Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.vj.

1

VUat zullen wy dan zegghen? zullen wy in der zonde volhærden, op dat de ghenade vermeęret werde?

2

Het zy verr. Hoe zullen wy voordan in der zonde leuen, die wy der zeluer afghestoruen zijn?

3

Of wetet ghy niet ^* dat wy alle die in Christum Iesum ghedoopt zijn, in zynen dood ghedoopt zijn?

* Gal.3.d.27

4

^* Zo zijn wy dan mit hem begrauen door den Doop in den dood: op dat, ghelijckerwijß Christus opgheweckt is van den dooden door de heęrlicheyt des Uaders, wy oock alzo ^* in eęnem nieuwen leuen wandelen.

* Col.2.c.12

* Ephe.4.e.23 Colo.3.b.10 Hebr.12.a.1 1.Pet.2.a.2

5

^‡ Want zo wy mit hem ingheentte gheworden zijn tot der ghelijckheyt zijns doods, zo zullen wy oock zijn [medeingheentte tot der ghelijckheyt] der opstanding:

‡ Rom.8.b.11 1.Cor.6;c.14 2.Cor.4.c.14

6

⁺Dewijl wy dit weten, dat onze olde mensch medeghecruycight is: op dat vernielt wurde het lijf der zonde, dat wy voordan niet meęr der zonde dienen.

+ B

7

^* Want wie ghestoruen is, die is gherechtuærdight van der zonde.

* 1.Pet.4.a.1

8

^* Zijn wy auer mit Christo ghestoruen, zo gheloouen wy dat wy oock mit hem leuen zullen:

* 2.Tim.2.b.11

9

End weten ^* dat Christus opgheweckt van den dooden, niet meęr stærft, de dood heeft ouer hem niet meęr heęrschappy.

* Apoc.1.d.18

10

^* Want dat [in hem] ghestoruen is, dat is eęnmael der zonde ghestoruen:

* 1.Pet.2.d.24

[p. 266v]

dat dar auer leeft, dat leeft Gode.

11

Alzo oock ghy, holdet v zeluen daervœr, dat ghy der zonde ghestoruen zijt, Gode auer leuet in Iesu Christo onzem Heęre.

12

Zo latet nu de zonde niet regneren in uwem stærflicken lijue, dat ghy in zynen lusten der zeluer ghehoorzaem zijt.

13

⁺Oock begheuet niet uwe lidmaten der zonde tot wapens der ongherechtigheyt: ^* mer begheuet v zeluen Gode, als die dar wt den dooden leuendigh zijt, end uwe lidmaten Gode tot wapens der gherechtigheyt.

+ C

* Luc.1.g.69 Gal.2.d.20 Hebr.9.d.14 1.Pet.4.a.2

14

Want de zonde zal niet heęrschen ouer v: nademmael ghy niet zijt onder der Wet, mer onder der ghenade.

15

Wat dan? zullen wy zondighen daerom dat wy niet zijn onder der Wet, mer onder der ghenade? Het zy verr.

16

Wetet ghy niet, ^* wem ghy v zeluen begheuet tot dienstknechten ter ghehoorzaemheyt, dat ghy deß dienstknechten zijt dem ghy ghehoorzaem zijt, het zy der zonde ten dood, of der ghehoorzaemheyt ter gherechtigheyt?

* Ioan.8.d.34 2.Pet.2.d.19

17

Gode zy auer danck, dat ghy dienstknechten der zonde gheweęßt zijt, auer nu ghehoorzaem gheworden van herten dem voorbeelde der leęring, welckem ghy ouerghegheuen zijt.

18

^* Nu dan zo ghy beurijdt zijt van der zonde, zo zijt ghy dienstknechten gheworden der gherechitgheyt.

* Ioan.8.d.32 Gal.5.a.1 1.Pet.2.c.16

19

Ick spreeck menschelick om der zwackheyt willen uwes vleęsches. Want ghelijckerwijß ghy uwe lidmaten tot dienst-

[p. 267r]

knechten begheuen hebbet der onreynigheyt end der ⁺ Wetbrekery tot Wetbrekery: ⁺ alzo begheuet oock nu uwe lidmaten tot dienstknechten der gherechtigheyt ter heylighmakinghe.

+ Gr. Wetloozigheyt.

+ D

20

^* Want doe ghy der zonde dienstknechten waret, doe waret ghy vrij van der gherechtigheyt.

* Ioan.8,d.34

21

Wat haddet ghy dan doe ter tijd vœr eęn vrucht wt den dinghen welcker ghy v nu schamet? Want het ende der zeluen is de dood.

22

Nu auer zo ghy van der zonde beurijdt zijt, Gode auer tot dienstknechten gheworden, hebbet ghy uwe vrucht ter heylighmakinghe: het ende auer, het eęwigh leuen.

23

^* Want de dood is der zonde besolding: ^‡ auer de beghenading Godes het eęwigh leuen in Christo Iesu onzem Heęre.

* Gene.2.c.17 Rom.5.b.12 end .15.c.21

‡ 1.Pet.1.a.3