Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.ij.

1

ENd ick broeders, doe ick tot v quam, ^* quam ick niet mit wtneemlicken worden of wijßheyt v te verkondighen het ghetuyghniß Godes.

* 1.Cor.1.c.15 end .2.a.4

2

Want ick achtde [my] niet onder v, dat ick iet wiste, dan Iesum Christum, end den zeluen ghecruycight.

3

^* End ick was by v mit zwackheyt, end mit vreęzen, end mit grooter beuinghe.

* Act.18.a.1

4

End mijn word, end mijn prediking was niet ^* in wijßmakighen worden menschlicker wijßheyt, mer in bewijzinghe des Gheęstes end der kracht:

* 1.Cor.1.c.15 end .2.a.1 2.Pet.1.c.16

[p. 284r]

5

Op dat uwe ghelooue ⁺ besta, niet op menschen wijßheyt, mer op Godes kracht

+ Gr. zy niet in

6

^+* Uan eęner wijßheyt auer spreken wy onder den volkommenen, end niet van ^* eęner wijßheyt dezer wæreld, noch der vorsten dezer wæreld, ^‡ die dar vernietight werden.

+ B

* Iob.28.d.21

* Iacob.3.d.15

‡ 1.cor.15.c.24

7

Mer wy spreken van eęner wijßheyt Godes in verborghenheyt, welcke verholen is, die God te voren verordent heeft voor den eęwen t’onzer heęrlicheyt,

8

^* Welcke gheęn van den vorsten dezer wæreld bekennt heeft. ^‡ Want zo zy ze bekennt hadden, zo hadden zy den Heęr der heęrlicheyt niet ghecruycight.

* Matt.11.d.25 Ioan.7.g.48 2.Cor.3.c.14

‡ Ioan.16.a.3 Act.3.c.17 end .13.d.27 1.Tim.1.c.13

9

Mer [wy spreken] ghelijck gheschreuen is ^* dat gheęn oogh ghezien heeft, end gheęn oor ghehoort heeft, ⁺ end in gheęnes menschen hert opgheklommen is, dat God bereydt heeft den, die hem lief hebben.

* Esa.64.a.4

+ C

10

^* Ons auer heeft ze God ontdeckt door zynen Gheęst. ^‡ Want de Gheęst onderzouckt alle dinghen, oock de diepten Godes.

* Matt.13.b.11 2.Cor.3.d.16

‡ Sap.7.c.23

11

Want welcker mensch weet wat ⁺ des menschen is, dan de Gheęst des menschen die in hem is? alzo weet oock niemand wat ⁺ Godes is, dan de Gheęst Godes.

+ of, in dem mensche

+ of, in Gode

12

Wy auer hebben niet entfanghen den Gheęst der wæreld, mer den Gheęst die wt Gode is: op dat wy weten wat ons van Gode gheschoncken is:

13

Welck wy oock spreken ^* niet mit gheleęrden worden menschlicker wijßheyt, ⁺ mer mit gheleęrden [worden] des heylighen Gheęstes: end ⁺ verghelijcken

* 1.Cor.1.c.15 end .2.a.4 2.Petr.1.c.16

+ D

+ of, richten

[p. 284v]

gheęstlicke dinghen mit gheęstlicken.

14

^* Eęn ⁺ natuerlick mensch auer vaatt niet wat des Gheęstes Godes is: want het is hem eęn dwaaßheyt, oock kann hy’t niet bekennen, om dat het gheęstlicker wijze ghericht werdt.

* Rom.8.a.5

+ Gr. zielicke, of. die vernuft volght.

15

^* De gheęstlicke auer richt alles, end hy werdt van niemanden ghericht.

* Pro.28.a.5

16

^* Want wie heeft des Heęren zinn bekennt, die hem onderwijzen magh? wy auer hebben Christus zinn.

* Esa.40.c.13 Rom.11.d.34 Sap.9.c.13