Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.iiij.

1

Zo vermane ick v nu, die ick gheuanghen bin in dem Heęre, ^* dat ghy wandelet als het zick behoort der beroupinghe, waerin ghy beroupen zijt.

* Genes.17.a.1 1.Cor.7.d.20 Philip.1.d.27 Colos.1.b.10 1.Thes.2.c.12

2

Mit aller ootmoedigheyt end zachtmoedigheyt, mit langmoedigheyt: end verdraghet de eęne den anderen in der liefde.

3

^* End zijt vlijtigh te bewaren de eęnigheyt in dem Gheęste door den band des vredes.

* Rom.12.c.10 Hebr.13.a.1 1.Pet.1.d.22 end .2.c.17

4

Eęn lijf end eęn Gheęst, ghelijckerwijß ghy oock gheropen zijt op eęnerley hope uwer berouping.

5

Eęn Heęr [is’er], eęn ghelooue, eęn Doop.

6

^* Eęn God end Uader [onzer] aller die dar is ouer alles end door alles, end

* Deu.4.f.39 Mala.2.b.10 1.cor.8.b.4.6

[p. 332r]

in ⁺ v allen.

+ anders. ons

7

^+* Eęnem ieghelicken auer onder ons is ghegheuen de ghenade na der mate der gaue Christi.

+ B

* Rom.12.a 3.b.6 1.Cor.12.b.11 2.Cor.10.d.13 1.Pet.4.b.10 Ioan.3.d.34

8

Daerom zegt hy: ^‡ Hy is opgheuaren in de hooghde, end heeft gheuanglick ghenomen de gheuangniß, end heeft den menschen gauen ghegheuen.

‡ Psal.68.d.19

9

(^* Dat hy auer opgheuaren is, wat is het, dan dat hy oock ten eęrsten afghedaalt is in de onderste plaetsen der ærden?

* Ioan.3.b.13 end .6.g.62

10

Die afghedaalt is, die is de zelue die oock opgheuaren is bouen alle hemels: op dat hy alle dinghen veruulde.)

11

End de zelue heeft zommighe ^* tot Apostelen ghegheuen, zommige auer tot Propheten, ⁺ zommighe tot Euangelisten, zommighe tot Hærderen end Leęrmeęsteren,

* 1.Cor.12.d.28

+ C

12

Ter verheęlinghe der Heylighen, tot dem wercke des dienstes, ter opbauwinghe ^* des lijfs Christi:

* Rom.12.b.5 1.Cor.12.d.27 Ephe.1 d.23 end .5.e.23 Colo 1.d.24

13

Tot dat wy alle malckanderen entmoeten tot eęnerley ghelooue end kenniß des Zoons Godes, tot eęnem volkommenen manne na der maten der volkommener olderdomm Christi:

14

^* Op dat wy niet meęr kindische zijn, ^‡ end ons als in waterwallen laten hén end hær slaen end ommdrijuen van allerley winde der leęring, door behendigheyt der menschen, end door ærghlistigheyt, waermede zy laghen legghen te veruoeren.

* 1.Cor.14.d.20

‡ Eccli.5.c.11 Matt.11.a.7

15

Latet ons auer mit der waerheyt ommgaen in der liefde, end wassen in allen stucken in den, die ^‡ het Hoofd is, naemlick, Christus,

‡ Ephe.5.e.23 Colos.1.c.18

[p. 332v]

16

^+* Wt welckem zo het gansche lijf t’zamen gheuought end t’zamen ghehecht werde door alle handreyckigh lid, na der dadigher werckinghe eęnes ieghelicken lidmaats in [zyner] mate, maeckt des lijfs waßdom, ter opbauwinghe zijns zelfs in der liefde.

+ D

* Rom.12.b.5 1.Cor.12 d.27 Ephe.2.d.20

17

Zo zeg ick nu hiervan, ^* end betuyghe’t in dem Heęre, ^‡ dat ghy niet meęr wandelet, ghelijckerwijß oock de anderen Heydens wandelen in ijdelheyt hœrs ghemoeds,

* Rom.1.b.9

‡ Rom.1.b.18 c.22 1.Pet.4.a.3

18

Die dar verduystert zijn in dem verstande, end verurémdt van dem leuen dat wt Gode is, van weghen der onwetenheyt die in hen is, ⁺ door de verblending hœrs herten.

+ E

19

Welcke nademmael zy rouckelooß gheworden zijn, hebben zick zeluen ouerghegeuen der onkuyscher wellust, te bedrijuen allerley onreynigheyt mit onbehoorlicker begærlickheyt.

20

Ghy auer hebbet Christum alzo niet gheleęrnt.

21

⁺ Want ghy hebbet hem ghehoort, end zijt in hem gheleęrt, ghelijckerwijß in Iesu de waerheyt is,

+ of. Zo ghy anders etc.

22

^* Af te legghen na uwer vorigher wandelinghe den olden mensch die door de veruoerische lusten verdoruen werdt,

* Coloss.3.b.8 Heb.12.a.1 1.Pet.2.a.1

23

End vernieuwt te werden in dem gheęst uwes ghemoeds:

24

^+* End an te doen den nieuwen mensch die na Gode gheschapen is in waerachtigher gherechtigheyt end heyligheyt.

+ F

* Rom.6.a.4 Coloss.3.b.10 1.Petr.4.a.2

25

Daerom legghet de lœghen af, end

[p. 333r]

^* spreket de waerheyt eęn ieghelick mit zynem naesten: want wy zijn de eęn des anderen lidmaten.

* Zach.8.c.16

26

^* Toornet, end zondighet niet: Latet de zonn ouer uwem toorne niet ondergaen:

* Psal.4.a.5

27

^* Gheuet oock gheęn plaetß dem duuel.

* Iacob.4.b.7

28

Wie dar stal, die steele niet meęr: ^* auer arbeyde meęr end wercke mit den handen dat goed is, op dat hy hebbe mede te deęlen dem nooddurftighen.

* Act.20.g.35 1.Thes.4.c.11 2.Thess.3.b.8 c.12

29

^‡ Latet gheęn vuyl rede wt uwen monde wtgaen: mer die goed is ter noodigher stichtinghe: ⁺ op dat zy ghenade gheue den, die ze hooren.

‡ Matt.12.c.36 Ephe.5.a.3

+ G

30

Bedrouuet oock niet den heylighen Gheęst Godes, ^* waermede ghy verzeghelt zijt op den dagh der verlossing.

* Rom.8.c.16 2.Cor.1.d.22 end .5.a.5 Ephe.1.c.13

31

Alle bitterheyt end verbolghentheyt end toornn end krijsching, end lastering werde van v hén ghenomen zampt aller booßheyt.

32

^* Zijt auer teghen malckanderen goedertieren, hertbarmigh, ^‡ end vergheuet eęn dem anderen, ghelijckerwijß oock God v vergheuen heeft in Christo.

* Coloss.3.b.12

‡ Eccl.28.a.2 Matt.6.b.14 Marc.11 d.25 Coloss.3.b.13