Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.iij.

1

DErhaluen ick Paulus ^* de gheuanghene Christi Iesu [bin eęn Ambassaat] vœr v Heydens:

* Act.21.f.33 2.Tim.1.b.8

2

Zo ghy anders ghehoort hebbet van der bedieninghe der ghenade Godes, ^* die my an v ghegheuen is,

* Act.13.a.2 Ephes.3.b.8

3

^‡ Dat hy my door ontdecking kond ghedaen heeft de verborghenheyt, (ghelijckerwijß ick te voren op’t kortste gheschreuen heb,

‡ Gal.1.c.12

4

Waeran ghy, zo ghy het lezet, verstaen moghet mijn verstand in der verborghenheyt Christi,)

5

Welcke niet kond ghedaen is in anderen gheslæchten den menschen kinderen, ^* ghelijckerwijß zy nu ontdeckt is zynen heylighen Apostelen end Propheten door den Gheęst,

* Act.10.d.28

6

⁺[Naemlick] dat de Heydens zijn medeærfghenamen end medelijuigh end medeghenooten zyner toezegghing in Christo, door het Euangelium:

+ B

7

Deß ick eęn dienaer gheworden bin

[p. 331r]

na der gaue der ghenade Godes, die my ghegheuen is ^* na der dadigher werckinghe zyner moghentheyt.

* Ephe.1.d.19 Colo.2.c.12

8

^‡ My dem allerminsten onder allen Heylighen is ghegheuen deze ghenade, ^* onder de Heydens te euangelizeren den onbespœrlicken rijckdomm Christi:

‡ 1.Cor.15.a.9

* Act.9.c.15 end .13.a.2 end .22.e.21 Gal.1.c.16 end .2.b.8 1.Tim.2.b.7 2.Tim.1.c.11

9

End an het licht te bringhen allen [menschen] welcke dar zy de ghemeynschap ^‡ der verholenheyt die van den eęwen hær verborghen was in Gode, ^* die alle dingk gheschapen heeft door Iesum Christum:

‡ rom.16.d.24 Colo.1.d.26 Ephes.1.b.9 2.Tim.1.c.10 Tit.1.a.2 1.Pet.1.d.20

* Gene.1.a.1 Psal.33.a.6 Ioan.1.a.3 Colo.1.b.16 Hebr.1.a.2

10

^‡ Op dat nu kond wurde den Uorstendommen end Machten in den hemelschen [plaetsen] door de Ghemeynte de menigherley wijßheyt Godes,

‡ 1.Pet.1.c.12

11

⁺Na dem eęwighen voorzette welck hy ghemaeckt heeft in Christo Iesu onzem Heęre:

+ C

12

^* In welckem wy hebben vrijmoedigheyt end eęn toeleyding mit vertrauwen door het ghelooue in hem.

* Ioan.10.b.9 end .14.a.3 Rom.5.a.2 Ephe.2.d.17 Hebr.10.d.19

13

^‡ Daerom bidd ick dat ghy niet zwijket om myner verdruckinghen willen ^* vœr v, welcke v eęn eęr zijn:

‡ Phili.1.b.14 1 Thess.3.a.3

* Colo.1.d.24

14

Deßhaluen buyghe ick myne knijen teghen dem Uader onzes Heęren Iesu Christi,

15

Uan welckem alle ⁺ maeghschap in hemelen end op ærden ghenaemt werdt:

+ Of. Uaderschap

16

Dat hy v gheue na dem rijckdomm zyner heęrlicheyt, dat ghy mit kracht ghestærckt werdet door zynen Gheęst an dem inwendighen mensche,

17

Dat Christus wone door het gheloo-

[p. 331v]

ue in uwen herten, ⁺ end dat ghy in der liefden ghewortelt end ghegrondeert zijt:

+ D

18

Op dat ghy begrijpen moghet mit allen Heylighen, welcke dar zy de breędde, end de lengde, end de diepte, end de hooghde,

19

Oock bekennen de liefde Christi welcke alle kenniß ouertrefft: op dat ghy veruult werdet mit allerley Godes volheyt.

20

^* Dem auer die dar machtigh is wt oueruloed te doen ouer alles dat wy begæren of dencken, na der kracht die hy dadighlick werckt in ons, dem zy eęr in der Ghemeynte in Christo Iesu in allen gheslæchten van eęwigheyt tot eęwigheyden. Amen.

* Rom 16 d.24 26