Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.xxiij.

1

PAulus auer zagh staerlick den Raad an, end zeyde: Ghy mannen broeders, ^* ick heb mit aller goeder consciency burgherlick ghewandelt voor Gode tot op den huydighen dagh.

* Act.24.d.16

2

^* De Ouerpriester auer Ananias beual den, die by hem stonden, dat zy hem op den mond sloughen.

* 1.re.22.d.24 Iere.20.a.2 Ioan.18.d.22

3

Doe zeyde Paulus tot hem: God zal dy slaen, du ghewittde wand: ^* zittest du end richtest my na der Wet, end de Wet ouertredende beueelst du my te slaen?

* Deut.17.a.4

4

Die auer ommhær stonden, zeyden: Lachterst du den Ouerpriester Godes?

5

Paulus auer zeyde: Ick wist niet broeders, dat hy Ouerpriester was: Want dar is gheschreuen: ^* Dem ouersten dijns volcks zalt du niet verspreken.

* Exo.22.d.28

6

⁺Als auer Paulus wist dat het eęn deęl Sadducéers waren, end het ander Phariséers, riep hy im raad: Mannen broeders, ick bin ^* eęn Phariséer, eęns Phariséers zoon: ick werde ghericht om der hope end opstanding willen der dooden.

+ B

* Philip.3.b.5 Act.24.f.21 end .26.b.6 end .20.e.20

7

Doe hy auer dit zeyde, ward dar eęn oproer onder den Phariséeren end de Sadducéeren: end de menighte ward tweęspannigh.

8

^* Want de Sadducéers zegghen, dar

* Matt.22.c.23 Marc.12.b.18 Luc.20.e.27

[p. 247r]

zy gheęn opstanding, noch Enghel noch gheęst: de Phariséers auer belijden’t beyde.

9

Dar ward auer eęn groot gheschrey. End de Schriftgheleęrden wt der Phariséeren secte stonden op, twistighden, end zeyden: ^* Wy vinden niets quaads in dezem mensche: Heeft auer eęn gheęst, of eęn Enghel mit hem ghesproken, zo latet ons gheęn Godstormers zijn.

* Act.25.g.25 end .26.g.31

10

⁺Doe dar auer eęn groot oproer ward, bezorghde de Duyzendhoofdmann dat Paulus van hen mochte verschœrt werden: end hiet het krijgsvolck hénaf gaen, end hem wt d’midden van hen hén rucken, end in de lægherborght bringhen.

+ C

11

^* Des nachts daerna auer stond de Heęr by hem, end zeyde: Zy wel ghemoedt Paule: want ghelijck du van my te Hierusalem ghetuyght hebst, alzo moetest du oock te Romen ghetuyghen.

* Act.18.c.9

12

^* Doe het auer dagh ward, maeckten zommighe der Iœden eęn heymelick verdragh, end verulouckten zick zeluen, end zeyden, Zy zolden noch eten noch drincken, voor dat zy Paulum ghedoodt hadden.

* Act.23.e.20 g.29

13

Hœrer waren auer meęr dan viertigh, die deze t’zamenzweering ghedaen hadden.

14

Deze ghinghen hén tot den Ouerpriesteren end Olderlinghen, end zeyden: Wy hebben ons zeluen mit verulouckinge verulouckt niets te nutten, ⁺ voor dat wy Paulum ghedoodt zullen hebben.

+ D

15

Ghy dan, doet nu dem Duyzendhoofd-

[p. 247v]

mann end dem Rade kond, dat hy hem morghen tot v hæruoor bringhe, als woldet ghy wat ghewissers van hem ⁺ verhooren: wy auer zijn bereyd hem te dooden eęr hy naby komme.

+ bekennen

16

Doe auer Paulus zuster zoon den listighen anslagh hoorde, quam hy dar, end ghingk in de lægherborght, end boodschapte’t Paulo.

17

Paulus auer riep tot zick eęnen van den Honderdhoofdmannen, end zeyde: Dezen ionghelingk bring hén tot dem Duyzendhoofdmann: want hy heeft hem wat te zegghen.

18

Die nam hem mede, end bracht hem tot dem Duyzendhoofdmann, end zeyde: De ghebonden Paulus riep my tot zick, end bad my, dezen ionghelingk tot dy te bringhen, die dy wat te zegghen heeft.

19

Doe nam hem de Duyzendhoofdmann by der hand, end weeck byzijden af, ⁺ end vraeghde hem: Wat is het dat du my te zegghen hebst? Hy zeyde auer:

+ E

20

^* De Iœden hebben eęn verdragh ghemaeckt dy te bidden, dat du morghen Paulum voor den Raad bringhest, als wolden zy wat ghewissers van hem onderzoucken.

* Act.23.c.12

21

Du auer laett dy niet van hen ouerreeden: want hem legghen laghen meęr dan viertigh mannen onder hen, die zick mit verulouckinghe verbonden hebben, noch te eten, noch te drincken, voor dat zy hem dooden: end zijn nu bereyd, end verwachten op dijn toezegghing.

22

Doe liet de Duyzendhoofdmann den

[p. 248r]

ionghelingk van zick, end beual hem, dat hy niemanden zeyde, dat hy hem zulcks openbaert hadde.

23

⁺End riep tot zick tweę zekere Honderdhoofdmannen, end zeyde: Bereydet tweę honderd krijgsknechten, dat zy na Cesarien reyzen, end zeuentigh ruyters, end tweę honderd lancenuoerers op de derde vre der nacht:

+ F

24

End maket lastdieren toe, op dat zy Paulum daerop zetten, end bringhen hem wel bewaert tot Felix dem Landuooghd: End schreeff eęnen brief dezes inholds:

25

Claudius Lisias dem gheweldighen Landuooghd Felici, zaligheyt.

26

^* Dezen mann hadden de Iœden gheuanghen, end wolden hem dood hebben, doe quam ick mit der krijgsrustinghe daertoe, end verloste hem, dewijl ick onderricht ward, dat hy Rœmisch ware.

* Act.21.f.33

27

Doe ick auer wolde weten de oorzaeck waerom zy hem verklaeghden, bracht ick hem in hœren Raad.

28

⁺Welcken ick beuand dat hy verklaeght ward van vraghen hœrer Wet, auer gheęn anklaagh hadde des doods of der banden wærd.

+ G

29

^* Doe my auer te kennen ghegheuen was van eęnem listighen anslaghe, den dezem mensche de Iœden bereydt hadden, van stonden an zand ick hem tot dy, end entbood oock den verklagheren, dat zy voor dy zeyden, wat zy teghen hem hadden. Blijf stærck.

* Act.23.e.20

30

De krijgsknechten auer, ghelijckerwijß hen verordent was, namen Paulum, end voerden hem by der nacht na Antipatriden.

[p. 248v]

31

Des anderen daghs auer lieten zy de ruyters mit hem reyzen, end keęrden wederom na de lægherborght.

32

Doe die tot Cesarien quamen, leuerden zy den brief dem Landuooghd, end stelden oock Paulum voor hem.

33

Doe auer de Landuooghd [den brief] laß, vraeghde hy wt wat landuooghdye hy ware:

34

End doe hy vernam dat hy wt Cilicia was, zeyde hy: Ick zal dy verhooren wanneęr dyne verklaghers oock teghenwordigh zullen zijn. End hiet hem verwaren in dem richthuyze Herodis.