Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

[p. 341v]

De zendbrief Pauli tot den Colosseren.

Cap.j.

1

PAulus eęn Apostel Iesu Christi door den wille Godes, end Timotheus de broeder,

2

Den Heylighen end gheloouighen broederen in Christo die te Colossen zijn, ^* Ghenade zy v end vrede van Gode onzem Uader end dem Heęre Iesu Christo.

* Rom.1.a.7 Gal.1.a.3 Ephes.1.a.2 1.Petr.1.a.2

3

^‡ Wy dancken Gode end dem Uader onzes Heęren Iesu Christi altijd vœr v wanneęr wy bidden:

‡ Ephe.1.c.15 Philip.1.a.3 1.Thes 1.a.2 2.Thes.1.a.3

4

Na dem wy ghehoort hebben van uwem ghelooue in Christum Iesum, end van der liefde die ghy hebbet tot allen Heyligen

5

Om der hope willen ^* die v opghelegt is in den hemelen, van welcker ghy te voren ghehoort hebbet door het waerachtigh word des Euangelij,

* 1.Petr.1.a.4

6

Dat tot v toe kommen is, ghelijckerwijß oock ouer de gansche wæreld, ^* end is vruchtbaer, ghelijckerwijß oock in v, van dem daghe an, doe ghy ghehoort end bekennt hebbet de ghenade Godes in der waerheyt.

* Marc.4.a.8 Ioan.15.c.16

7

Ghelijckerwijß ghy oock geleęrnt hebbet van ^* Epaphra onzem gheliefden mededienstkneckt, die dar is eęn trauw dienaer Christi vœr v.

* Colos.4.c.12 Philem.d.23

8

Die ons oock kond ghedaen heeft uwe liefde im Gheęst.

9

^* Deßhaluen oock wy van dem daghe an, doe wy het ghehoort hebben, onder-

* Ephe.1.c.15

[p. 342r]

laten niet vœr v te bidden, end te begæren ^* dat ghy veruult werdet mit der kennenschap zijns willen, in allerley wijßheyt end gheęstlickem verstande:

* 1.Cor.1.a.5

10

^* Op dat ghy wandelet wærdighlick dem Heęre tot allem welgheuallen, ^‡ end vruchtbaer zijt in allem goeden wercke, end wasset in der kennenschap Godes:

* Genes.17.a.1 1.Cor.7.d.20 Ephes.4.a.1 Philip.1.d.27 1.Thes.2.c.12

‡ Ioan.15.c.16

11

End ghestærckt werdet mit aller stærckte na der kracht zyner heęrlicheyt, tot aller lijdßaemheyt end langmoedigheyt mit vrœghde:

12

End danckzegghet dem Uader, die ons bequaem ghemaeckt heeft tot dem ærfdeęle der Heylighen in dem lichte.

13

Welcker ons verlost heeft van der macht der duysterniß, end heeft ons ouerghezett in het kœningkrijck ^* zijns gheliefden Zoons:

* Mat.3.d.17 end .17.a.5 2.Petr.1.d 17

14

In welckem wy hebben de verrandßoening ^‡ door zijn bloed [naemlick] de quijtlating der zonden:

‡ Act.20.f.28 Ephes.1.b.7 Hebr.9.d.14 1.Petr.1.d.19

15

^* Die dar is eęn beeld des onzichtbaren Godes, ^‡ eęn eęrstgheborene voor allem schepsele.

* 2.cor.4.a.4 Philip.2.a.6 Hebr.1.a.3

‡ Apoc.3.c.14

16

^* Want in hem is alle dingk gheschapen dat in hemelen end op ærden is, het zichtbare end het onzichtbare, ⁺ het zy Throonen, of Heęrschappyen, of Uorstendommen, of Machten Het is alles door hem end tot hem geschapen:

* Gene.1.a.1 Psal.33.a.6 Ioan.1.a.3 Ephe.3.b.9 Hebr.1.a.2

+ C

17

End hy is voor allen dinghen, end alle dingk bestaet in hem.

18

End hy is ^‡ het hoofd des lijfs [naemlick] der gemeynte, hy is het beghinn, ^* de eęrstgheborene wt den dooden: op dat hy in allen dinghen den voorgangk hebbe:

‡ Ephe.1.d.22 end .4.c.15 end .5.e.25

* 1.cor.15.c.20 Apoc.1.a.5

[p. 342v]

19

(Want het is [Gode] welgheualligh gheweeßt, ^* dat in hem alle volheyt wonen zolde, ^‡ end dat hy alle dingk door hem verzoenen zolde tot zick.)

* Ioan.1.b.14 Colos.2.b.9

‡ 2.Cor.5.d.18 1.Ioa.4.b.10

20

^* Welcker beuredight heeft door het bloed zijns cruyces, door zick zeluen, zo wel dat op ærden, als dat in den hemelen is.

* Esa.9.b.6 Ioan.16.d.33 Act.10.f.36 Rom.5.a.1 Ephe.2.c.13

21

End v, die ghy voortijden verurémdt end vianden waret door het ghemoed in den boozen wercken,

22

Heeft hy nochtans nu verzoent in dem lijue zijns vleęsches door den dood, ^* op dat hy v stellde heyligh end onstrafbaer end ontschuldigh voor zick:

* Luc.1.g.70 Ephe.1.a.4 end .5.f.27 2.Tim.1.c.9 Tit.2.c.12

23

^‡ Zo ghy anders volhærdet in dem ghelooue, ghegrondeert end vast end onbeweeght van der hope des Euangelij, welck ghy ghehoort hebbet, welck ghepredickt is onder alle schepsel dat onder dem hemel is, welckes ick Paulus eęn dienaer gheworden bin.

‡ Ioan.15.a.6

24

^+* Nu verurœghe ick my in mynem lijden ^‡ vœr v, end veruulle het ouerblijfsel der verdruckinghen Chrsti in mynem vleęsche vœr ^* zijn lijf, welck is de Ghemeynte:

+ D

* 2.Cor 7.a.4

‡ Ephe.3.c.13 Philip.2.c.17 2.Tim.2.b.10

* Rom.12.b.5 1.Cor.12.d.27 Ephe.4.c.12 end .5.e.23

25

Welcker ick eęn dienaer geworden bin na der wtdeęlinghe Godes die my ghegheuen is onder v, dat ick veruulle het word Godes,

26

[Naemlick] ^‡ de verborghenheyt die verholen gheweeßt is van den eęwen hær end van den gheslæchten hær: ^* nu auer gheopenbaert is zynen Heylighen:

‡ rom.16.d.24 Ephe.1.b.9 end .3.b.9 2.Tim.1.c.10 Tit.1.a.2 1.Pet.1.d.20

* Matt.13.b.11

27

^‡ Welcken God heeft willen kond

‡ 2.cor.2.d.14

[p. 343r]

doen, welcke dar zy de rijckdomm dezer heęrlicher verborghenheyt onder den Heydenen, welcke is Christus in v, ^* de hope der heęrlicheyt, welcken wy verkondighen:

* 1.Tim.1.a.1

28

End vermanen alle mensch, end leęren alle mensch in aller wijßheyt: op dat wy voorstellen eęnen ieghelicken mensch volkommen in Christo Iesu:

29

Waertoe ick oock arbeyde end kampe na der dadigher werckinghe deß, die in my dadighlick werckt mit krachte.