Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.xxvi.

1

AGrippas auer zeyde tot Paulo: Dy werdt verorloft vœr dy zeluen te spreken. Doe streckte Paulus de hand wt, end verandwordde zick [end zeyde]:

2

Ick achte my, kœningk Agrippa gheluckzaligh te zijn, dat ick my huyden voor

[p. 252r]

dy verandworden zal alles deß, daer ick van den Iœden omm verklaeght werde:

3

Allermeęst, dewijl du eęn kenner bist aller zeden end vraghen die by den Iœden zijn: Daerom bid ick dy, du woldest my langmoedighlick hooren.

4

Uan mynem leuen dan van der iœghden op, hoe het van anbeghinne onder mynem volcke te Hierusalem gheweęßt is, weten alle de Iœden,

5

⁺Die my van eęrst an voorhén ghekennt hebben (wenn zy het wolden ghetuyghen) dat ick na der kœrlickster secten onzes Godsdiensts eęn Phariséer geleeft hebbe

+ B

6

End nu sta ick end werde ghericht ^* ouer der hope an de toezegghing die van Gode gheschiedt is tot onzen Uaderen:

* Gene.3.c.15 end .22.d.18 end .26.a.4. end .49.b.10 Deut.18.b.15 2.sam.7.b.12 Psal.132.b.11 Esa.4.a.2 end .7.b.14. end .9.b.6 end .40.c.10 Iere.23.a.5 end .33.c.14 Ezec.34.f.23 end .37.f.24 Dan.9.f.24 Mich.7.d.20

7

Tot welcker, hopen de twælf gheslæchten der onzeren te kommen mit stadighem Godsdienst dagh end nacht: Dezer hopen haluen werde ick, o kœningk Agrippa van den Iœden verklaeght.

8

Waerom werdt dit ongheloofßaem by v ghericht, dat God de dooden opweckt?

9

^‡ Ick meynde dan wel by my zeluen, ick moeste teghen den naem Iesu des Nazareners veel wederstands doen:

‡ Act.8.a.3 end .9.a.1 end .22.a.4 Gal.1.c.13 1.Cor.15.a.9 1.Tim.1.c.13

10

Als ick oock te Hierusalem ghedaen heb, end heb vele Heylighen in gheuangnissen ghesloten, waerouer ick van den Ouerpriesteren volle macht entfing: ⁺ end als zy ghedoodt wurden, bracht ick het vonniß voor.

+ C

11

End door alle Synagoghen pijnighde ze ick menighmael, end dwang ze te

[p. 252v]

lasteren: end dewijl ick wtermaten zeęr raaßde op ze, veruolghde ick ze oock tot in vrémde steden.

12

Ouer welckem doe ick oock na Damascon reyßde, mit macht end beuel van den Ouerpriesteren entfanghen, zagh ick midden des daghs op dem weghe, o kœningk, dat ^* eęn licht vam hemel klarer dan der zonnen schijnsel, my end die mit my reyßden, ommschene.

* Act.9.a.3

13

Doe wy auer alle ter ærden neder vielen, hoorde ick eęn stemm tot my spreken, end zeyde op Hebreesch: ⁺ Saul Saul, wat veruolgst du my? het is dy hard teghen prickels te streuen.

+ D

14

Ick auer zeyde: Heęr, wie bist du? End hy zeyde: Ick bin Iesus den du veruolgst.

15

Auer sta op, end sta op dyne voeten: want hiertoe bin ick dy verschenen, dat ick dy bestelle eęnen dienaer end ghetuyghe deß, dat du ghezien hebst, end dat ick dy noch will verschijnen laten.

16

End zal dy verlossen van dem volcke end van den Heydenen, onder welcke ick dy nu wtzende,

17

^* Op te doen hœre ooghen, dat zy zick bekeęren van der duysternisse tot dem lichte, end van der macht des Satans tot Gode:

* Esa.60.a.1

18

Op dat zy entfanghen quijtlating der zonden, end het ærfdeęl onder den dy gheheylight zijn door het ghelooue an my. ⁺

+ E

19

Daerom, o kœningk Agrippa, was

[p. 253r]

ick dem hemelschen ghezichte niet onghehoorzaem.

20

^* Mer verkondighde eęrstlick den, die te Damasco end te Hierusalem end in allem landbegrijp Iudée waren, end den Heydenen, dat zy ghemoedbetering deden, end zick bekeęrden tot Gode, end deden wercken die der ghemoedbetering wærd zijn.

* Act.9.c.19 d.28. end .22 d.17

21

^* Om dezes willen namen my de Iœden in dem tempel gheuanglick, end onderstonden my mit gheweld te dooden.

* Act.21.f.30

22

Auer door bystand my van Gode ghekommen, sta ick tot op dezen dagh, end tuyghe oock dem kleynen end dem grooten: end zeg niets buyten dem dat oock de Propheten end Moses ghesproken hebben, dar het gheschiehen zolde. ⁺

+ F

23

[Naemlick] of de ⁺ Ghezalfde lijden moest, of hy de eęrste wt der opstandinghe der dooden, eęn licht verkondighen zolde dem volcke end den Heydenen.

+ Christus.

24

Doe hy auer zulcks ter verandwordinghe gaf, zeyde Festus mit luyder stemmen: Du raaßt Paule, de groote gheleęrtheyt maeckt dy razende.

25

Hy auer zeyde: Gheweldighe Feste, ick raze niet, mer ick spreke waerachtighe end verzinnde worden.

26

Want de kœningk weet zulcks wel tot welckem ick oock vrijwt spreke: want ick holde, hem zy hiervan niets verborghen, ^* want zulcks is niet im winckel ghehandelt.

* Ioan.18.d.20

27

Gheloofst du kœningk Agrippa, den Propheten? ick weet dat du [hen] ghe-

[p. 253v]

loofstt.

28

⁺Agrippas auer zeyde tot Paulo: Du ouerredest my schier eęn weynigh dat ick eęn Christen werde.

+ G

29

Paulus auer zeyde: ^* Ick zolde van Gode wenschen, dat niet alleęnlick du, mer oock alle die my huyden hooren, oock in weynigh end in veel, zodanighe wurden, als oock ick bin, behaluen deze banden.

* 1.Cor.7.b.7

30

End doe hy dit ghezegt had, stond de Kœningk op, end de Landuooghd end Bernice, end die mit hen zaten,

31

End entweecken byzijden, spraken mit malckanderen, end zeyden: ^* Deze mensch handelt niets dat doods of banden wærd is.

* Act.23.b.9 end .25.g.25

32

Agrippas auer zeyde tot Festo: Deze mensch mocht entslaghen werden, wenn hy zick niet op den Keyzer beropen hadde.