Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.v.

1

⁺ NU wy dan zijn gherechtuærdight door’t ghelooue, zo hebben wy vrede by Gode door onzen Heęre Iesum Christum:

+ Esa.32.d.17 Ioan.16.d.33 Ephe.2.c.13

2

^* Door welcken wy oock eęn toeleyding hebben door het ghelooue tot dezer ghenade, in welcker wy bestaen, end ^‡ rommen ons der hope der heęrlicheyt Godes.

* Ioan.10.b.9 end .14.a.3 Ephes.2.d.17 end .3.c.12 Hebr.10.d.19

‡ Hebr.3.b.6

3

Auer niet alleęnlick [dit], ^* mer wy rommen ons oock der verdruckinghen: dewijl wy weten dat de verdrucking lijdßaemheyt werckt:

* Iaco.1.a.3

4

De lijdßaemheyt auer beprouuing, end de beprouuing hope:

5

De hope auer maeckt niet beschaemt daerom dat de liefde Godes is wtghegoten in onzen herten, door den heylighen Gheęst die ons ghegheuen is.

6

^* Want oock Christus doe wy noch zwack ^‡ waren, is na gheleghenheyt der tijd vœr de Godloozen ghestoruen.

* Ephes.2.a.1 Coloss.2.b.13 Heb.9.d.15 1.Petr.3.d.18

‡ Of. waren na gheleghenheyt der tijd, is vœr

[p. 265r]

7

Want nauwlick zal iemand stæruen ⁺ vœr eęnen gherechtighen: auer ⁺ vœr den goeden dorste misschien oock iemand stæruen.

+ of. vœr recht

+ of, vœr het goede

8

⁺Auer God beuestight zijn liefde teghen ons, dat Christus vœr ons ghestoruen is doe wy noch zondaers waren.

+ B

9

Zo zullen wy ia veel meęr door hem beholden werden voor dem toorne, na dem wy nu in zynem bloede gherechtuærdight zijn.

10

Want zo wy Gode verzoent zijn door den dood zijns Zoons doe wy noch vianden waren: veel meęr zullen wy ⁺ zaligh werden in zynem leuen, zo wy nu verzoent zijn.

+ Gr. beholden

11

Niet alleęnlick auer [dit], mer wy rommen ons oock Godes door onzen Heęre Iesum Christum, door welcken wy nu de verzoening entfanghen hebben.

12

Derhaluen ghelijckerwijß ^* door eęnen mensch de zonde is kommen in de wæreld, ^‡ [alzo] oock de dood door de zonde: end alzo is de dood tot alle menschen héndoor ghegaen, dewijl zy alle ghezondight hebben.

* Gen.3.a.6 1.Cor.15.c.21

‡ Gene.2.c.17 Rom.6.d.23

13

⁺Want de zonde was in der wæreld tot op de Wet: auer wanneęr dar gheęn Wet is, zo werdt de zonde niet toegherekent.

+ C

14

Ia de dood regneerde van Adam an tot op Mosen, oock ouer die, die niet ghezondight hadden, op ghelijcke ouertreding als Adam: welcker is eęn beeld des toekomstighen.

15

Auer mit der beghenadinghe is het niet ghelijck als mit der mißdaad. Want zo door eęnes [menschen] mißdaad vele

[p. 265v]

ghestoruen zijn: zo is veel meęr Godes ghenade end de gaue door ghenade, welcke is eęnes menschen Iesu Christi, an velen oueruloedigh gheweeßt.

16

End de begauing is niet alzo als [het verdærf] door eęnen die ghezondight had: want het gherichte is [kommen] wt eęner [zonde] ter verdommeniß: de beghenading auer wt velen mißdaden ter rechtuærdighmakinghe.

17

⁺Want zo door eęnes [menschen] zonde de dood gheregneert heeft door eęnen: veel meęr zullen die, die dar entfanghen de oueruloedigheyt der ghenaden end der gaue der gherechtigheyt, regneren im leuen door eęnen Iesum Christum.

+ D

18

Ghelijck dan door ⁺ eęnes mißdaad [het verdærf kommen is] ouer alle menschen ter verdommeniß: alzo oock door ⁺ eęnes gherechtigheyt [is kommen de zaligheyt] ouer alle menschen ter rechtuærdighmakinghe des leuens.

+ Of, eęn mißdaad.

+ Of, eęn gherechtigheyt

19

Want ghelijckerwijß door eęnes menschen onghehoorzaemheyt vele tot zondaers ghestelt zijn: alzo oock door eęnes ghehoorzaemheyt zullen vele tot gherechtighen ghestelt werden.

20

^* De Wet auer is neuen inkommen, op dat de mißdaad vermeęret wurde: ^{‡ +} waerin auer de zonde vermeęret is, ⁺ daerin heeft de ghenade oueruloedigher gheweeßt:

* Ioan.15.d.22 Rom.4.c.15 end .7.b.8 Gal.3.c.19

‡ Luc.7.g.47

+ of. waer

+ of. daer

21

Op dat, ghelijckerwijß de zonde gheregneert heeft door den dood: alzo oock de ghenade regneerde door de gherechtigheyt ten eęwighen leuen door Iesum

[p. 266r]

Christum onzen Heęre.