Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.x.

1

ICk will auer niet, broeders, dat het v onkondigh zy ^* dat onze Uaders alle onder der wolcke waren, ^‡ end alle door de zeę doorghinghen.

* Exo.13.d.21 Deut.1.f.33 Num.9.c.18 2 Esd.9.c.12 d.19 Psal.78.b.14 end .105.d.39.

‡ Exo.14.c.22 Iosue.4.d.23 Psal.78.b.13

2

End wurden alle in Mosen ghedoopt mit der wolcke end mit der zeę.

3

^* End zy aten alle eęnerley gheęstlicke spijß:

* Exo.16.d.15

4

^‡ End droncken alle eęnerley gheęstlicken dranck: want zy droncken van der gheęstlicker Steęnrootsen die dar mede volgde: de Steęnrootß auer was Christus.

‡ Exod.17.b.6 Num.20.b.11 Psal.78.b.15

[p. 293v]

5

Auer an hœrer velen had God gheęn welgheuallen: ^* want zy wurden verslaghen in der woestijne.

* Nu.26.g.65

6

Dit is auer ons tot eęnem voorbeelde gheweeßt, ⁺ op dat wy ons niet laten lusten des boozes, ^* ghelijckerwijß oock zy lust hadden.

+ B

* Num.11.a.5 g.33 Psal.106.c.14

7

Werdet oock niet afgodendienaers, ghelijckerwijß hœrer zommighe: als gheschreuen is, ^* Het volck zettde zick neder te eten end te drincken, end stonden op te spelen.

* Exod.32.b.6

8

Oock latet ons niet hoereren ^* ghelijckerwijß hœrer zommighe hoereerden: end vielen op eęnen dagh dry end twintigh duyzend.

* Num.25.b.9 Psal.106.e.29

9

Latet ons oock Christum niet verzoucken, ^* ghelijckerwijß oock hœrer zommighe verzochten: end wurden van den slanghen vernielt.

* Num.21.b.6

10

⁺Murret oock niet, ^* ghelijckerwijß oock hœrer zommighe murreden: end wurden ommghebracht door den verdæruer.

+ C

* Exod.16.a.2 end .17.a.2 Num.14.f.37 Psal.106.d.25 Sap.1.c.11

11

Zulcks alles auer wederuoer hen tot eęnem voorbeelde: het is auer gheschreuen ons ter vermaninghe, op welcke de enden der eęwen kommen zijn.

12

Daerom wie zick laett duncken, hy sta, die zie toe, dat hy niet valle.

13

Dar heeft v noch gheęne, dan menschlicke verzoucking beuangen. ^* God auer is trauw, ^‡ die zal v niet laten verzocht werden bouen uwe vermoghen: mer zal oock beneuen der verzouckinghe eęn wtkommen maken, op dat ghy ze verdra-

* 1.The.5.d.24 1.Cor.1.b.8

‡ 2.Petr.2.b.9

[p. 294r]

ghen moghet.

14

Daerom myne gheliefde, vliehet van dem afgodsdienst.

15

⁺Als mit den verstandinghen spreeck ick: richtet ghy wat ick zeg.

+ D

16

De drinckbeker der zeghening, den wy zeghenen, is hy niet de ghemeynschap des bloeds Christi? Het brood dat wy breken, is het niet de ghemeynschap des lijfs Christi?

17

Want wy vele zijn eęn brood [end] eęn lijf: want wy zijn alle eęnes broods deęlachtigh.

18

Anziet Israel na dem vleęsche: die de offers eten, zijn die niet mededeęlachtigh des altaers?

19

^+* Wat zeg ick nu? dat de afgod iet zy? of dat de afgodsoffer iet zy? [Neęn].

+ E

* 1.Cor.8.a.4

20

Mer [ick zeg] dat de Heydens wat zy offeren, dat offeren zy ^* den duuelen end niet Gode: Ick will auer niet dat ghy in der ghemeynschap der duuelen zijt.

* Leuit.17.b.7 Deut.32.c.17

21

Ghy konnet niet drincken des Heęren beker, end der duuelen beker: ghy konnet niet medeęlachtigh zijn des Heęren dissches end der duuelen dissches.

22

Of willen wy den Heęr tærghen? zijn wy doch stærcker dan hy?

23

^* My is alles verorloft, auer het is niet alles nuttigh: my is alles verorloft, auer het sticht niet alles.

* 1.Cor.6.c.12 Ecc.37.d.29

24

^* Niemand zoucke dat zijn eyghen is, mer eęn ieghelick [zoucke] dat

* Philip.2.a.4 1.Cor.13.b.5

[p. 294v]

eęnes anderen is.

25

⁺Alles wat verkocht werdt op dem vleęschmarckt, dat etet zonder beuraghen om der consciency willen.

+ F

26

^* Want de ærde is des Heęren, end de volheyt der zeluer.

* Psal.24.a.1 end .50.c.12 Exod.19.a.5

27

Zo v auer iemand van den ongheloouighen noodet, end ghy willet gaen, ^* zo etet alles wat v voorghestelt werdt zonder beuraghen om der consciency willen.

* Luc.10.a.7

28

Zo auer iemand tot v zegghe, Dit is afgodsoffer: zo etet niet, om deß willen die het te kennen ghegheuen heeft, ^* end der consciency willen. Want de ærde is des Heęren, end de volheyt der zeluer.

* 1.Cor.8.b.7

29

Ick zeg auer van der consciency, niet dyner eyghener, mer des anderen. Want waerom werdt mijn vrijheyt ghericht van eęnes anderen consciency?

30

⁺End zo ick mit danckbaerheyt gheniete, wat werde ick ghelastert ouer dem, ^* waervœr ick danck zeg?

+ G

* Rom.14.b.6 1.Tim.4.a.3

31

Het zy dan dat ghy etet, het zy dat ghy drincket, of iet [anders] doet, doet het alles tot Godes eęre.

32

Zijt onanstootigh oock den Iœden end den Griecken, end der Ghemeynte Godes:

33

Ghelijckerwijß oock ick eęnem ieghelicken in allerley behaghe, end zoucke niet wat my zeluen, mer wat velen nuttigh is, op dat zy zaligh werden.