Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.iiij.

1

ICk zeg auer, zo lang eęn ærfghenaem eęn kind is, zo is hy niet verscheyden van eęnem dienstknecht, hoewel hy eęn heęr is aller goederen.

2

Mer hy is onder den vœrmonderen end vœrzorgheren tot op de bestelde tijd van dem vader.

3

Alzo oock wy, doe wy kinders waren, waren wy in ⁺ eyghendomm onder der letterleęre der wæreld.

+ knechtschap

4

Doe auer ^* de tijd veruult ward, zand God zynen Zoon wt, ⁺ gheworden van eęner vrauwe, ^‡ end onder de Wet ghedaen:

* Gen.49.b.10 Dan.9.f.24

+ anders. gheboren van. etc.

‡ Matt.5.c.17

5

Op dat hy die, die onder der Wet waren, wtkochte: ^* op dat wy het kindschap entfinghen.

* Ioan.1.b.12 Gal.3.d.26

6

^‡ Dewijl ghy auer kinders zijt, zo heeft God wtghezonden den Gheęst zijns Zoons in uwe herten, die dar roupt Abba vader.

‡ Rom.8.c.15

7

Alzo bist du nu niet meęr eęn dienstknecht, mer eęn zoon: bist du auer eęn zoon, zo bist du oock eęn ærfghenaem Godes door Christum.

8

Auer ter tijd doe ghy God niet kendet, diendet ghy den, ^* die van natueren gheęne Goden zijn.

* 1.Cor.8.b.5

9

⁺Nu ghy auer God ghekennt hebbet,

+ B

[p. 325r]

ia veel meęr van Gode gekennt zijt, ^* hoe wendet ghy v wederom tot den zwacken end behouftighen letterleęren, welcken ghy wederom van voren an dienen willet?

* Colos.2.d.20

10

^* Ghy onderholdet daghen end maanden end ghetijden end iaren.

* Rom.14.a.5 Colo.2.c.16

11

Ick beureęß my uwer dat ick te vergheefs an v mochte ghearbeydt hebben.

12

Zijt doch als ick, want ick bin oock als ghy, broeders, ick bidd het v. Ghy hebbet my niet veronghelijckt.

13

Ghy wetet auer dat ick v in zwackheyt na dem vleęsche gheeuangelizeert heb eęrstmael:

14

End mijn anuechting die in mynem vleęsche was, hebbet ghy niet veracht noch verworpen: mer als eęnen ^* Enghel Godes namet ghy my an, [ia] ^‡ als Christum Iesum.

* Malach.2.b.7

‡ Mat.10.d 40 Ioan.13.c.20

15

Wat haddet ghy dan vœr eęn gheluckzaligheyt? want ick bin uwe tuygh, dat wenn het moghelick gheweeßt ware, ghy haddet uwe ooghen wtghetoghen, end my ghegheuen.

16

⁺Bin ick dan alzo uwe viand gheworden dat ick v de waerheyt voorholde?

+ C

17

^* Zy ijueren niet fijn omm v: mer willen v wtsluyten, op dat ghy omm ze ijuerdet.

* Rom.10.a.2

18

Het ijueren auer is goed [wanneęr het gheschiedt] altijd omm het goede, end niet alleęnlick wanneęr ick teghenwordigh by v bin.

19

Myne kinderkens, ^* welcke ick wederom mit banghigheyt bare, tot dat Christus in v ghestalt krijghe.

* 1.Cor.4.d.15 Phile.b.10 Iacob.4.c.18

20

Ick wolde auer dat ick nu by v ware

[p. 325v]

end mijn stemm veranderen konde: want ick bin twijfelmoedigh ouer v.

21

Zegghet my, die ghy onder der Wet zijn willet, hooret ghy de Wet niet?

22

Want dar is gheschreuen dat Abraham tweę zoons hadde, ^* eęnen van der dienstmaeghd, end ^‡ den anderen van der vrijer.

* Gen.16.d.15

‡ Genes.21.a.2 Act.7.a.8 Hebr.11.c.11

23

^* Auer die van der dienstmaeghd was, is na dem vleęsche gheboren: die auer van der vrijer was, door de toezegghing.

* Ioan.8.e.39 Rom.9.b.7

24

Dit zelue beduydt wat anders: Want deze [vrauwen] zijn tweę ⁺ Testamenten: ⁺ eęn van dem berghe Sina, dat ter knechtschap ghebaert, welck is Agar:

+ Of. Uerbonden

+ D

25

(Want Agar, is in Arabia de bergh Sina, end werdt ghelijck ghestelt mit dem, dat nu Hierusalem is:) ⁺ end dient mit hœren kinderen.

+ of, want zy

26

Auer ^* het Hierusalem dat dar bouen is, is vrij, welck is onzer aller moeder.

* Apoc.21.a.2

27

Want dar is gheschreuen: ^* Zy vroylick, du onuruchtbare die dar niet baarst, breeck wt end roup, du die gheęn barensnood lijdest: want de eęnßame heeft veel meęr kinders dan die den mann heeft.

* Esa.55.a.1

28

^* Wy auer, broeders, zijn na Isaac kinders der toezegghing.

* Rom.9.b.8

29

Auer ghelijckerwijß doe ter tijd die na dem vleęsche gheboren was, ^* veruolghde den, die na dem Gheęst [gheboren was]: alzo oock nu.

* Genes.21.a.8

30

Auer wat zegt de Schrift? ^* Stoot de dienstmaeghd hénwt zampt hœrem

* Gene.21.a.10

[p. 326r]

zone: want der dienstmaeghd zoon zal niet æruen mit dem zone der vrijer.

31

Zo zijn wy nu broeders, niet der dienstmaeghd kinders, mer der vrijer.