Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

[p. 336r]

De zendbrief Pauli tot den Philipperen.

Cap.1.

1

PAulus end Timotheus dienstknechten Iesu Christi, allen den Heylighen in Christo Iesu, die dar zijn te ^* Philippen zampt den Opzieneren end ^* Dienaren:

* Act.16.b.12

* Act.6.a.3

2

^‡ Ghenade zy v end vrede van Gode onzem Uader, end dem Heęre Iesu Christo.

‡ Rom.1.a.7 1.Pet.1.a.2

3

^* Ick dancke mynem Gode, zo menighmael ick uwer ghedencke:

* Ephe.1.c.15 Colo.1.a.3 1.Thes.1.a.2 2.Thes.1.a.3

4

End bid altijd ærnstlick in allem mynen ghebede vœr v allen mit vrœghden:

5

Om uwer ghemeynschap willen in het Euangelium, van dem eęrsten daghe an tot nu toe:

6

End bin deß zeluen ghewiß, dat die in v begonnen heeft ^* eęn goede werck, die zal het volbringhen tot an den dagh Iesu Christi:

* Ioan.6.c.29 1.Thes.1.b.3

7

Ghelijck het my billick is dat ick zulcks van v allen gheuoele, daerom dat ick v in mynem herten heb, end in mynen banden, end in der verandwordinghe end beuestinghe des Euangeliums, als die ghy alle mit my der ghenade mede deęlachtigh zijt.

8

^+* Want God is mijn tuygh, hoe my na v allen verlangt van herten grond in Iesu Christo.

+ B

* Rom.1.a.9 end .9.a.1 2.Cor.1.d.23 end .11.g.31 Gal.1.d.20 1.Thes.2.a.5 1.Tim.5.d.21 2.Tim.4.a.1 1.Thess.2.a.5 1.Tim.5.d.21 2.Tim.4.a.1

9

End dit bidd ick dat uwe liefde noch meęr end meęr oueruloedigh

[p. 336v]

werde in kennenschap end allerley ghemærck:

10

Op dat ghy beprouuet wat het zonderlickste zy, op dat ghy louter zijt end onanstootigh tot op den dagh Christi,

11

Ueruult mit vruchten der gherechtigheyt, die dar kommen door Iesum Christum, ter eęre end prijze Godes.

12

Ick will auer dat ghy wetet, broeders, dat wat omm my [gheschiedt] is, meęr ter voorderinghe des Euangelij wtghekommen is:

13

Alzo dat myne banden in Christo openbaer gheworden zijn in dem ganschen Richthuyze, end by den anderen allen:

14

^* End dat vele broeders in dem Heęre, door myne banden verklouckt, hebben deß te oueruloedelicker het word doruen spreken onuertzaeght.

* Ephes.3.c.13 1.Thes.3.a.3

15

Zommighe ia prediken Christum oock om nijd end twist willen: zommighe auer oock omm welgheuallen willen:

16

De eęne verkondighen Christum wt tweędracht niet louterlick, ⁺ dewijl zy meynen tot mynen banden lijden toe te bringhen:

+ C

17

De anderen auer wt liefden, dewijl zy weten dat ick ter verandwordinghe des Euangelij hier ligg.

18

Wat is het auer? doch in allerley wijze, het zy door voorwending, of door waerheyt, Christus werdt verkondight: end hierin verurœghe ick my, end zal my oock verurœghen.

19

^* Want ick weet dat my dit ghedijen zal ter zaligheyt door uwe ærnstigh ghebed

* 2.Cor.1.b.11

[p. 337r]

end bystand des Gheęstes Iesu Christi, na mynem stadighen verwachten end ⁺ hopen:

+ of. hopen, dat ick nærghent in te schande zal kommen:

20

Want ick zal nærghent in te schanden kommen: mer mit allem vrijwt spreken, ghelijck altijd, alzo oock nu zal Christus groot ghemaeckt werden in mynem lijue, het zy door leuen of door dood.

21

Want mijn leuen is Christus, end het stæruen, ghewinn.

22

Nademmael auer im vleęsche leuen my eęn vrucht is tot dem wercke, zo is my niet kond welck ick kiezen zal.

23

⁺Want ick werde mit tweęerley benauwt, ick heb lust te ⁺ verscheyden, end mit Christo te zijn, welck [my] veel beter ware.

+ D

+ of, verherberghen,

24

Auer het is noodigher im vleęsche te blijuen om uwent willen.

25

End ghewißlick weet ick dit dat ick blijuen, end v allen byblijuen zal, v ter voorderinghe end ter vrœghden des ghelooues:

26

Op dat uwe romm oueruloedigh werde in Christo Iesu an my, door mijn wederkommst tot v.

27

^* Alleęnlick voeret uwen burgherlicken wandel wærdighlick dem Euangelio Christi: op dat ick, het zy dat ick komme end v zie, het zy in mynem afwezen, van uwem handel hoore, dat ghy bestaet in eęnem gheęst [end] in eęner ziele, end kampet te ghelijck mit dem ghelooue des Euangelij.

* Gen.17.a.1 1.Cor.7.d.20 Ephes.4.a.1 Coloss.1.b.10 1.Thes.2.c.12 end .4.a.1

28

End nærghent in v verschricken latet van den wederstreueren: welck hen

[p. 337v]

wel eęn anwijzing is der verdærfniß, v auer der zaligheyt, end dit zelue van Gode.

29

Want v is gheschoncken, om Christus willen, dat ghy niet alleęnlick in hem gheloouet, mer oock om zynent willen lijdet:

30

End hebbet den zeluen kamp, welcken ghy an my ghezien hebbet, end nu van my hooret.