Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.vj.

1

⁺ GHy kinders, gheuet ghehoor uwen olderen in dem Heęre: want dit is recht.

+ Colos.3.d.20

2

^* Eęr dynen vader end moeder: (welck is eęn eęrste ghebod mit eęner toezegghinghe:)

* Exod.20.b.12 Deut.5.b.16 Eccli.3.b.13 end .7.c.27 Matt.15.a.4 Marc.7.b.10

3

Op dat het dy wel ga, end dat du langleuigh zijst op ærden.

4

End ghy vaders, tærghet niet uwe kinders, ^‡ mer voedet ze op in tuchtinghe end vermaninghe des, Heęren.

‡ Deut.6.c.20 Psal.78.a.4 Prou.19.c.18 end .29.c.17 Eccli.7.c.23 end .30.a.1

5

^‡ Ghy dienstknechten, zijt ghehoorzaem uwen lijflicken heęren, mit vreęze end beuinghe, in eęnuoldigheyt uwes

‡ Colos.3.d.22 1.Tim.6.a.1 Tit.2.c.9 1.Petr.2.c.18

[p. 335r]

herten, als Christo:

6

Niet na ooghendienst, als woldet ghy den menschen behaghen, mer als dienstknechten Christi, die dar den wille Godes doet van herten,

7

⁺End dienet mit goedwilligheyt dem Heęre end niet den menschen:

+ B

8

End wetet, wat eęn ieghelick goedes ghedaen zal hebben, dat hy dat entfanghen zal van dem Heęre, het zy dienstknecht of vrije.

9

^* End ghy heęren, doet oock t’zelue teghen hen, end onderlatet het bedreyghen: end wetet dat oock uwe eyghen Heęr im hemel is: ^‡ end dar is by hem gheęn wtneming des wterlicken anziens.

* Eccli.7.c.20 end .33.d.29 Colos.4.a.1

‡ deut.10.d.17 2.Par.19.c.7 Iob.34.b.19 Sapi.6.b.8 Eccli.35.c.12 Act.10.e.34 Rom.2.b.11 Gal.2.b.6 Colos.3.d.25 1.Petr.1.c.17

10

Ten lesten, myne broeders, werdet verstærckt in dem Heęre, end in der kracht zyner stærckheyt.

11

^* Trecket an het gansche wapentuygh Godes: op dat ghy bestaen moghet teghen de listighe anloopen des duuels.

* Colos.3.b.12

12

Want wy hebben niet te kampen mit vleęsche end bloede, mer mit den Uorsten, ^‡ mit den Machten, ⁺ mit den Wæreldgheweldighen der duysterniß dezer eęwen, mit den gheęstlicken booßheyden in den hemelschen [plaetsen].

‡ Ephe.2.a.2

+ C

13

Hierom nemet an ^* het gansche wapentuygh Godes, op dat ghy moghet wederstaen an dem boozen daghe, end mit wtrichtinghe aller dinghen bestaen.

* 2.cor.10.a.4

14

^* Zo staet nu, ommgordet omm uwe lenden mit waerheyt: ^‡ end anghedaen mit der borstwapen der gherechtigheyt.

* Luc.12.e.35 1.Petr.1.c.13

‡ Sap.5.d.18

15

End gheschoeyt an den voeten mit

[p. 335v]

værdigheyt tot dem Euangelio des vredes.

16

Uoor allen dinghen nemet den schild des gheloofs an, mit welckem ghy konnet wtlesschen alle de vuerighe pijlen des Boozes.

17

^* Nemet oock an den hælmm der zalighmaking, end ^‡ het zwærd des Gheęstes, dat is, het word Godes:

* 1.Thes.5.b.8 Esa.59.d.17

‡ Hebr.4.c.12 Apoc.2.d.16

18

End biddet ^* t’aller tijd mit allem bidden end smeęken im Gheęst, ⁺ end waket hiertoe mit allem anholden end smeęken vœr alle Heylighen.

* Luc.18.a.1 Rom.12.c.12 Coloss.4.a.2 1.Thes.5.c.17

+ D

19

^‡ End vœr my, op dat my eęn word gegheuen werde wanneęr ick mynen mond opdoe, dat ick mit vrijwtspreken kond make de verborghenheyt des Euangelij,

‡ Act.4.f.29 2.Thes.3.a.1

20

Ouer welckem ick eęn Ambassaat bin in der keten, op dat ick daerin vrijmoedighlick handele, end alzo spreke als het my noodigh is.

21

Op dat ghy auer oock wetet hoe het mit my staet, [end] wat ick doe, zal v alles kond doen Tychicus de geliefde broeder end trauwe dienaer in dem Heęre:

22

Welcken ick tot v ghezonden heb om des zeluen willen dat ghy bekendet hoe het mit my sta, end dat hy uwe herten troostde.

23

Urede zy den broederen, end liefde mit ghelooue, van Gode dem Uader end dem Heęre Iesu Christo.

24

De ghenade zy mit allen den, die dar liefhebben onzen Heęr Iesum Christum louterlick. Amen.

An den Epheseren gheschreuen van Romen [ghezonden] door Tychicum.