Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.xxi.

1

ALs het auer gheschiedde dat wy van hen afgeruckt, hénaf voeren, quamen wy rechts loops tot Coo, end des anderen daghs tot Rhodum: end van daer tot Patara.

2

End als wy eęn schip vonden dat in Phenicen voer, traden wy daerin, end voeren hén.

3

Als wy auer Cypren in’t ghezichte kreghen, lieten wy’t ter lincker hand, end scheepten in Syrien, end quamen af tot Tyro: Want aldaer zolde het schip de last ontladen.

4

End als wy leęrionghers vonden, ble-

[p. 242v]

uen wy aldaer zeuen daghen: deze zeyden Paulo door den Gheęst, ^* hy zolde niet hénop na Hierusalem gaen.

* At.20.c.16 end .21.b.12

5

Het gheschiedde auer doe wy de daghen toeghebracht hadden, ghinghen wy hénwt, end reyßden hén: end zy gheleydden ons alle mit vrauwen end kinderen tot buyten de stad: end knielden neder op dem ouuer, end baden.

6

End als wy malckanderen ommhelßt hadden, traden wy hénop in het schip: zy auer keęrden weder tot den hœren.

7

⁺Wy auer volbrachten de schipuard, end van Tyro quamen wy af tot Ptolemaida, end ommhelßden de broeders, end bleuen eęnen dagh by hen.

+ B

8

Auer des anderen daghs wy die mit Paulo waren, quamen tot Cesarien: end ghinghen in het huyß ^* Philippi des Euangelisten, die eęn van den zeuenen was, end bleuen by hem.

* Act.6.b.5

9

^* De zelue auer had vier dochters welcke maeghden waren ^‡ end propheteerden.

* Act.2.c.17.

‡ Ioel.2.g.28

10

End als wy daer vele daghen ouerbleuen, quam eęn Propheet hæraf van Iudéen mit name ^* Agabus:

* Act.11.d.28

11

Welcker tot ons ghekommen, namm den gordel Pauli, end band zick de handen end voeten, end zeyde: Dit zegt de heylighe Gheęst, ^* Den man deß deze gordel is, zullen de Iœden alzo binden te Hierusalem, end zullen hem ouerleueren in der Heydenen handen.

* Act.20.e.23 end .21.f.33

12

Als wy auer zulcks hoorden, baden oock wy end de inlandischen, ^* dat hy

* Act.20.c.16 end .21.a.4

[p. 243r]

niet hénop na Hierusalem reyßde.

13

⁺Paulus auer andwordde: ^* Wat maket ghy dat ghy weęnet end my mijn hert breket? want ick bin bereyd niet alleęnlick ghebonden te werden, mer oock te stæruen te Hierusalem om des Heęren Iesu naem willen.

+ C

* Act.20.e.24

14

Doe hy auer zick niet ouerreden liet, zweghen wy still, end zeyden: ^* De will des Heęren gheschiehe.

* Matt.6.b.10 Luc.22.e.42

15

End na den zeluen daghen maeckten wy onze packing, end toghen hénop na Hierusalem.

16

Mit ons auer quamen oock zommighe leęrionghers van Cesarea, end brachten mit zick eęnen [mit name] Mnason van Cypren, eęnen olden leęriongher, by welckem wy herberghen zolden.

17

Doe wy nu tot Hierusalem quamen, namen ons de broeders gærne op.

18

Des anderen daghs auer ghingk Paulus mit ons in tot Iacobo, end de Olderlinghen quamen alle daer.

19

End als hy ze ommhelßt had, ⁺ vertelde hy ordentlick wat God ghedaen hadde onder den Heydenen door zijn bediening.

+ D

20

Doe zy auer dit hoorden, prezen zy den Heęr, end zeyden tot hem: Broeder, du ziest hoe menigh tien duyzend Iœden dar zijn, die gheloouigh worden zijn: end zijn alle ijueraers ouer de Wet.

21

Zy zijn auer bericht ouer dy, dat du eęnen afual leęrest van Mose, alle Iœden

[p. 243v]

die onder den Heydenen zijn, end zegst, zy zolden de kinders niet besnijden, noch na den [Uaderlicken] zeden wandelen.

22

Wat is het dan nu? Alleßinns moet de menighte te hoop kommen: want zy zullen hooren dat du kommen bist.

23

Zo doe nu dit dat wy dy zegghen. Wy hebben vier mannen die eęn ghelofte hebben op zick, de zelue neem mede, ^* end reynigh dy mit hen, end waagh den kost an ze, dat zy het hoofd schæren:

* Num.6.c.18 Act.18.e.18

24

End dat alle verstaen dat het niets zy, deß zy ouer dy bericht zijn: mer dat du oock zelue wandelst, ⁺ end holdest de Wet.

+ E

25

Zo veel auer die belangt, die gheloouigh gheworden zijn wt den Heydenen ^* hebben wy gheschreuen end besloten, dat zy zulcks niet te onderholden hebben, ^* dan zick te wachten voor dem afgodenoffer, end ^‡ dem bloede, end voor versmachtdem, end hoerery.

* Act.15.e.23

* Exod.20.a.3 Zach.9.b.7

‡ Gene.9.a.4

26

^* Doe nam Paulus de mannen mede, end liet zick des anderen daghs mit hen reynighen: end ghingk in den tempel, end ^* verkondighde de veruulling der daghen der reyning, tot dat vœr eęnen ieghelicken van hen de offer gheoffert wurde.

* Act.24.b.6

* Num.6.c.13 Act.24.e.18

27

Als auer de zeuen daghen nu zolden vollendt werden, zaghen hem de Iœden die wt Asia waren, in dem tempel, end beroerden het gansche volck, sloughen de handen an hem,

28

End kreeschen: Ghy Israelitische mannen, kommet te hulpen. Dit is de mensch

[p. 244r]

die alle menschen an allen enden leęrt teghen het volck, end de Wet, end deze plaetß: heeft oock daerbeneuen de Griecken in den tempel ghebracht, ⁺ end heeft deze heylighe plaetß ghemeyn ghemaeckt.

+ F

29

(Want zy hadden ^* Trophimum den Epheser te voren in der stad mit hem ghezien, welcken zy meynden dat Paulus hadde in den tempel ghebracht.)

* Act.20.a.4 2.tim.4.d.20

30

End de gansche stad ward beroert, end dar ward eęn t’zamengheloop des volcks, end grepen Paulum an, end toghen hem ten tempel hénwt: end van stonden an wurden de dœren toeghesloten.

31

Doe zy hem auer zochten te dooden, quam het gherucht hénop voor den Duyzendhoofdmann der krijgsrotten, dat gansche Hierusalem in oproer was.

32

De zelue nam van stonden an krijgsknechten end Honderdhoofdmannen mede, end liep hénaf tot hen. Doe zy auer den Duyzendhoofdmann end de krijgsknechten zaghen, lieten zy af Paulum te slaen.

33

^* Doe trad de Duyzendhoofdmann héntoe, greep hem an, end hiet hem binden mit tweęen ketenen: end vraeghde wie hy ware, end wat hy ghedaen hadde.

* Act.21.b.11

34

⁺Zommighe onder dem volcke riepen zuß, de andere anders. Doe hy auer niets zekers konde bekennen om des rumoors willen, hiet hy hem in de lægherborght voeren.

+ G

35

Als hy auer an de trappen quam, gheschiedde’t dat hy van den krijgsknechten ghedraghen ward, om des ghewelds

[p. 244v]

willen des volcks:

36

Want dar volghde veel volcks na, end kreesch, ^* Hénwegh mit hem.

* Act.22.e.22 Luc.23.c.18

37

End als nu Paulus ter lægherborght ingheuoert zolde werden, zeyde hy tot dem Duyzendhoofdmann: Is het my niet verorloft mit dy te spreken? Hy auer zeyde: Kanst du Griecksch?

38

Bist du niet ^* de Egypter, die du voor dezen daghen eęnen oproer maecktest, end leyddest hénwt in de woestijn vier duyzend priemmmoordische mannen?

* Act.5.f.37

39

Paulus auer zeyde: Ick bin eęn Iœdisch mensch, ^* van Tarsen, eęn burgher eęner vermaarder stad Cilicie: Ick bidd dy auer, verorlof my te spreken tot dem volcke.

* Act.9.b.11 end .22.a 3

40

Als hy het hem auer verorlofde, trad Paulus op de trappen, end wenckte dem volcke mit der hand: end doe nu eęn groote stilheyt ward, sprack hy tot hen op Hebreesch, end zeyde: