Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.ij.

1

VUant ick will dat ghy wetet hoe grooten kamp ick hebbe omm v, end omm die, die te Laodicéa zijn, end alle die mijn anghezicht im vleęsche niet ghezien hebben:

2

Op dat hœre herten vertroost wurden, zo zy ⁺ t’zamen ghehecht zijn in der liefde, end in allem rijckdomm des ghewissen verstands, ^* te kennen de verborghenheyt Godes end des Uaders end Christi:

+ of, onderwezen

* Esa.53.d.11 Iere.9.g.23 Ioan.17.a 3 Philip.3 b.8

3

^‡ In welckem verborghen zijn alle schatten der wijßheyt end wetenschap.

‡ 1.Cor.1.d.22

4

Ick zeg auer hiervan, ^* op dat v niemand verwærre mit waarschijnigher redinghe.

* Ephe.5.b.6 Coloss.2.d.18

5

^* Want hoewel ick na dem vleęsche daer niet bin, zo bin ick nochtans na dem gheęste by v, verurœghe my end zie uwe ordening end de vastigheyt uwes ghelooues dat ghy an Christum hebbet.

* 1.Cor.5.a.3

6

Ghelijck ghy nu anghenomen heb-

[p. 343v]

bet den Heęre Cristum Iesum, [alzo] wandelet in hem:

7

⁺Ghewortelt end opghebauwt in hem, end beuestight in dem ghelooue, ghelijckerwijß ghy geleęrt zijt ^* end zijt oueruloedigh daerin mit danckzegghinghe.

+ B

* 1.Cor.1.a.5

8

^* Ziet toe dat dar niemand zy die v als eęn roof weghvoere door Philosophy end ijdel verleyding, na der menschen opzettinghe, na den letterleęren der wæreld, end niet na Christo.

* Rom.16.c.16 Hebr.13.b.9

9

^* Want in hem woont de gansche volheyt der Godheyt lichaemlick:

* Ioan.1.b.14 Coloss.1.c.19 2.Cor.5.d.19

10

^‡ End ghy zijt veruult in hem, die dar is het hoofd alles Uorstendomms end Macht:

‡ Ioan.1.b.16

11

^* In welckem ghy oock besneden zijt mit eęner Besnijdinghe zonder handen gheschiedt, in der wttreckinghe des zondighen lijfs des vleęsches, in der Besnijdinghe Christi,

* Rom.2.d.29 Philip.3.a.3 Deut.10.d.16 Iere.4.a.4

12

^* [End] mit hem t’zamen begrauen in dem Doope: in welckem ghy oock t’zamen opgheweckt zijt ^‡ door het ghelooue der dadigher wercking Godes, ⁺ welcker hem opgheweckt heeft van den dooden.

* Rom.6.a.4 Gal.3.d.27

‡ Ephe.1.d.19 end .3.b.7

+ C

13

^* End heeft v mit hem t’zamen leuendighghemaeckt doe ghy dood waret in den ⁺ mißdaden end in der Uoorhuyd uwes vleęsches, end heeft ons quijtgheschoncken alle mißdaden,

* Ephes.2.a.1

+ Gr. mißuallen

14

End wtghewischt het handschrift dat ons teghen was door de verordeninghen, welck ons enteghen was: end heeft het wt d’midden hénwegh ghenomen, end t’zelue an het cruyce ghehecht:

[p. 344r]

15

^* End heeft berooft de Uorstendommen end Machten, end ze vrijmoedighlick ten toone voorghestelt, end eęnen triumph gemaeckt van hen ⁺ door ze.

* Genes.3.c.15 Matt.12.c.29 Luc.11.c.22 Ioan.12.e.31 end .16.b.11

+ of, door zick zeluen.

16

^‡ Zo latet v nu niemand richten in spijze of in dranck, of ouer eęn deęl ^* eęnes feęstdaghs, of nieuwmaandags, of der Sabbaten.

‡ Leui.11.a.2 Rom.14.a.3

* Leui.23.a.2

17

^‡ Welck is eęn schaduwe van dem, dat toekommstigh was, het lijf auer is Christi.

‡ Hebr.8.b.5 end .10.a.1

18

^* Latet v niemand den kleynood ondernemen, die dar wil [zulcks doen] door ootmoedigheyt end religioen der Enghelen, ⁺ treedt hooghmoedighlick hærvoor in dem dat hy niet ghezien heeft, is te vergheefs opgheblazen van zynem vleęschlicken zinne,

* Iere.29.b.8 Mat.24.a.4 Ephes.5.b.6 2.Thes.2.a.2 1.Ioan.4.a.1

+ D

19

End holdt zick niet an dem hoofde, wt welckem het gansche lijf door leden end t’zamenghebindsel behandreyckt end t’zamenghehecht, waßt eęnen Godlicken waßdomm.

20

Zo ghy nu afghestoruen zijt mit Christo den letterleęren der wæreld, ^* wat werdet ghy mit verordeninghen beladen, als leefdet ghy in der wæreld? [naemlick]

* Gal.4.b.9

21

⁺ Eet niet, noch smaeck niet, noch roer niet an:

+ Of. tast niet an.

22

Welcke dinghen zijn alle ter verdærflickheyt des mißbruycks haluen, ^* na den gheboden end leęringhen der menschen.

* Esa.29.d.13 Matt.15.a.9 Tit.1.d.14

23

^‡ Welcke hebben wel eęn schijnrede eęner wijßheyt in eyghenwillighem dienst end ootmodigheyt end onuerschooninghe des lijfs, niet in eęnigher ⁺ eęren ter verzadinghe des vleęsches.

‡ 1.Tim.4 c.8

+ Dat is voedinghe. zie, 1.Tim.5.a.3