Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

[p. 313r]

Cap.viij

1

VUY doen v auer kond, broeders, van der ghenade Godes die in den Ghemeynten van Macedonia ghegheuen is,

2

Dat de oueruloedigheyt hœrer blijschap in grooter beprouuinghe der verdrucking, end hœr diepe armoede oueruloedigh zy gheweeßt tot rijckdomm hœrer eęnuoldigheyt.

3

Want na hœrem vermoghen (welck ick betuyghe,) ia bouen vermoghen waren zy van zick zeluen ghewilligh:

4

^* End baden ons ærnstlick mit veel vermanens, dat wy annamen de weldaad end de ghemeynschap der handreycking die dar gheschiedt den Heylighen.

* Act.11.d.29 Rom.15.f 26 1.Cor.16.a.2 2.Cor.9.a.1

5

End niet ghelijckerwijß wy hoopten, mer begauen oock zick zeluen ten eęrsten dem Heęre, end [daerna] ons, door den wille Godes:

6

Dat wy moesten Titum vermanen, dat hy, ghelijckerwijß hy te voren had angheuanghen, alzo oock noch zulcke weldaad an v vollendighde.

7

⁺Auer ghelijckerwijß ghy in allen stucken oueruloedigh zijt im ghelooue, end im worde, end in wetenschap, end in allerley benærstinghe, end in uwer liefde tot ons, [ziet toe] dat ghy oock in dezer weldaad oueruloedigh zijt.

+ B

8

Niet zeg ick dit ghebodswijze, mer door der anderen vlijtigheyt, oock uwer liefden goedaardigheyt te beprouuen.

9

Want ghy wetet de weldadigheyt

[p. 313v]

onzes Heęren Iesu Christi, ^* dat hy hoewel hy rijck was, doch arm gheworden zy om uwent willen: op dat ghy door zijn armoede rijck wurdet.

* Luc.9.g.58

10

End hierin gheue ick raad: want zulcks is v nuttigh, die ghy angeuanghen hebbet van dem vorighen iare an, niet alleęnlick te doen, mer oock te willen.

11

Nu auer vollendet oock het doen: op dat ghelijckerwijß dar is de gheneyghenheyt te willen, alzo oock zy [de gheneyghenheyt] te volbringhen na dem dat ghy hebbet.

12

^* Want zo dar de gheneyghenheyt des ghemoeds te voren is, ^‡ zo is de zelue anghenaem na dem dat iemand heeft, end niet na dem, dat hy niet heeft.

* Mar.12.d.43 Luc.21.a.3

‡ 1.Pet.4.b.10 Pro.3.d.28

13

⁺Want [dit is] niet op dat anderen ruymheyt hebben, ghy auer benauwing:

+ C

14

Mer op dat door ghelijckmatigheyt in der teghenwordigher tijd uwe oueruloedigheit [ghedije] tot hœrer gebrecklickheyt: end dat hœr oueruloedigheyt ghedije tot uwer ghebrecklickheyt, op dat dar ghelijckmatigheyt zy.

15

Ghelijckerwijß gheschreuen is, ^* Die veel [zamelde], had niet ouerigh, end die weynigh [zamelde], dem entbrack niet.

* Exod.16.d.18

16

Gode auer zy danck die de zelue vlijtigheyt vœr v gaff in het hert Titi:

17

Want hy nam wel de vermaning an: auer dewijl hy zeęr vlijtigh was, is hy van zick zeluen ghewillighlick tot v kommen.

18

Wy hebben auer oock den broeder mit hem ghezonden, die den prijß heeft in

[p. 314r]

dem Euangelio door alle Ghemeynten:

19

⁺Niet alleęnlick auer dit, mer is oock mit kœrstemmen verkoren van den Ghemeynten tot onzem medereyzer mit dezer weldaad, die van ons bedient werdt ten prijze des zeluen Heęren end ter gheneyghenheyt uwes ghemoedes:

+ D

20

End verhoeden dit dat ons niemand in dezer oueruloedigheyt berispe, die van ons bedient werdt.

21

^* Dewijl wy ons beulijtighen des goedes, niet alleęnlick voor dem Heęre, mer oock voor den menschen.

* Rom.12.d.17

22

Oock hebben wy mit hen ghezonden onzen broeder, den wy menighmael beprouft hebben in velen stucken dat hy vlijtigh zy, end nu veel vlijtigher, door eęn groot vertrauwen [welck wy hebben] tot v,

23

Het zy van weghen Titi, welcker mijn medeghezell, end an v eęn medehulper is: het zy [van weghen] onzer broederen welcke Apostels der Ghemeynten zijn, [end] eęn prijß Christi.

24

Zo bewijzet nu het bewijß uwer liefden, end onzes romms van v, an den zeluen, oock in der teghenwordigheyt der Ghemeynte.