Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.x.

1

BRoeders, mijns herten welgheualligheyt end het ærnstlick bidden dat ick doe tot Gode vœr Israel, is ter zaligheyt.

2

Want ick gheue hen deß tuyghniß ^* dat zy Godes ijuer hebben, auer niet mit verstande.

* Rom.9.g.31 Gal.4.c.17.

3

Want dewijl zy niet bekennen de gherechtigheyt Godes, end zoucken hœr eyghen gherechtigheyt te beuestighen, zo zijn zy der gherechtigheyt Godes niet onderdanigh gheweeßt.

4

^* Want Christus is der Wet ende, ter gherechtigheyt eęnem ieghelicken die dar ghelooft.

* Act.13.f.38 2.Cor.3.c.13 Gal.3.d.24 Matt.5.c.17

5

Want Moses schrijft van der gherechtigheyt die wt der Wet is, ^* Dat eęn mensch die dit ghedaen zal hebben, daerin leuen zal.

* Leuit.18.a.5 Ezech.20.b.11 Gal.3.b.12

6

Auer de gherechtigheyt die wt dem ghelooue is, spreeckt alzo: ^* Zeg niet in dynem herten, ⁺ Wie zal hénop varen in den hemel? dat is Christum van bouen

* Deut.30.c.12

+ B

[p. 273r]

hæraf bringhen. ⁺

+ B

7

Of, wie zal hénaf dalen in den afgrond? dat is Christum van den dooden weder hær bringhen.

8

Mer wat zegt ⁺ zy? Het word is naby dy in dynem monde, end in dynem herten: dit is het word des gheloofs dat wy prediken.

+ of, de Schrift

9

Want zo du mit dynem monde belijdest den Heęre Iesum, end gheloouest in dynem herten dat God hem opgheweckt heeft van den dooden, zo zalt du zaligh werden.

10

Want mit dem herten ghelooft men ter gherechtigheyt, mit dem monde auer belijdt men ter zaligheyt.

11

Want de Schrift zegt: ^* Zo wie in hem ghelooft, die zal niet beschaemt werden.

* Esa.28.d.16 Rom.9.g.33

12

Want dar is gheęn onderscheyd tusschen Iœde end Griecke: want dar is eęn Heęr aller [menschen], rijck ouer alle die hem anroupen. ⁺

+ C

13

^* Want zo wie den naem des Heęren zal anroupen, die zal zaligh werden.

* Ioel.2.g.32 Act.2.c.21

14

Hoe zullen zy nu anroupen in welcken zy niet ghelooft hebben? Hoe zullen zy auer gheloouen, van welckem zy niet ghehoort hebben? Hoe zullen zy auer hooren zonder prediker?

15

Hoe zullen zy auer prediken zo zy niet wtghezonden werden? ghelijckerwijß gheschreuen is: ^* Hoe lieflick zijn de voeten der, die vrede euangelizeren, der, die het goede euangelizeren.

* Esa.52.b.7 Nahum.1.d.15

16

Auer zy hebben niet alle dem Euan-

[p. 273v]

gelio ghehoor ghegheuen. Want Esaias zegt: ^* Heęr, wie heeft onzem ⁺ prediken ghelooft?

* Esa.53.a.1 Ioan.12.f.38

+ Gr. ghehoore

17

⁺Zo is dan het ghelooue wt dem ghehoore: het ghehoor auer door het word Godes.

+ D

18

Mer ick zeg, Hebben zy het doch niet ghehoort? ymmers ^* ouer alle ærdrijck is wtghegaen hœr gheluyd, end tot an het ende des ærdbodems hœre worden.

* Psal.19.a.5

19

Ick zeg auer, Heeft het doch Israel niet ghekennt? Eęrstlick zegt Moses, ^* Ick zal v verwecken tot ijuer door eęn volck dat gheęn volck is, door eęn dwaaß volck zal ick v vertoornen.

* Deut.32.c.21 Iere.15.c.14

20

Esaias auer is koen, end zegt: ^* Ick bin vonden van den, die my niet zochten, ick bin schijnlick gheworden den, die niet na my vraeghden.

* Esa.65.a.1

21

Tot Israel auer zegt hy: ^* Den ganschen dagh heb ick myne handen wtghestreckt tot dem volcke dat ⁺ onghezegghelick end wedersprekigh is.

* Esa.65.a.2

+ Of, onghehoorzaem