Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.xiij.

1

EEn ^* ieghelicke ziel zy onderdanigh den ouerighen Machten. ^‡ Want dar is gheęn Macht dan van Gode: de Machten auer die dar zijn, zijn van Gode verordent.

* Tit.3.a.1. 1.Pet.2.c.13.

‡ Sap.6.a.4

[p. 277r]

2

Derhaluen zo wie der Macht wederstaet, die wederstaet Godes ordeninghe: die auer wederstaen, zullen ouer zick zeluen eęn ghericht entfanghen.

3

Want de Ouerheyden zijn niet der goeder, mer der quader wercken haluen te vreęzen. Wilt du dy auer niet vreęzen voor der Macht? zo doe dat goed is, end du zalt prijß van hœr hebben.

4

⁺Want zy is Godes dienærsse, dy ten goede. Doest du auer dat quaad is, zo vreęß dy. Want zy draeght het zwærd niet te vergheefs: want zy is Godes dienærsse, eęn wrækersse ter toornigheyt ouer den, die quaad bedrijft.

+ B

5

Daerom moet men onderdanigh zijn niet alleęnlick om des toorns willen, mer oock om der consciency willen.

6

Want oock hierom betalet ghy beschattinghen: want zy zijn Godes dienaers, die hiertoe vast anholden.

7

^* Zo betalet dan eęnem ieghelicken wat ghy schuldigh zijt: de beschatting, dem de beschatting [behoort]: den toll, dem de toll [behoort]: de vreęß, dem de vreęß [behoort]: de eęrbieding, dem de eęrbieding [behoort].

* Mat.22.b.21

8

Zijt niemanden niets schuldigh, dan alleęnlick dat ghy malckanderen liefhebbet. ^{+ *} Want wie den anderen lief heeft, die heeft de Wet veruult.

+ C

* Gal.5.b.14 1.Tim.1.a.5

9

Want dit, ^‡ Du zalt niet echtbreken. Du zalt niet doodslaen, Du zalt niet stelen, Du zalt niet valschlick tuygen Du zalt niet begæren: end zo dar eęnigh ander ghebod is, dat werdt in dezem worde als in eęner

‡ Ex.20.c.14 Deu.5.b.18 Mat.19.c.18

[p. 277v]

hoofdsomme begrepen naemlick, ^* Du zalt liefhebben dynen naesten als dy zeluen.

* Leu.19.d.17 Matt.22.d.38 Mar 12.c.31 Gal.5.b.14 Iacob.2.b.8

10

De liefde doet dem naesten gheęn quaad. ^‡ Zo is nu de liefde der Wet veruulling.

‡ 1.Tim.1.a.5

11

End dit [zullen wy waernemen], ^* dewijl wy weten de ghetijdigheyt, dat het nu eęn vre is, dat wy vam slape opstaen. ⁺ Want de zaligheyt is ons nu naher, dan doe wy gheloofden.

* Thess.15.a.6 Ephe.5.c.14

+ D

12

De nacht is voorhén ghegaen, de dagh auer is hærby kommen. ^‡ Zo latet ons nu aflegghen de wercken der duysterniß, end andoen de wapens des lichtes.

‡ Coloss.3.b.8

13

Latet ons eęrbaerlick wandelen als im daghe: ^* niet in brasseryen end dronckenschappen: ^‡ niet in lustbedden end ⁺ dærtelheyden: ^* niet in twist end ijuer:

* Luc.21.g.31 1.Thess.5.b.6

‡ 1.Cor.6.b.10 Ephe.5.b.5.

+ Of. gheylheyden.

* Iaco.3.c.14

14

^‡ Mer trecket an den Heęre Iesum Christum: ^* end doet gheęn verzorghing des vleęsches tot lusten.

‡ Gal.5.c.16.

* 1.Pet.2.b.11