Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Capp.xij.

1

ICk vermane v dan, broeders, door de erbarminghen Godes ^* dat ghy uwe lijuen begheuet tot eęnem leuendighen, heylighen end Gode welgheuallighen offer, [welcker is] uwe redelicke Godsdienst.

* 1.Petr.2.a.5

2

^* End werdet niet ghelijckformigh dezer wæreld, mer werdet verstelt door vernieuwing uwes ghemoeds, op dat

* 1.Ioa.2.b.15

[p. 276r]

^* ghy beprouuet welcke dar zy de wille Godes, wat dar goed, end welgheualligh, end volkommen zy.

* Ephes.5.d.17 1.Thes.4.a.3

3

Want ick zeg door de ghenade die my ghegheuen is, eęnem ieghelicken onder v, dat ^* niemand hoogher gheuoele, dan het behoorlick is te gheuoelen: mer dat hy gheuoele dat hy matigh zy, ^* eęn ieghelick na dem hem God wtghedeęlt heeft de mate des gheloofs.

* Eccli 3.c.19.21

* 1.Cor.12.b.11 Ephes.4.b.7

4

^+* Want ghelijckerwijß wy in eęnem lijue vele lidmaten hebben, auer alle lidmaten niet eęnerley wercking hebben:

+ B

* 1.Co..12.b.12

5

^* Alzo zijn wy vele eęn lijf in Christo: auer onder malckanderen is de eęn des anderen lidmaat:

* 1.Cor.12.d.27 Ephes.1.d.23 end .4.d.16 end .5.e.23. Colo.1.d 24

6

^‡ Hebben nochtans verscheyden gauen na der ghenaden die ons ghegheuen is:

‡ 1.Cor.12.a.4 2.Cor.10.d.13 1.Pet.4.b.10

7

Het zy ^* Prophecy, na der ghelijckmatigheyt des gheloofs: het zy bediening in dem bedienen: het zy die dar leęrt in der leęre.

* 1.Cor.12.a.2

8

Het zy die dar vermaent, in der vermaninghe: ^* die eęn wtgheuer is, in eęnuoldigheyt: die eęn voorstander is in benærstinghe: die barmhertigheyt bewijßt ^‡ in vroylickheyt.

* Matt.6.a.3

‡ Deut.15.a.7 2.Cor.9.b.7

9

⁺De liefde zy onbeueynßt. ^* Hatet het quaad: hanghet dem goeden an.

+ C

* Psal.97.d 9 Amos.5.d.15

10

^‡ Zijt door broederlicke liefde tot malckanderen natuerlick gheneyght: ^* Uoorkommet malckanderen mit eęrbiedinghe.

‡ Ephe.4.a.3 Hebr.13.a.1 1.Petr.11 d.22 end 2.c.17

* Philip.2.a.3 1.Petr.5.b.5

11

Zijt niet traagh in der benærstinghe: Zijt vuerigh in dem gheest: ^‡ Dienet der tijd:

‡ Ephe.5.d.16 Colo.4.a.5

[p. 276v]

12

^* Zijt vroylick in der hope: ^‡ Gheduldigh in der verdruckinghe. ^* Anholdet in dem ghebede.

* Rom.15.c.13

‡ Hebr.12.a.1

* Luc.18.a.1. Ephes.6.c.18 Col.4.a.2 1.Thes.5.c.17

13

^‡ Nemet v der Heylighen nooddurftigheyden an. ^* Iaghet der gastlieuigheyt na.

‡ 1.Cor.16.a.1

* Hebr.13.a.2 1.Petr.4.b.9

14

^‡ Zeghenet die v veruolghin, zeghenet end veruloucket niet.

‡ Mat.5.g.44 1.Cor.4.c.13

15

Uerurœghet v mit den vroylicken, end weęnet mit den weęnenden.

16

^* Hebbet eęnerley gheuoelen onder malckanderen. ^‡ Zijt niet na hooghen dinghen ghezinnt, mer begheuet v tot den nederighen. Zijt niet klouckzinnigh by v zeluen.

* Rom.15.b.5 1 Cor.1.b.9 Philip.2.a.2 end .3.d.16 1.Petr.3.b.8

‡ Prouer.3.a.7 Esa.5.e.21

17

^+* Uergheldet niemanden quaad vœr quaad. ^‡ Benærstighet v deß dat eęrlick is voor allen menschen.

+ D

* Pro.20.c.22 Matt.5.f.39 1.Cor.6.b.7 1.Thes.5.c.15

‡ 2.Cor.8.d.21 1.Petr.2.b.12

18

^* Is het moghelick, zo veel an v is, hebbet vrede mit allen menschen.

* heb.12.d.14

19

^‡ Wræket v zeluen niet, gheliefde, mer gheuet ruym dem toorne. Want dar is gheschreuen: ^* De wrake is mijn, ick zal’t verghelden, zegt de Heęr.

‡ Eccli.28.a.1 Luc.6.d.29

* Deu.32.e.35 Hebr.10.f.30 Eccl.28.a 1

20

^‡ Zo dan dynem viand honghert, zo spijß hem: dorst hem, zo gheef hem te drincken. Want wanneęr du dit doest, zo zalt du vuerighe kolen op zijn hoofd zamelen.

‡ Pro.25.c.21

21

Laet dy het quaad niet ouerwinnen: mer oeuerwinn het quaad mit dem goeden.