Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.xv.

1

⁺ ICk doe v auer kond, broeders, van dem Euangelio dat ick v gheeuangelizeert heb, welck ghy anghenomen hebbet, in welckem ghy oock staet,

+ Gal.1.b.11

2

^* Door welck ghy oock zaligh werdet, op wat wijze ick het v gheeuangelizeert hebbe, zo ghy’t entholden hebbet, ten ware dat ghy te vergheefs ghelooft haddet.

* Rom.1.b.16 1.Cor.1.c.16

3

Want ick heb v eęrstlick ouerghegheuen, welck ick oock entfanghen had, ^* dat Christus ghestoruen zy vœr onze zonden, na den Schriften:

* Esa.53.b.7 Dan.9.f.24 g.26. 1.Cor.5.c.6 1.Pet.2.d.24

4

^‡ End dat hy begrauen zy, ^* end dat hy opgheweckt zy ten derden daghe, na den Schriften:

‡ Ione.2.a.2 Mat.12.d.40

* Matt.28.b.6 Psal.16.c.8

5

^‡ End dat hy ghezien gheweeßt zy van Cephas, daerna van den twæluen:

‡ Mar.16.c.14 Luc.24.e.34 Ioan.20.e.19 Act.10.f.40

6

Daerna is hy ghezien gheweeßt van meęr dan vijf honderd broederen op eęn mael, welcker noch vele blijuen [in d’leuen] tot nu toe, zommighe auer zijn oock entslapen.

[p. 301v]

7

Daerna is hy oock ghezien gheweeßt van Iacobo, daerna van allen den Apostelen.

8

^* Ten allerlesten auer is hy oock van my, als eęnem mißdraghelingk ghezien gheweeßt.

* Act.9.a.3.c.17 1.Cor.9.a.1 2.Cor.12.a.2

9

Want ick bin ^‡ de allerminste onder den Apostelen, die niet bequaem bin dat ick eęn Apostel heete, ^* daerom dat ick de Ghemeynte Godes veruolght hebbe. ⁺

‡ Epes.3.b.8

* Act.8.a.3 end .9.a.1. end .22.a.4. end .26.b.9. Gal.1.c.13 1.Tim.1.c.13

+ B

10

Auer van Godes ghenade bin ick dat ick bin: end zijn ghenade an my is niet ijdel geweeßt: ^‡ mer ick heb oueruloedelicker gearbeydt dan zy alle: nochtans niet ick, mer Godes ghenade die by my is.

‡ 2.cor.11.e.23 end .12.d.11

11

Het zy nu ick, of die anderen, alzo prediken wy, end alzo hebbet ghy ghelooft.

12

Zo auer Christus ghepredickt werdt dat hy zy van den dooden opgheweckt, hoe zegghen zommighe onder v, dat dar gheęn opstanding der dooden zy?

13

Is’er auer gheęn opstanding der dooden, zo is oock Christus niet opgheweckt.

14

Is auer Christus niet opgheweckt, zo is ghewißlick onze prediking ijdel, zo is oock uwe ghelooue ijdel.

15

Wy werden oock beuonden valsche tuyghen Godes, dat wy ghetuyght hebben teghen God, hy hebbe Christum opgheweckt, welcken hy niet opgheweckt heeft, zo anders de dooden niet opgheweckt werden.

16

Want werden de dooden niet opgheweckt, zo is oock Christus niet opghe-

[p. 302r]

weckt.

17

Is auer Christus nit opgheweckt, zo is uwe ghelooue ijdel, noch zijt ghy in uwen zonden.

18

⁺Zo zijn oock die, die in Christo entslapen zijn, verloren.

+ C

19

Zo wy alleęnlick in dezem leuen op Christum onze hope ghestelt hebben, zo zijn wy de allerellendighste onder allen menschen.

20

Nu auer is Christus opgheweckt van den dooden, ^* end ^‡ de eęrstlingk gheworden onder den, die entslapen zijn.

* 1.Petr.1.a.3

‡ Col.1.c.18 Apoc.1.a.5

21

^* Want nademmael door eęnen mensch de dood is, zo is oock door eęnen mensch de opstanding der dooden.

* Genes.2.c.17 end .3.a.6 Rom.5.b.12 end .6.d.23

22

Want ghelijckerwijß zy in Adam alle stæruen, alzo zullen zy oock in Christo alle leuendigh ghemaeckt werden.

23

Eęn ieghelick auer in zyner eyghener ordeninghe: de eęrstlingk Christus, daerna die Christi zijn in zyner toekomst.

24

Daerna het ende, wanneęr hy het kœningkrijck Gode end dem Uader ouergheleuert zal hebben: ^* wanneęr hy vernietight zal hebben alle Uorstendomm end alle Macht end Gheweld.

* 1.Cor.2.b.6

25

^* Want hy moet regneren tot dat hy alle de vianden onder zyne voeten legghe.

* Psal.110.a.1 Act.2.e.34 Ephes.1.d.20 Colos.3.a.1 Hebr.1.d.13 end .10.c.12

26

⁺De leste viand die dar vernietight werdt, is de dood.

+ D

27

^‡ Want hy heeft [hem] alles onder zyne voeten onderworpen. Wanneęr hy auer

‡ Psal.8.b.7 Matt.11.d.27 end .28.d.18 Ephe.1.d.22 Hebr.2.b.8

[p. 302v]

zegt, dat het [hem] alles onderworpen zy, zo is het openbaer dat wtghenomen werdt, die hem alles onderworpen heeft.

28

Wanneęr auer alles hem onderworpen zijn zal, dan zal oock de Zoon zelue onderworpen werden dem, die hem alles onderworpen heeft: op dat God zy alles in allen.

29

Anders, wat zullen doen die ghedoopt werden ⁺ vœr de dooden, zo de dooden ganschlick niet opgheweckt werden? wat werden zy oock ghedoopt ⁺ vœr de dooden?

+ of. ouer de dooden

+ of. ouer de dooden

30

Wat staen wy t’aller vren in gheuaerlickheyt?

31

By onzem romm den ick heb in Christo Iesu onzem Heęre, stærue ick daghlicks.

32

Heb ick (menschlicker wijze) te Epheso mit den ghedierten gheuochten, wat nuttigheyt is het my, zo de dooden niet opgheweckt werden? ^* Latet ons eten end drincken, want morghen stæruen wy.

* Esa.22.c.13 end .56.b.12 Sap.2.b.6

33

Latet v niet veruoeren: booze reden verdæruen goede zeden.

34

⁺Entwaket oprechtlick, end zondighet niet: want zommighe weten niets van Gode. Ick zeg het v ter schande.

+ E

35

Auer iemand zal zegghen, ^* Hoe werden de dooden opgheweckt? mit welckerley lijue zullen zy kommen?

* Ezech.37.a.3

36

Du dwaaß, ^* dat du zayst, werdt niet leuendigh ghemaeckt, ten zy dat het stærue:

* Ioan.12.d.24

37

End dat du zayst, du zayst niet het

[p. 303r]

lijf dat dar werden zal, mer het bloot kornn (exempelwijß te spreken) der tarwen, of eęnighes der anderen.

38

God auer gheeft dem zeluen eęn lijf, ghelijckerwijß hy ghewolt heeft, end eęnem ieghelicken van den zaden zijn eyghen lijf.

39

Alle vleęsch is niet eęnerley vleęsch: mer eęn ander is het vleęsch der menschen, end eęn ander des veęß, eęn ander der visschen, eęn ander auer der voghelen.

40

End dar zijn hemelsche lichamen, end ærdische lichamen: auer eęn ander heęrlicheyt is het die de hemelsche, end eęn ander, die de ærdische hebben.

41

Eęn ander is de heęrlicheyt der zonnen, end eęn ander is de heęrlicheyt des maans, end eęn ander heęrlicheyt der sterren. Want eęn sterr is verscheyden van eęner [anderer] sterre in heęrlicheyt:

42

^* Alzo oock de opstanding der dooden. Het werdt ghezayt in verdærflickheyt, ⁺ het werdt opgheweckt in onuerdærflickheyt.

* Dani.12.b.3 Sap.3.b.7 end .5.a.1 Matt.13.f.43

+ F

43

Het werdt ghezayt in oneęrlickheyt, het werdt opgheweckt in heęrlicheyt: het werdt ghezayt in zwackheyt, het werdt opgheweckt in kracht.

44

Het werdt ghezayt eęn natuerlick lijf, het werdt opgheweckt eęn gheęstlick lijf. Dar is eęn natuerlick lijf, dar is oock eęn gheęstlick lijf.

45

Alzo oock gheschreuen is, De eęrste mensch Adam is gheworden in eęn leuende ziele: de leste Adam in eęnen le-

[p. 303v]

uendighmakenden Gheęst.

46

Auer het gheęstlick is niet het eęrste, mer het natuerlick, daerna het gheęstlick.

47

De eęrste mensch van der ærden, is ærdisch: de tweęde mensch, is de Heęr vam hemel.

48

Welckerley de ærdische is, zulckerley zijn oock de ærdischen: end welckerley de hemelsche is, zulckerley zijn oock de hemelschen.

49

^* End ghlijckerwijß wy ghedraghen hebben het beeld des ærdischen: [alzo] zullen wy oock draghen het beeld des hemelschen.

* 2.Cor.4.c.11

50

Dit auer zeg ick, broeders, ^* dat vleęsch end bloed niet konnen het kœningkrijck Godes beæruen: oock beærft de verdærflickheyt niet de onuerdærflickheyt.

* Ioan.1.b.13

51

⁺Zie, ick zeg v eęn verborghenheyt. ^* Wy zullen niet alle entslapen, wy zullen auer alle ^‡ verandert werden op d’allersnellste in eęnem ooghenblicke ^* ter lester bazounen.

+ G

* 1.Thes.4.d 15

‡ Phili.3.d.21

* Mat.24.c.31 1.The.4.d.15

52

Want zy zal schallen: end de dooden zullen opgheweckt werden onuerdærflick, end wy zullen verandert werden.

53

Want dit verdærflick moet andoen de onuerdærflickheyt: end dit stærflick moet andoen de onstærflicheyt.

54

Wanneęr auer dit verdærflick anghedaen zal hebben de onuerdærflickheyt, ^* end dit stærflick anghedaen zal hebben de onstærflickheyt, dan zal [veruult] werden het word dat dar gheschreuen is, ^* De dood is verslonden ter ouerwin-

* 2.Cor.5.a.4

* Osee.13.d.14 Esa.25.c.8 Hebr.2.d.14

[p. 304r]

ninghe.

55

Dood, waer is dijn prickel? Hell, waer is dijn ouerwinning?

56

Auer de prickel des doods is de zonde: de kracht auer der zonde is de Wet.

57

^* Gode auer zy danck die ons de ouerwinning ⁺ gheeft door onzen Heęre Iesum Christum.

* 1.Ioan.5.a.5

+ of. ghegheuen heeft.

58

Daerom myne gheliefde broeders, zijt standvastigh, onbeweeghlick, altijd oueruloedigh in dem wercke des Heęren: dewijl ghy wetet dat uwe arbeyd niet ijdel is in dem Heęre.