Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.iij.

1

DAerom doe wy’t niet meęr konden verdraghen, zo heeft het ons goed ghedocht, dat wy te Athenen alleęne ghelaten wurden.

2

End hebben ^* Timotheum ghezonden onzen broeder end dienaer Godes, end onzen medearbeyder in dem Euangelio Christi, v te beuestighen end v te troosten ouer uwem ghelooue:

* Act.16.a.1 Rom.16.d.20 Philip.2.e.19

3

^* Op dat niemand beweeght wurde in dezen verdruckinghen: want ghy wetet zelue, ^‡ dat wy daertoe ghezett zijn.

* Ephes.3.c.13 Philip.1.b.14

‡ Act.14.d.22 2.Tim.3.c.12

4

Want doe wy by v waren, voorzeyden wy v, wy moesten verdruckt werden: ghelijckerwijß het oock gheschiedt is, ⁺ end ghy het wetet.

+ B

5

Hierom oock, doe ick niet langher verdraghen konde, heb ick ghezonden, dat

[p. 349r]

ick bekende uwe ghelooue: op dat v niet eęnighßinns verzocht hadde de Uerzoucker, end onze arbeyd te vergheefs wurde.

6

Onlangs auer als Timotheus tot ons van v kommen is, end ons verkondight heeft uwe ghelooue, end liefde, end dat ghy onzer ghedencket altijd ten besten, end hebbet verlanghen ons te zien, ghelijckerwijß oock wy v:

7

⁺Hierom zijn wy ghetroost gheweeßt, broeders, an v, in aller onzer verdruckinghe end nood, door uwe ghelooue.

+ C

8

Want nu zijn wy leuendigh dewijl ghy bestaet in dem Heęre.

9

Want wat konnen wy Gode vœr eęnen danck verghelden om v, vœr alle de vrœghde waermede wy ons van uwent weghen verurœghen voor onzem Gode,

10

^* End bidden dagh end nacht bouen mate ærnstlick, dat wy zien moghen uwe anghezicht, end verheęlen zo dar wat entbreeckt an uwem ghelooue?

* Rom.1.b.11 end .15.e.23 2.Tim.1.d.10

11

⁺Auer God zelue, end onze Uader end onze Heęre Iesus Christus beschicke onzen wegh tot v.

+ D

12

U auer verrijcke de Heęr, end make v oueruloedigh in der liefde teghen malckanderen end teghen eęnem ieghelicken, ghelijckerwijß oock wy teghen v zijn,

13

^* Op dat uwe herten beuestight werden end onklaghtbar zijn in heylighmakinghe, voor Gode end onzem Uader, op de toekommst onzes Heęren Iesu Christi zampt allen zynen Heylighen.

* 1.Cor.1.a.9 1.Thes.5.d.23