Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.ix.

1

⁺ AUer van der handreyckinghe die tot den Heylighen gheschiedt, is my onnoodigh v te schrijuen:

+ Act.11.d.29 Rom.15.f.26 1.Cor.16.a.2 2.Cor.8.a.4

2

Want ick weet uwes ghemoeds gheneyghenheyt, deß ick my van v romme by den van Macedonia, [end zeg] dat Achaia van dem voorganghen iare an bereyd

[p. 314v]

is: end uwe ijuer heeft’er vele verweckt.

3

Ick heb auer de broeders ghezonden op dat onze romm die wy van v hebben, niet ijdel wurde in dezem stucke: op dat ghy bereydt zijt, ghelijckerwijß ick ghezegt heb.

4

Op dat, zo die van Macedonia mit my quamen, end v onbereydt vonden, ⁺ wy (ick will niet zegghen ghy) gheęnßinns beschaemt wurden in dezem handel des romms

+ B

5

Daerom heb ick noodigh gheacht de broeders te vermanen, dat zy voorhén tot v ghinghen, end bereydden uwe voorbeloofde mildigheyt: dat zy bereyd zy, ghelijck als eęn mildigheyt, end niet als eęn afdringhing.

6

[Ick zeg] auer dit: ^* Wie dar karighlick zayt, die zal oock karighlick mayen: end wie dar zayt mildelick, die zal oock mildelick mayen.

* Pro.11.c.24 Gal.6.b.7

7

Eęn ieghelick [doe,] ghelijckerwijß hy in zynem herte voorneemt, ^* niet wt zwaermoedigheyt, of wt bedwanghe: ^‡ Want eęnen vroylicken gheuer heeft God lief.

* Deut.15.a.7 Rom.12.b.8

‡ Exod.25.a.2 end .35.a.5 Eccli.35.b.8

8

God auer kann maken dat allerley weldaad an v oueruloedigh zy: op dat ghy in allen dinghen altijd allerley ghenoughßaemheyt hebbet, ⁺ end oueruloeyet in allerley goedem wercke:

+ C

9

Ghelijckerwijß gheschreuen is, ^* Hy heeft wtghestroeyet [end] heeft ghegheuen den armen: zijn gherechtigheyt blijft in eęwigheyt.

* Psal.112.b.9

10

Die auer zaad verleęnt dem zayere, die verleęne oock brood ter spijzen, end

[p. 315r]

vermenighfuldighe uwe zaad: end vermeęre het gewaß uwer gherechtigheyt:

11

Op dat ghy rijck werdet in allen dinghen tot aller eęnuoldigheyt, welcke werckt door ons danckzegghing Gode.

12

⁺Want de bediening dezes diensts veruult niet alleęnlick de behouftigheyden der Heylighen, mer is oock oueruloedigh door veler danckzegghinghen tot Gode,

+ D

13

Welcke door de beprouuing dezer bediening God prijzen ouer uwer onderdanigher ouereęnkomminghe in het Euangelium Christi, end ouer der eęnuoldigher mededeęlinghe an ze end an alle:

14

Oock in hœrem ærnstighen ghebede vœr v, welcke verlanghen hebben na v om der ouertrefflicker ghenaden Godes willen in v.

15

Gode auer zy danck vœr zijn onwtsprekelicke gaue.