Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.ix.

1

BIn ick niet eęn Apostel? bin ick niet vrij? ^* heb ick niet onzen Heęre Iesum Christum ghezien? zijt ghy niet mijn werck in dem Heęre?

* Act.9.a.3.c.17 1.Cor.15.a.8 2.Cor.12.a.2

2

Bin ick anderen gheęn Apostel, zo bin ick het doch v: want de zeghel mijns Apostelschaps zijt ghy in dem Heęre.

3

Mijn verandwording by den, die my onderuraghen, is deze,

4

^* Hebben wy doch niet macht te eten end te drincken?

* 1.Cor.9.b.14 1.Thess.2.b.7 2.Thes.3.c.9

5

Hebben wy niet macht eęn zuster ten

[p. 292r]

wijue mede ommhær te leyden, gelijck oock de anderen Apostels, end de broeders des Heęren, ^* end Cephas?

* Matt.8.b.14

6

Of hebben alleęn ick end Barnabas gheęn macht werckvrij te zijn?

7

Wie krijght dar ymmermeęr op zyne eyghene besoldinghen? wie plantt eęnen wijngaerd, end eett niet van zyner vrucht? of wie weydt eęn kudde, end eett niet van der melck des kudden?

8

Spreeck ick zulcks op menschen wijze? of zegt niet zulcks oock de Wet?

9

⁺Want in der Wet Mosi is gheschreuen, ^* Du zalt dem dorschenden osse den muyl niet toebinden. Zorght God vœr de ossen?

+ B

* Deut.25.a.4 1.Tim.5.c.18

10

Of zegt hy’t ganschlick om onzent willen? want het is om onzent willen gheschreuen, dat die dar plought, op hope ploughen moet: end die dar dorscht, op hope [dorsschen moet] dat hy zyner hope deęlachtigh werde.

11

^* Zo wy v het gheęstlicke hebben ghezayt, is het eęn groot dingk dat wy uwe vleęschlicke zullen mayen?

* Rom.15.f.27 Gal.6.b.6

12

Zo anderen dezer macht an v deęlachtigh zijn, waerom niet veel meęr wy? ^* Auer wy hebben zulcker macht niet ghebruyckt: mer wy verdraghen allerley, op dat wy dem Euangelio Christi gheęn hinderniß maeckten.

* Act.20.g.33 2.Cor.11.b.9 end .12.c.13

13

^* Wetet ghy niet dat die de tempelhandelinghen doen, van der tempelhandelinghe eten? end die by dem altaer stadelick staen, des altaers ghenieten?

* Deut.18.a.1

[p. 292v]

14

^* Alzo heeft oock de Heęr verordent dat die het Euangelium verkondighen, van dem Euangelio zullen leuen.

* Leuit.19.c.13 Deu.24.c.14 end .25.a.4 Tob.4.c.15 Matt.10.a.10 Luc.10.b.7 1.Timo.5.c.18

15

Ick auer heb dezer gheęn ghebruyckt. Ick heb oock daerom hiervan niet gheschreuen, ⁺ op dat het mit my alzo gheschiehen zolde: want het ware my lieuer, ick storue, dan dat my iemand mynen romm zolde vernietighen.

+ C

16

Want hoewel ick euangelizere, zo heb ick deß gheęnen romm: ^* want noodwendigheyt is my opghelegt. End weę my zo ick niet euangelizere.

* Rom.1.b.14

17

Doe ick dit gærne, zo heb ick loon: doe ick het auer ongærne, zo is my doch de wtdeęling vertrauwt.

18

Wat loon heb ick dan? dat ick in d’euangelizeren het Euangelium Christi kostlooß stelle, op dat ick myner macht niet mißbruycke in dem Euangelio.

19

Want hoewel ick vrij was van allen, zo heb ick my zeluen allen tot dienstknecht ghemaeckt, op dat ick’er te meęr ghewonne.

20

^* End den Iœden bin ick gheworden als ęen Iœde, op dat ick de Iœden ghewonne: end den, die onder der Wet zijn, ⁺ als onder der Wet, op dat ick die onder der Wet zijn, ghewonne,

* Act.16.a.3 end .18.e.18 end .21.d.23

+ D

21

^* Den Wetloozen als Wetlooß (hoewel ick Gode niet Wetlooß bin, mer Christo Wetplichtigh:) op dat ick de Wetloozen ghewonne.

* Gal.2.a.3

22

^* Den zwacken bin ick gheworden als eęn die dar zwack is, op dat ick de

* Rom.15.a.1 Gal.6.a.1

[p. 293r]

zwacken ghewonne. ^* Ick bin eęnem ieghelicken allerley gheworden, op dat ick alleßinns doch zommige zaligh maeckte

* 1.Cor.10.g.33

23

Zulcks auer doe ick om des Euangelij willen, op dat ick des zeluen mededeęlachtigh werde.

24

Wetet ghy niet dat die in der rennbane loopen, die loopen wel alle, auer eęn behaalt den kleynood? Loopet nu alzo, dat ghy en hén grijpet.

25

^* End eęn ieghelick die dar kampt, entholdt zick alles dings. Zy wel daerom, op dat zy eęn verdærflicke kroon entfanghen: wy auer ^* eęn onuerdærflicke.

* 2.Tim.2.a.4

* 2.Tim.4.b.8 1.Pet.5.b.4

26

Ick auer loope alzo, niet als onghewißlick: ick kampe alzo, niet als eęn die de lucht slaet:

27

Mer ick temme mijn lijf, end bring het in dienstbaerheyt, op dat ick niet den anderen predike, end zelue verwærplick werde.