Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.xj.

1

OCh of ghy my eęn weynigh verdroughet in der onwijßheyt: ia ghy verdraghet my oock.

2

Want ick bin ijuerigh ouer v mit Godlickem ijuer: want ick heb v toegheuought eęnem manne, dat ick [v] eęn ^* reyne maeghd Christo voorstelde.

* Leui.21.c.13

3

Ick vreęze auer, dat, ^‡ ghelijcker-

‡ Gene.3.a.4 Ioan.8.f.44 Sap.2.d.24

[p. 316v]

wijß de slang Euam veruoert heeft mit hœrer ærghlistigheyt, alzo oock uwe zinnen eęnighßinns verdoruen mochten werden [door afwijcken] van der eęnuoldigheyt die an Christo is.

4

^* Want zo die, die dar kommt, eęnen anderen Iesum predickte, den wy niet ghepredickt hebben, of zo ghy eęnen anderen Gheęst entfinghet, den ghy niet entfanghen hebbet: of eęn ander Euangelium dat ghy niet anghenomen hebbet, ⁺ zo verdroughet ghy en billick.

* Gal.1.b.8

+ B

5

Want ick holde, ick zy nærghent in minder gheweeßt dan de ouertrefflicke Apostels.

6

Auer hoewel ick slecht bin in dem worde, nochtans niet in der kennisse: doch wy hebben by v in allen dinghen allenthaluen openbaer gheweeßt.

7

Of heb ick ghezondight dat ick my zeluen vernedert heb, op dat ghy verhooght wurdet? dat ick v het Euangelium Godes ^* vœr niets gheeuangelizeert heb?

* 1.Cor.9.b.12

8

Andere Ghemeynten heb ick berooft, end besolding [van hen] ghenomen, dat ick v diende.

9

End doe ick by v was teghenwordigh end ghebreck had, ^* was ick niemanden bezwaerlick. ^‡ Want dat my entbrack, veruulden de broeders die van Macedonia quamen: ⁺ end ick heb my in allen stucken v onbezwaerlick gheholden, end zal oock [my alzo] holden.

* Act.20.g.33 1.Thes.2.b.9 2.Thess.3.b.8 2.Cor.12.e.13

‡ Phi.4.c.15

+ C

10

De waerheyt Christi is in my, dat deze romm in den landen Achaia niet

[p. 317r]

⁺ verzeghelt zal werden teghen my.

+ anders. onderstopt.

11

Waerom dat? dat ick v niet lief heb? God weet het.

12

Wat ick auer doe, dat zal ick oock doen: op dat ick de oorzaeck afhauwe den, die oorzaeck begæren: op dat zy in dem, waerin zy zick rommen, beuonden werden ghelijck als oock wy.

13

Want zulcke valsche Apostels, zijn bedrieghlicke arbeyders, end verstellen zick tot Christus Apostelen.

14

⁺End het is gheęn wonder: Want de Satan zelue verstelt zick tot eęnem enghel des lichts.

+ D

15

Zo is het dan niet groots dat oock zyne dienaers zick verstellen, als waren zy dienaers der gherechtigheyt: welcker ende zijn zal na hœren wercken.

16

Ick zeg wederom (dat niemand meyne, ick zy onwijß: of anders, nemet my oock an als eęnen onwijzen: op dat ick my oock weynigh wat romme.)

17

Wat ick spreeck in dezem handel des rommens, dat spreeck ick niet als in dem Heęre, mer als in onwijßheyt.

18

^* Nademmael zick vele rommen na dem vleęsche, zo zal ick my oock rommen. ⁺

* Iob.29.a.2

+ E

19

Want ghy verdraghet gærne de onwijzen, dewijl ghy wijß zijt.

20

Want ghy verdraghet zo v iemand tot dienstknechten maeckt, zo v iemand verslindt, zo v iemand [het uwe] neemt, zo zick iemand verheft, zo v iemand in het anghezichte slaet.

21

[Dit] zeg ick na der oneęren, ⁺ euen

+ of. dat. wy als zwack zijn gheweeßt.

[p. 317v]

als waren wy zwack gheweeßt. ^* Zo waerin auer iemand koen is, (ick zeg het in onwijßheyt,) daerin bin ick oock koen.

* Act.22.a.3

22

Zy zijn Hebréers: ^* ick oock. Zy zijn Israeliters: ick oock. Zy zijn het zaad Abrahe: ick oock.

* Phili.3.a.4

23

Zy zijn dienaers Christi, (ick spreeck onwijßlick,) ^* ick bin’t meęr: ^‡ in arbeyden oueruloedigher, ⁺ in slaghen wtneemlicker, in gheuangnissen oueruloedigher, in doodsnooden menighmael.

* 1.Cor.15.b.10

‡ Act.9.c.16 end .21.b.11 2.Cor.6.a.4

+ F

24

Uan den Iœden heb ick vijfmael ^* viertigh slaghen, behaluen eęnen, entfanghen:

* Deut.25.a.3

25

^* Ick bin drymael ghegheęsselt, ^‡ eęnmael ghesteęnight: ^* drymael heb ick schipbrœck gheleden: nacht end dagh heb ick toeghebracht in der diepten der zeę.

* Act.16.e.22

‡ Act.14.c.18

* Act.27.a.2 g.41

26

In reyzinghen menighmael: in ⁺ gheuaerlickheyden op waterstroomen: in gheuaerlickheyden onder den moorderen, in gheuaerlickheyden onder [mynem] gheslæchte, in gheuaerlickheyden onder den Heydenen, in gheuaerlickheyden in steden, in gheuaerlickheyden in woestijnen, in geuaerlickheyden op der zeę, in gheuaerlickheyden onder den valschen broederen,

+ perikelen

27

In arbeyd end moeylickheyt, in waken menigmael, in hongher end dorst, in vasten menighmael, in kolde end naecktheyt.

28

⁺Behaluen wat zuß noch toeualt [naemlick] mijn daghlicksche ouerlooping, end ^* de zorghe aller Ghemeynten.

+ G

* Act.20.d.18

[p. 318r]

29

^* Wie is zwack, end ick bin niet zwack? wie werdt gheærghert, end ick brande niet?

* 1.Cor.8.d.13

30

Zo ick my rommen moet, zo zal ick my deß dat mijn zwackheyt belangt, rommen.

31

^* God end de Uader onzes Heęren Iesu Christi, die dar is gheprezen in eęwigheyden, weet dat ick niet lieghe.

* Rom.1.b.9 end .9.a.1 2.Cor.1.d.23 Gal.1.d.20 Philip.1.b.8 1.thess.2.a.5

32

^‡ Te Damasco de Oueruooghd des kœnings Aretas verwaerde de stad der Damasceren, end wolde my gheuanglick nemen:

‡ Act.9.d.24

33

End ick ward in eęnem korf ter venster wt door den muer neder ghelaten, end entulood wt zynen handen.