Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.vij.

1

OF wetet ghy niet broeders (want ick spreeck mit den, die kenners der Wet zijn) dat de Wet heęrschet ouer den mensch, zo lang als ⁺ zy leeft?

+ Of, hy

2

^* Want eęn vrauw die onder dem manne is, is dem leuenden manne verbonden door de Wet: wanneęr auer de man stærft, zo is zy loß van der Wet des manns.

* 1.Cor.7.g.39

3

^* Derhaluen zo zy eęnem anderen manne ghewerdet, dewijl de mann noch leeft, zo zal zy eęn echtbrekersche ghescholden

* Matt.5.e.32

[p. 267v]

werden. Zo auer de mann stærft, zo is zy vrij van der Wet, dat zy niet eęn echtbrekerscher is, hoewel zy eęnem anderen manne gheworden is.

4

Alzo oock ghy myne broeders, ^* zijt ghedoodt der Wet door het lijf Christi, op dat ghy eęnem anderen ghewerdet, naemlick dem, die wt den dooden opgheweckt is, op dat wy Gode vrucht bringhen.

* Gal.2.d.20 1.Thes.5.b.10 1.Pet.4.a.2

5

Want doe wy in dem vleęsche waren doe waren de zondighe beweghinghen, welcke door de Wet zijn, krachtdadigh in onzen lidmaten, dem dood vrucht te bringhen.

6

⁺Nu auer zijn wy van der Wet entledight, end hœr afghestoruen in welcker wy gheholden wurden: op dat wy dienen in nieuwigheyt des Gheęstes, end niet in oldheyt der letter.

+ B

7

Wat zullen wy dan zegghen? Is de Wet zonde? Het zy verr. ^* Auer de zonde kende ick niet, dan door de Wet. Want oock van der lust zolde ick niet gheweten hebben, hadde de Wet niet ghezegt: ^* Du zalt dy niet laten ghelusten.

* Rom.3.c.20 Heb.7.c.18

* Exo.20.c.17 Deut.5.c.21

8

^‡ Doe nam auer de zonde eęn oorzaeck door het Ghebod, end werckte in my allerley lust. Want zonder Wet is de zonde dood.

‡ Ioa.15.d.22 Rom.4.c.15 end 5.d.20 Gal.3.c.19

9

Ick auer leefde voormaels zonder Wet: doe auer het Ghebod quam, ward de zonde wederleuendigh:

10

Ick auer starf: end het beuand zick dat het Ghebod my tot eęnem dood ward,

[p. 268r]

dat my doch tot eęnem leuen [ghegheuen] was.

11

⁺Want de zonde nam eęn oorzaeck door het Ghebod, end verleydde my, end doodde my door het zelue.

+ C

12

^* De Wet dan is ia heyligh, end het Ghebod heyligh end oprecht end goed.

* 1.Tim.1.b.8 Psal.19.c.8

13

Is dan dat dar goed is, my eęn dood gheworden? Het zy verr: Auer de zonde: op dat zy schene eęn zonde die my door het goed den dood werckt, op dat de zonde wurde bouen maten zondigh door het Ghebod.

14

Want wy weten dat de Wet gheęstlick is, ick auer bin vleęschlick, ^* onder de zonde verkocht.

* Esa.52.a.3

15

Want ick ⁺ weet niet wat ick doe: ^* want ick doe niet dat ick will, mer dat ick hate, dat doe ick.

+ Of, bewillige

* Gal.5.c.17

16

Zo ick auer dat doe, dat ick niet wil, zo bestemme ick de Wet dat zy goed zy.

17

Zo doe ick nu het zelue niet, mer de zonde die in my woont.

18

^+* Want ick weet dat in my, dat is, in mynem vleęsche gheęn goed woont. Want het willen is wel by my: auer het volbringhen des goedes vinde ick niet.

+ D

* Gene.6.b.5 end .8.d.21

19

Want het goed dat ick will, doe ick niet: mer het quaad dat ick niet will, dat doe ick.

20

Zo ick auer doe dat ick niet will, zo doe ick nu het zelue niet, mer de zonde die in my woont.

21

Zo vinde ick nu de Wet, als ick

[p. 268v]

goed doen will, dat het quaad my anhangt.

22

Want ick heb lust an Godes Wet na dem inwendighen mensche.

23

^* Ick zie auer eęn andere Wet in mynen lidmaten, die dar wederstrijdt der Wet in mynem ghemoede, end my gheuanghen maeckt der zonde Wet, die in mynen lidmaten is.

* Gal.5.c.17

24

(Ick ellendigh mensch, wy zal my verlossen van dem lijue dezes doods?

25

Ick dancke Gode door Iesum Christum onzen Heęre.) Zo diene ick dan zelue wel mit dem ghemoede der Wet Godes, auer mit dem vleęsche der Wet der zonde.