Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

[p. 344v]

Cap.iij.

1

ZYt ghy nu mit Christo opgheweckt, zo zoucket dat dar bouen is, ^* daer Christus is zittende ter rechter hand Godes,

* Ephe.1.d.20

2

Zijt deß ghezinnt wat dar bouen is, end niet deß, dat op ærden is.

3

^* Want ghy zijt ghestoruen, end uwe leuen is verborghen mit Christo in Gode.

* 2.Cor.4.b.11

4

^* Wanneęr zick [auer] Christus onze leuen openbaren zal, dan zullet ghy oock gheopenbaert werden mit hem in heęrlicheyt.

* Phili.3.d.21 1.Ioan.3.a.2

5

^* Zo doodet nu uwe lidmaten die op ærden zijn, hoerery, onreynigheyt, quade beweghing, booze lust, end ghierigheyt, die dar is, afgodery:

* Ephe 4.f.29 end .5.a.3

6

^* Om welcker willen kommt de toornn Godes ouer de kinders der onghehoorzaemheyt.

* 1.Cor.6.b.10 Gal.5.d.21 Ephe.5.b.5 Apoc.22.c.15

7

^+‡ In welcken oock ghy voortijden wandeldet, doe ghy daerin leefdet.

+ B

‡ 1.Cor.6.b.11 Ephes.2.a.2 Tit.3.a.3

8

^* Nu auer legghet oock ghy dit alles of, toornn, verbolghenheyt, booßheyt, lastering, vuylghespreck wt vwem monde.

* ephe.4.e.22 Hebr.12.a.1 1.Petr.1.a.1 Iacob.1.c.21

9

Lieghet niet onder malckanderen: trecket den olden mensch mit zynen wercken wt:

10

^‡ End doet den nieuwen an, die dar vernieuwt werdt in kennisse ^* na dem beelde deß, die hem gheschapen heeft,

‡ Rom.6.a.4

* Gene.1.c.26 27. end .5.a.1 end .9.b.6 1.Cor.11.b.7

11

^‡ Waerin niet is Grieck end Iœde, Besnijding end Uoorhuyd, Barbarisch, Schyta, dienstknecht, vrije: mer alles end in allen Christus.

‡ Gal.5.a.6 end .6.d.15

12

^* Zo doet nu an als wtuerkorenen

* ephe.4.g.34 end .6.b.11

[p. 345r]

Godes, Heylighen end gheliefden, hertgrondlicke erbarminghen, goedertierenheyt, ootmoedigheyt, zaghtmoedigheyt, langmoedigheyt:

13

End verdraghet malckanderen, ^* end schencket malckanderen quijt, zo iemand klaghte heeft teghen den anderen: ⁺ gelijckerwijß oock Christus v quijtgheschoncken heeft, alzo oock ghy.

* Eccl.28.a.2 Mat.6.b.14 Marc.11.d.25 ephes.4.g.32

+ C

14

^* Bouen dit alles [doet an] de liefde, ^‡ welcke is de t’zamenbinding der volkommenheyt:

* Ioa.13.d.34 end .15.b.12 Ephes.5.a.2 1.Thess 4.b.9 1.Ioan.3.d.23 end .4.d.21

‡ 1 cor.13 a.1.2.3

15

End de vrede Godes holde de ouerhand in uwen herten, tot welcken ghy oock geropen zijt in eęnem lijue: end zijt lieflick.

16

Het word Christi wone in v rijcklick in allerley wijßheyt: ^* leęret end vermanet malckanderen, end zinghet mit psalmen end lofßanghen end gheęstlicken liedekens in ghenade dem Heęre in uwen herten.

* Ephe.5.d.19

17

^* End alles wat ghy doet mit worden of mit wercken, dat [doet] alles in dem name des Heęren Iesu, ^* end dancket Gode dem Uader door hem.

* 1.Cor.10.g.31

* Ephe.5.d.20 1 Thes.5.c.18

18

^+‡ Ghy vrauwen, zijt onderdanigh uwen eyghenen mannen, als het zick betaemt in dem Heęre.

+ D

‡ Genes.3.c.16 1.cor.14.g.34 Ephes.5.e.22 Tit.2.b.5 1.Pet.3.a.1

19

^* Ghy mannen, hebbet lief [uwe] wijuen, end zijt niet bitter teghen hen.

* Ephe.5.e.25

20

^‡ Ghy kinders, zijt ghehoorzaem den olderen in allen dinghen: want dit is dem Heęre behaaghlick.

‡ Ephes.6.a.1

21

Ghy vaders, tærghet niet uwe kinders, op dat zy niet mißmoedigh werden.

[p. 345v]

22

^* Ghy dienstknechten, zijt ghehoorzaem in allen dinghen uwen lijflicken Heęren, niet mit ooghendienste, als woldet ghy den menschen behaghen, mer mit eęnuoldigheyt des herten, als die ghy God vreęzet.

* Ephes.6.a.5 1.Tim.6.a.1 Tit.2.c.9 1.Pet.2.c.18

23

End alles wat ghy doet, doet het van herten, als dem Heęre, end niet den menschen:

24

End wetet dat ghy van dem Heęre entfanghen zullet de verghelding der ærflickheyt: want ghy dienet dem Heęre Christo.

25

Wie auer onrecht doet, die zal entfanghen wat hy onrechtlick ghedaen heeft: ^* end dar is gheęn wtneming des wterlicken anziens.

* Deut.10.d.17 2.Para.19.c.7 Iob.34.b.19 Sap.6.b.8 Eccli.35.c.12 Act.10.e.34 Rom.2.b.11 Gal.2.b.6 Ephes.6.b.9 1.Pet.1.c.17