Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.iij.

1

ENd ick, broeders, konde niet mit v spreken, als mit gheęstlicken, mer als mit vleęschlicken, als mit kindischen in Christo.

2

^* Melck heb ick v te drincken ghegheuen, end niet vaste spijß: want ghy vermochtet ze noch niet, ia oock noch nu vermoghet ghy ze niet: want ghy zijt noch vleęschlick.

* Hebr.5.d.12 1.Pet.2.a.2

3

^* Want nademmael ijuer end twisting end tweędracht onder v zijn, zijt ghy niet vleęschlick, end wandelet ghy niet na menschlicker wijze?

* 1.Cor.1.b.10 Gal.5.c.19 Iaco.3.d.16

4

Want zo de eęne zegt, ^* Ick bin Pauli: de ander auer, Ick Apollo: zijt ghy niet vleęschlick?

* 1.Cor.1.b.11

5

Wie is nu Paulus, end wie is ^* Apollos, anders dan dienaers door welcke ghy zijt gheloouigh gheworden, end dit als eęnem ieghelicken de Heęr ghegheuen heeft?

* Act.18.f.24 1.Cor.1.b.11 end .16.b.12

6

⁺Ick heb gheplantt, ^* Apollos heeft begoten, auer God heeft den waßdomm ghegheuen.

+ B

* Act.18.g.28 end .19.a.1

[p. 285r]

7

Zo is nu noch die dar plantt, noch die dar beghiett iet, mer God die den waßdomm gheeft.

8

Die auer plantt, end die dar beghiett zijn eęn. (^* Eęn ieghelick nochtans zal zynen eyghenen loon entfanghen na zynem eyghenen arbeyd.)

* Psal.62.d.13 Iere.17.b.10 end .32.c.19 Mat.16.d.27 Rom.2.a.6 end .14.c.12. 2.Cor.5.b.10 Gal.6.a.5 Apoc.2.f.23 end .22.c.12

9

Want wy zijn Godes ^‡ medewerckers: ghy zijt Godes ackerghebauw, ^* Godes huyßtimmering.

‡ 2.Cor.6.a.1

* Ephe.2.d.19

10

Ick van Godes ghenade die my ghegheuen is, heb eęnen grond ghelegt als eęn wijß bauwmeęster: eęn ander auer bauwt daerop. Eęn ieghelick auer zie toe hoe hy daerop bauwe.

11

⁺Want eęnen anderen grond kann niemand legghen, behaluen den ^* die dar ghelegt is, welcker is Iesus Christus.

+ C

* Esa.28.d.16 Matt.16.c.18

12

Zo auer iemand op dezen grond bauwt, gold, ziluer, kostelick ghesteęnte, hold, hoy, stoppel:

13

Zo zal eęnes ieghelicken werck openbaer werden: ^* want de dagh zal’t klaar maken, want het werdt im vuere ontdeckt. End welckerley eęnes ieghelicken werck zy, zal het vuer beprouuen.

* Esa.48.b.10.1.Petr.1.b.7 end .4.c.12.

14

Blijft iemands werck, dat hy daerop ghetimmert heeft, zo zal ⁺ het loon entfanghen.

+ Of: hy

15

Werdt auer iemands werck verbrandt, zo zal ⁺ het schade lijden: hy zelue auer zal beholden werden, alzo nochtans als door vuer.

+ Of: hy

16

^* Wetet ghy niet dat ghy Godes tempel zijt, end dat de Gheęst Godes in v woont?

* 1.Cor.6.d.19 2.Cor.6.d.16 Hebr.3.b.6 1.Petr.2.a.5

[p. 285v]

17

⁺Zo iemand den tempel Godes schendet, dezen zal God schenden: want de tempel Godes is heyligh, welcker ghy zijt

+ D

18

^* Niemand bedrieghe zick zeluen: Zo zick iemand onder v laet duncken wijß zijn in der wæreld, die werde dwaaß, op dat hy wijß werde.

* Pro.3.a.7 Esa.5.e.21

19

Want dezer wæreld wijßheyt is dwaaßheyt by Gode. Want dar is gheschreuen, ^* De wijzen beuangt hy in hœrer ærghlistigheyt.

* Iob.5.b.13.

20

End wederom ^* De Heęr kennt der wijzen ouerlegghinghen dat zy ijdel zijn.

* Psal.94.b.11

21

Daerom niemand romme zick in menschen. Want het is alles uwe:

22

Het zy Paulus, het zy Apollos, het zy Cephas, het zy de wæreld, het zy het leuen, het zy de dood, het zy het teghenwordighe of het toekomstighe: het is alles uwe:

23

Ghy auer zijt Christi, Christus auer is Godes.