Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.xiiij

1

IAghet na der liefde, ijueret na gheęstlicken [gauen], noch meęr auer dat ghy propheteret.

2

Want wie mit [vrémder] tonghen spreeckt, die spreeckt niet den menschen, mer Gode: want niemand hoort het, im gheęst auer spreeckt hy verborghenheyden.

3

Wie auer propheteert, die spreeckt den menschen ter stichtinghe, end vermaninghe end vertroostinghe.

4

Wie mit tonghe spreeckt, die sticht zick zeluen: wie auer propheteert, die sticht de Ghemeynte.

5

Ick will wel dat ghy alle mit tonghen spreket, auer veel meęr dat ghy propheteret: want die dar propheteert is grooter dan die mit tonghen spreeckt, ten zy dat hy ze wtlegge, ⁺ op dat de Ghemeynte daervan ghesticht werde.

+ B

6

Nu auer, broeders, wenn ick tot v quame, end sprake mit tonghen, wat ware ick v nutt, zo ick niet mit v sprake of door ontdecking, of door kennenschap, of door Prophecy, of door leęring?

7

Ia oock de leeflooze dinghen die dar gheluyd gheuen, het zy pijp of harpe, wenn zy gheęn onderscheydlick gheluyd gheuen, hoe zal men weten wat dar ghepijpt of gheharpt werdt?

8

Want zo de bazoun eęn onzeker gheluyd gheeft, wie zal zick ten krijghe toe-

[p. 299v]

rusten?

9

Alzo oock ghy wenn ghy niet mit der tonghe eęn duydelicke rede gheeft, hoe zal men weten wat dar ghesproken werdt? want ghy zullet in den ⁺ wind spreken.

+ Gr. lucht

10

⁺Dar zijn, dat wy exempelwijß spreken, menigherley aarden der stemmen in der wæreld: end dezer gheęn is stemmlooß.

+ C

11

Zo ick nu niet wete der stemmen kracht, zo zal ick barbarisch zijn dem, die dar spreeckt: end die dar spreeckt, zal my barbarisch zijn.

12

Alzo dan oock ghy nademmael ghy ijueret na den gheęsten, trachtet daerna dat ghy daerin oueruloeyet ter stichtinghe der Ghemeynte.

13

Daerom wie mit [vrémder] tonghen spreeckt, die bidde dat hy magh wtlegghen.

14

Want zo ick mit tonghe bid, zo bidt mijn gheęst, mijn verstand auer is vruchtlooß.

15

Wat is het dan? Ick zal bidden mit dem ⁺ gheęst, end ick zal oock bidden mit dem verstande: ick zal zinghen mit dem gheęst, end ick zal oock zinghen mit dem verstande.

+ Of, adem

16

Anders, wenn du zeghenest mit dem gheęst, hoe zal die, die de plaetß eęnes slechten menschen veruult, Amen zegghen op dyne danckzegghing? ⁺ nademmael hy niet weet wat du zegst.

+ D

17

Want du zegst ia wel danckzegghing, auer de ander werdt niet ghesticht.

[p. 300r]

18

Ick dancke mynem Gode dat ick meęr dan ghy alle mit tonghen spreke.

19

Auer ick heb lieuer in der Ghemeynte vijf worden te spreken mit mynem verstande, op dat ick oock anderen onderrichte, dan tien duyzend worden mit [vrémder] tonghen.

20

Broeders, ^* zijt niet kinderkens van zinnen: mer zijt ^‡ kindisch in der booßheyt, in den zinnen auer zijt volkommen.

* Ephe.4.c.14

‡ Matt.18.a.3 end .19.b.14 1.Petr.2.a.2

21

In der Wet is gheschreuen, ^* Ick zal mit anderen tonghen end mit anderen lippen spreken tot dezem volcke, end zy zullen my oock alzo niet hooren, zegt de Heęr.

* Esa.28.c.11 Deu.28.e.49

22

Alzo dan zijn de [vrémde] tonghen tot eęnem teęken, niet den gheloouighen, ⁺ mer den ongheloouighen: de Prophecy auer niet den ongheloouighen, mer den gheloouighen.

+ E

23

Wanneęr nu de gansche Ghemeynte t’zamen te hoop quame, end spraken alle mit tonghen: dar quamen auer hénin slechte of ongheloouighe menschen, zolden zy niet zegghen, ghy raaßdet?

24

Zo zy auer alle propheteerden, end dar quame dan eęn ongheloouigh of slecht mensch hærin, die wurde van allen ghestraft, end van allen ghericht:

25

End alzo wurden de verborghenheyden zijns herten openbaer, end hy zolde alzo nederuallen op d’anghezicht, God anbidden, end verkondighen dat God waerachtlick in v zy.

26

Wat is het dan, broeders? Wanneęr ghy t’zamen kommet, heeft eęn ieghelick

[p. 300v]

van v eęnen Psalmm, heeft hy leęring, ⁺ heeft hy tong, heeft hy ontdecking, heeft hy wtlegghing: latet alles gheschiehen ter stichtinghe.

+ F

27

Het zy dat iemand mit tonghe spreeckt [dat gheschiehe] door tweę of op’t meęste dry, end dat by ghebœrten, end eęn legghe het wt.

28

Is’er auer gheęn wtleggher, zo zwijghe hy in der Ghemeynte, spreke auer zick zeluen end Gode.

29

Der Propheten auer latet tweę of dry spreken, ^* end de anderen latet onderscheyden.

* 1.Ioan.4.a.1

30

Zo auer eęn ontdecking gheschiedt eęnem anderen die dar byzitt, zo zwijghe de eęrste.

31

Want ghy konnet alle byzonder propheteren, op dat zy alle leęrnen, end alle vertroost werden.

32

End de gheęsten der Propheten zijn den Propheten onderworpen.

33

Want God is niet [eęn God] der verstooring, mer des vredes, ghelijck [ick leęre] in allen Ghemeynten der Heylighen.

34

^+* Uwe vrauwen latet zwijghen in den Ghemeynten: want het is hen niet verorloft dat zy spreken, mer moeten onderdanigh zijn: ^* ghelijckerwijß oock de Wet zegt.

+ G

* 1.Tim.2.d.12

* Gene.3.c.16 Ephes.5.e.22 Coloss.2.c.18 Tit.2.b.5 1.Pet.3.a.1

35

Willen zy auer wat leęrnen, zo latet ze t’huyß hœre mannen onderuraghen: want het is den vrauwen schandlick in der Ghemeynte te spreken.

36

Of is het word Godes van v wtghe-

[p. 301r]

kommen? of is het alleęn tot v toegekommen?

37

Zo zick iemand laett duncken, hy zy eęn Propheet of gheęstlick, die bekenne, wat ick v schrijue, want het zijn des Heęren gheboden.

38

Is auer iemand onwetigh, die zy onwetigh.

39

Daerom broeders, ijueret dat ghy propheteret, end weret niet mit tonghen te spreken.

40

Latet alles eęrbaerlick end ordentlick toegaen.