Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.xij.

1

VAn den ⁺ gheęstlicken auer, broeders, will ick niet dat ghy onwetigh zijt.

+ Of gheęstlicken [gauen] etc.

2

Ghy wetet, de wijle ghy Heydens waret, dat ghy tot den stommen afgoden, hoe ghy oock gheleydt wurdet, ⁺ hén ghinghet.

+ Of. hén gheuoert zijt

3

Daerom doe ick v kond, ^* dat niemand die dar door den Gheęst Godes spreeckt, zegt Iesum eęn veruloucksel te zijn: ^* end niemand kann zegghen Iesum eęnen Heęr te zijn, dan door den heylighen Gheęst.

* Marc.9.f.39

* Ioan.13.b.13 1.Corin.8.b.6 Philip.2.b.11

4

^‡ Dar zijn auer bedeęlinghen der gauen: auer dar is eęn Gheęst.

‡ Rom.12.b.6 1.Pet.4.b.10

5

End dar zijn bedeęlinghen der bedieninghen: auer dar is eęn Heęr.

6

End dar zijn bedeęlinghen der krach-

[p. 297r]

tigher werckinghen: auer dar is eęn God die dar krachtlick werckt alle dinghen in allen.

7

Eęnem ieghelicken auer werdt ghegheuen de openbaring des Gheęstes, ter nuttigheyt.

8

Want dezem werdt door den Gheęst ghegheuen te spreken van wijßheyt: eęnem anderen, te spreken van kennenschap, na dem zeluen Gheęst.

9

Eęnem anderen auer, het ghelooue in dem zeluen Gheęst: eęnem anderen, gauen der ghezondmakinghen in dem zeluen Gheęst.

10

⁺Eęnem anderen auer, krachten der krachtigher daden: eęnem anderen, Prophecy: eęnem anderen onderscheydinghen der gheęsten: eęnem anderen menigherley tonghen: eęnem anderen auer, wtlegghing der tonghen.

+ B

11

^* Dit auer alles werckt krachtlick de eęnighe end zelue Gheęst, ^‡ end bedeęlt eyghentlick eęnem ieghelicken ghelijckerwijß hy wil.

* Rom.12.a.3 b.6 Ephe.4.b.7

‡ 1.Cor.7.b.7 2.Cor.10.d.13

12

^* Want ghelijckerwijß het lijf eęn is, end heeft vele lidmaten: alle lidmaten auer eęnes lijfs, hoewel zy vele zijn, eęn lijf zijn: alzo oock Christus.

* Rom.12.a.4

13

Want wy zijn in eęnem Gheęst alle tot eęnem lijue ghedoopt: wy zijn Iœden, of Griecken, of dienstknechten, of vrije: end wy zijn alle tot eęnem Gheęst ⁺ ghedrenckt.

+ Of, ghelaaft

14

Want het lijf is niet eęn lidmaat, mer vele.

15

Of nu de voet zeyde: Ick bin gheęn hand, zo bin ick niet van dem lijue: is hy

[p. 297v]

daerom niet van dem lijue?

16

End of de oor zeyde, Ick bin gheęn oogh, zo bin ick niet van dem lijue: is zy daerom niet van dem lijue?

17

⁺Is het gansche lijf eęn oogh, waer is het ghehoor? is het gansche [lijf] het ghehoor, waer is de rœck?

+ C

18

Nu auer heeft God de lidmaten ghestelt, eęn ieghelick der zeluer in dem lijue, ghelijckerwijß hy ghewolt heeft.

19

Waren zy auer alle eęn lidmaat, waer zolde het lijf zijn?

20

Nu auer zijn der lidmaten wel vele, auer eęn lijf.

21

Eęn oogh auer kann niet zegghen tot der hand, Ick behouue dyner niet: of wederom het hoofd tot den voeten, Ick behouue uwer niet.

22

Ia veel meęr de lidmaten des lijfs die ons duncken de zwacksten zijn, zijn noodwendigh.

23

End die ons duncken de oneęrlicksten zijn am lijue, dezen legghen wy oueruloedigher eęr an: end onze schamelicke [lidmaten] hebben oueruloedigher verciering.

24

Auer onze eęrlicke behouuen’s niet: mer God heeft het lijf t’zamengeuought, end dem behouftighen [lidmate] oueruloedigher eęr ghegheuen:

25

Op dat dar gheęn spalting in dem lijue zy, mer dat de lidmaten vœr malckanderen ghelijcke zorgh draghen. ⁺

+ D

26

End het zy dat eęn lidmaat lijde, zo lijden alle de lidmaten mede: het zy dat eęn lidmaat heęrlich ghemaeckt werde,

[p. 298r]

zo verblijden zick alle de lidmaten mede.

27

^* Ghy auer zijt het lijf Christi end lidmaten vœr eęn deęl.

* Rom.12.b.5 Ephes.1.d.23 end .4.c.12 end .5.e.23 Colo.1.d.24

28

End God heeft dar zommighe ghestelt in der Ghemeynte, eęrstlick ^‡ Apostels, ten anderen Propheten, ten derden Leęrmeęsters, daerna krachtdadigheyden, daerna gauen ghezond te maken, behulplickheyden, regimenten, menigheyden der tonghen.

‡ Ephe 4.b.11

29

Zijn zy doch alle Apostels? zijn zy alle Propheten? zijn zy alle Leęrmeęsters? zijn zy alle krachtdadigheyden?

30

Hebben zy alle gauen ghezond te maken? spreken zy alle mit tonghen? zijn zy alle wtlegghers?

31

Yueret auer na den besten gauen, end ick wijze v noch eęnen trefflickeren wegh.