Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.ij.

1

ICk besloot auer zulcks by my zeluen, dat ick niet wederom in droufnisse tot v quame.

2

Want zo ick v bedrouue, wie is’er doch die my vroylick maken mochte, dan die door my bedrouft werdt?

3

End dit zelue heb ick v gheschreuen, op dat ick niet, wanneęr ick quame, droufniß hadde van den, ouer welcke ick my behoorde te verurœghen: nademmael ick my deß an v allen vertrauwe dat mijn vrœghd

[p. 307r]

uwer aller [vrœghd] zy.

4

Want ick schreeff v in grooter verdruckinghe end benauwinghe des herten mit velen tranen: ⁺ niet op dat ghy bedrouft wurdet, mer op dat ghy de liefde bekendet, die ick zonderlick tot v heb.

+ B

5

Zo auer iemand droufniß anghericht heeft, die heeft my niet bedrouft, dan eęnsdeęls, op dat ick niet v alle bezware

6

^* Het is ghenough dat die zulck eęn is, van velen alzo ghestraft is:

* 1.Cor.5.a.3

7

Alzo dat ghy daerenteghen [hem] nu deß te meęr vergheuet end troostet: op dat zulckerley eęn door oueruloedighe droufniß gheęnßinns verzopen werde.

8

Daerom vermane ick v dat ghy de liefde an hem latet krachtigh zijn.

9

Want hiertoe heb ick [v] oock gheschreuen, dat ick ⁺ uwe beprouuing bekende, ⁺ of ghy in allen stucken ghehoorzaem zijt.

+ Of, v beproufde,

+ C

10

Wem ghy auer wat vergheuet, dem [vergheue] ick oock: want oock ick zo ick iemanden wat vergheuen heb, dat heb ick vergheuen om uwent willen, in Christus ⁺ statt.

+ Of, anschijn.

11

Op dat wy niet inghenomen werden van dem Satan. Want zyne ghedachtenissen zijn ons niet onbekennt.

12

Doe ick auer ^* tot Troada quam te prediken het Euangelium Christi, oock als my nu eęn dœre gheopent was in dem Heęre,

* Act.16.b.9

13

Had ick gheęn rust in mynem gheęst dat ick Titum mynen broeder niet vand: mer ick maeckte mijn afscheyd van hen,

[p. 307v]

end ghingk wt in Macedonien.

14

Auer Gode zy danck, die door ons altijd triumpheert in Christo: ^* end openbaert den rœck zyner kennenschap door ons in aller plaetse.

* Coloss.1.d.27

15

Want wy zijn Gode eęn goed gherœck Christi in den, die zaligh werden, end in den, die vergaen:

16

^* Dezen ia, eęn rœck des doods ten dood: den ghenen auer, eęn rœck des leuens ten leuen. End wie is hiertoe bequaem?

* Luc.2.e.34

17

Want wy zijn niet als zommigher vele, die dar het word Godes veyl hebben, mer wy spreken’t als wt louterheyt, mer als wt Gode, voor Gode, ⁺ in Christo.

+ Of. door Christum.