Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.iiij.

[p. 349v]

1

VOordan nu, broeders, bidden wy v end vermanen in dem Heęre Iesu, ghelijckerwijß ghy van ons entfanghen hebbet ^* hoe ghy moetet wandelen end Gode behaghen: dat ghy noch oueruloedigher werdet.

* 1.Thes.2.c.12 Philip.1.d.27

2

Want ghy wetet wat wy v vœr gheboden ghegheuen hebben, door den Heere Iesum.

3

^* Want dit is de wille Godes, uwe heylighmaking, ^‡ dat ghy v entholdet voor hoerery:

* Rom.12.a.2 Ephes.5.d.17

‡ Act.15.d.20

4

Dat eęn ieghelick onder v wete zijn vat te bezitten in heylighmakinge end eęre:

5

Niet in quader beweginghe der lust, ghelijckerwijß oock de Heydens die van Gode niet weten:

6

Dat hy zynen broeder niet vertrede end verkorte in dem handel: want de Heęr is eęn wræker ouer dit alles, ⁺ ghelijckerwijß oock wy v te voren ghezegt end betuyght bebben.

+ B

7

Want God heeft ons niet gheropen ter onreynigheyt, ^* mer in heylighmakinghe.

* Ioan 17.c.19 1.Cor.1.a.2

8

^‡ Derhaluen wie [dit] verwærpt, die verwærpt niet eęnen mensch, mer God, ^* die zynen heylighen Gheęst oock in ons ghegheuen heeft.

‡ Luc.10.c.16

* 1.cor.7.g.40

9

^‡ Uan der broederlicker liefde auer hebbet ghy gheęn nood dat ick v schrijue: want ghy zijt zelue van Gode gheleęrt malckanderen lief te hebben.

‡ Leui.19.d.18 Matt.22.d.38 Ioan.13.d.34 end .16.b.12 Ephes.5.a.2 1.Pet.4.b.8 1.Ioan.3.d.23 end .4.d.21

10

⁺End ghy doet oock het zelue an allen broederen die in ganschem Macedonia

+ C

[p. 350r]

zijn. Wy vermanen v auer, broeders, dat ghy noch oueruloedigher werdet,

11

^* End dat ghy ærnstlick daerna trachtet dat ghy still zijt, end het uwe eyghene doet, ^‡ end arbeydet mit uwen eyghenen handen, ghelijckerwijß wy v gheboden hebben.

* 2.Thes.3.b.7 c.12

‡ Act.20.g.35 Ephes.4.f.28 2.Thes.3.b.7 c.12

12

Op dat ghy eęrlick wandelet teghen den, die buyten zijn, end gheęns dings behouuet.

13

Ick will auer niet dat ghy onwetigh zijt, broeders, van den die entslapen zijn, ^* op dat ghy niet bedrouft werdet, ghelijckerwijß oock de anderen ^‡ die gheęn hope hebben.

* Eccl.22.b.10 end .38.b.17

‡ Sap.2.d.22

14

Want zo wy gheloouen dat Iesus ghestoruen end opghestaen is, alzo zal oock God die entslapen zijn door Iesum, mit hem bringhen.

15

⁺Want dit zegghen wy v als eęn word des Heęren, ^* dat wy die wy leuen end ouerblijuigh zijn in der toekommst des Heęren, zullen den gheęnßinns voorkommen die entslapen zijn.

+ D

* 1.Cor.15.c.22 g.51.

16

^* Want de Heęr zelue zal mit eęner wtroupinghe end eęner stemmen des Ouerenghels, end mit der bazounen Godes nederdalen vam hemel, end de dooden in Christo zullen eęrst opstaen:

* Matt.24.c.31 1.Cor.15.g.51 2.Thes.1.c.7

17

Daerna wy, die wy leuen end ouerblijuigh zijn, zullen t’zamen mit den zeluen opghegrepen werden in den wolcken, den Heęre te ghemoet in de lucht: end zullen alzo by dem Heęre zijn alle tijd.

18

Zo troostet v nu mit dezen worden onder eęn ander.