ ephes.5.e.20

19

^* Den Gheęst blusschet niet wt.

* 1.cor.14.f.30

20

De Prophecyen verachtet niet.

21

⁺Prouuet alle dingk: [end] het goede beholdet.

+ D

22

^‡ Entholdet v van allem schijne des boozes.

‡ 2.mac 6.f 24

23

^* De God auer des vredes heylighe v gansch volkommelick, end uwe gansche gheęst end ziel end lijf werde bewaert onklaghtbaer op de toekommst onzes Heęren Iesu Christi.

* 1.Cor.1.a.7 1.Thess.3.d.13

24

^‡ Ghetrauw is hy die v roupt, die zal het oock doen.

‡ 1.Cor.1.b.8 end .10.c.13 2.Cor.13.d.12 1.Pet.5.d.14

25

Broeders biddet vœr ons.

26

^* Groetet alle de broeders mit eęnem heylighen kuß.

* Rom.16.c.15 1.Cor.16.d 20

[p. 351v]

27

Ick bezweere v by dem Heęre, dat deze brief ghelezen werde allen den Heylighen broederen.

28

De ghenade onzes Heęren Iesu Chisti zy mit v. Amen.

An den Thessalonikeren de eęrste, gheschreuen van Athenen.