Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.xi.

[p. 295r]

1

⁺ ZIjt myne nauolghers, ghelijckerwijß oock ick Christi.

+ 1.Cor.4.d.16 Philip.3.d.17 1.Thes.1.b.6 2.Thes.3.b.9

2

Ick prijze v auer, broeders, dat ghy aller myner dinghen, ghedencket: end holdet de inzettinghen, ghelijckerwijß ick ze v ouerghegheuen heb.

3

Ick will auer dat ghy wetet, ^* dat Christus eęnes ieghelicken manns hoofd is: der vrauwen hoofd auer is de mann: Christus hoofd auer is God.

* Ephe.5.e.23

4

Eęn ieghelick mann die dar bidt, of propheteert, end [iet] op dem hoofde heeft, onteęrt zijn Hoofd:

5

Auer eęn ieghelicke vrauw die dar bidt of propheteert mit onghedecktem hoofde, onteęrt hœr hoofd: want het is euen zo veel, als ware zy gheschoren.

6

⁺Want zo eęn vrauw niet bedeckt werdt, zo werde zy oock afghekortt: ^* Is het auer leęlick dat eęn vrauw afghekortt of gheschoren zy, zo laet ze bedeckt werden.

+ B

* Deut.22.a.5

7

Eęn mann moet ia het hoofd niet bedecken, ^* nademmael hy eęn beeld end heęrlicheyt Godes is: eęn vrauw auer is eens manns heęrlicheyt.

* Ge.1.c.26.27 end .5.a.1 end .9.b.6 Colos.3.b.10

8

^‡ Want eęn mann is niet van eęner vrauwen, mer eęn vrauw van eęnem manne.

‡ Gen.2.a.8

9

Want oock eęn mann is niet gheschapen om der vrauwen willen, mer eęn vrauw om des manns willen.

10

(Hierom moet de vrauw eęn machtteęken op dem hoofde hebben om der ^* Enghelen willen.)

* Mala.2.b.7 Apoc.1.b.20

11

Nochtans zo is noch mann zonder vrauw, noch vrauw zonder mann in dem

[p. 295v]

Heęre.

12

⁺Want ghelijckerwijß de vrauw van dem manne is, alzo is oock de mann door de vrauw: auer alle dingk van Gode.

+ C

13

Richtet by v zeluen, of het voughlick is, dat eęn vrauw onbedeckt God bidde?

14

Of leęrt v oock niet de natuer zelue, dat het eęnem manne eęn oneęr is, zo hy langhaarigh is:

15

Eęner vrauwen auer eęn eęr, zo zy langhaarigh is? Want het lang haar is hœr tot eęnem bedecksel ghegheuen.

16

^* Zo auer iemand schijnt twistlustigh zijn, wy hebben zulckerley ghewoonheyt niet, de Ghemeynten Godes oock niet.

* 1.Tim.6.b.5

17

Dat ick auer dit anzegghe, prijze ick [v] niet, dat ghy niet tot dem, dat beter is, mer tot dem dat ærgher is, ⁺ t’zamen kommet.

+ D

18

Want eęrstlick, wanneęr ghy t’zamen kommet in der Ghemeynte, hoore ick dat dar spaltinghen onder v zijn, end eęnsdeęls ghelooue ick het.

19

^* Want dar moeten oock secten onder v zijn, ^‡ op dat de beproufden openbaer onder v werden.

* Matt.18.a.7

‡ 1.Ioan.2.c.19

20

Wanneęr ghy nu t’zamen te hoop kommet, zo is het niet des Heęren auendmael eten:

21

Want eęn ieghelick neemt te voren zijn eyghen auendmael onder dem eten: end de eęn is ia hongherigh, de ander auer droncken.

[p. 296r]

22

Hebbet ghy doch gheęne huyzen daer ghy eten end drincken konnet, of verachtet ghy de Ghemeynte Godes, ⁺ end beschamet die dar niets hebben? Wat zal ick v zegghen? zal ick v hierin prijzen? Ick prijze v niet.

+ E

23

Want ick heb van dem Heęre entfanghen, dat ick v oock ouerghegheuen heb, ^* dat de Heęr Iesus in der nacht, doe hy verraden ward, namm het brood,

* Matt.26.c.25 Mar.14.c.22 Luc.22.b.19

24

Danckte, end brack het, end zeyde: Nemet, etet: dit is mijn lijf, dat vœr v ghebroken werdt: Dit doet tot myner ghedachtenisse.

25

Deßghelijcken [namm hy] oock den drinckbeker na dem auendeten, end zeyde: Deze drinckbeker is het nieuwe ⁺ Testament in mynem bloede: Dit doet zo menighmael als ghy [den] drincken zullet, ⁺ tot myner ghedachtenisse.

+ of. Uerbond

+ F

26

Want zo menighmael ghy van dezem broode eten zullet, end van dezem drinckbeker drincken, zo ⁺ verkondighet den dood des Hęeren, ^* tot dat hy komme.

+ anders. verkondighet ghy

* Act.1.b.11

27

^‡ Daerom wie onwærdighlick van dezem broode etet, of van dem drinckbeker des Heęren drincket, die zal schuldigh zijn an dem lijue end dem bloede des Heęren.

‡ Ioan.6.f.51 g.63.64. end .12.c.27

28

^* Eęn mensch auer beprouue zick zeluen, end alzo ete hy van dem broode, end drincke van dem drinckbeker.

* Eccli.18.c.18 2.Cor.13.b.5

29

Want wie onwærdighlick eett of drinckt, die eett end drinckt zick zeluen het gherichte, ⁺ daermede dat hy niet onderscheydt het lijf des Heęren.

+ G

[p. 296v]

30

Hierom zijn dar vele zwacken end onghezonden onder v, end eęn goed deęl slapen.

31

^* Want zo wy ons zeluen onderscheydden, zo wurden wy gheęnßinns ghericht.

* Eccl.18.c.18.

32

Wanneęr wy auer ghericht werden, zo werden wy van dem Heęre ghetuchtight, op dat wy niet mit der wæreld verdommt werden.

33

Daerom, myne broeders, wanneęr ghy t’zamen kommet te eten, zo verwachtet malckanderen.

34

Honghert auer iemanden, die ete te huyß: op dat ghy niet tot eęnem gerichte t’zamenkommet. Het ander auer zal ick verordenen wanneęr ick komme.