Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.xx.

1

DOe nu de oproer ghestilt was, riep Paulus de leęrionghers tot zick, end ommhelßde ze ^* end ghingk wt te reyzen na Macedonien.

* 1.Timo.1.a.3

2

End doe hy de zelue landen doorreyßde, end ze vermaent hadde mit velen worden, quam hy in Grieckenland.

3

End doe hy [daer] dry maenden vertouft had, end hem laghen ghelegt wurden van den Iœden, als hy in Syrien wolde varen, ward hy des zinns weder te keęren door Macedonien.

4

Hem auer verghezellschapten tot in Asien Sopater van Berrhéen: der Thessalonikeren auer ^* Aristarchus end Secundus end Gaius van Derben, end Timotheus: auer wt Asien ^‡ Tychicus end ^* Trophimus.

* Act.19.f.29 end .27.a.2

‡ 1.tim.4.c.12

* Act.21.f.29 2.tim.4.d.20

5

⁺Deze ghinghen voorhén, end verbeydden ons tot Troas.

+ B

6

Wy auer scheepten na der ongheheuelder brooden daghen van Philippis, end quamen tot hen tot Troas binnen vijf daghen: daer hielden wy ons zeuen daghen.

7

Op eęnen dagh auer der Sabbathen

[p. 240v]

doe de leęrionghers t’zamen quamen ^* brood te breken, reedde Paulus mit hen, end wolde des anderen daghs hén reyzen, end vertrack de rede tot in de middernacht.

* Act.2.g.46

8

Dar waren auer vele fackels op den opperzale, daer ⁺ zy verzamelt waren.

+ Of, wy

9

End dar zat eęn ionghelingk mit name Eutichus, in eęner venster, end zanck in eęnen diepen slaap, end dewijl Paulus lang reedde, ward hy noch meęr van dem slape nederdruckt, end viel van der derder zolderinghe hénaf, end ward dood opghenomen.

10

Paulus auer daelde hénaf, ^* end viel op hem, ommuing hem end zeyde: Maket gheęn ghetier: want zijn ziel is in hem.

* 1.Reg.17.d.21 2.Reg.4.f.34

11

⁺Hy auer ghingk hénop, end brack brood, end beet an: end sprack zeęr veel tot op de dagheraad, end alzo reyßde hy hén.

+ C

12

Zy brachten auer den ionghelingk leuendigh, end wurden niet weynigh ghetroost.

13

Wy auer ghinghen voorhén in het schip, end staken af na Asson, dat wy aldaer Paulum opnamen: want alzo had hy’t verordent, end zolde zelue te voet gaen.

14

Als hy auer ons entmoettde te Asson, namen wy hem op, end quamen tot Mitylenen.

15

End van daer scheepten wy, end quamen des anderen daghs hén teghen Chion. Auer des daghs daerna quamen wy tot Samon angheuaren: end als wy te Trogyllien vertoufden, quamen wy

[p. 241r]

des naesten [daghs] tot Mileten.

16

Want Paulus had besloten voor Epheso hén te schepen, op dat hy niet hadde in Asia de tijd te verslijten: ^* want hy spoedighde zick, op den ⁺ Pingstdagh te Hierusalem te zijn, zo het hem moghelick ware.

* Act.21.a.4 b.12

+ Gr. den dagh des vijftighsten

17

⁺Auer van Mileten zand hy na Epheson, end entbood de Olderlinghen der Ghemeynte.

+ D

18

Als auer die tot hem quamen, zeyde hy tot hen: Ghy wetet ^* van dem eęrsten daghe an doe ick bin in Asien kommen, hoe ick alle de tijd bin by v gheweeßt,

* Act.19.b.10

19

End dem Heęre ghedient mit aller ootmoedigheyt end mit velen tranen end verzouckinghen die my zijn wederuaren door der Iœden laghen:

20

Hoe ick niets verholden heb deß, dat [v] nuttigh was, dat ick v niet verkondight hadde, end v opentlick end by huyzen gheleęrt.

21

End heb betuyght oock den Iœden end den Griecken ^* de ghemoedbetering tot Gode, end het ghelooue an onzen Heęre Iesum Christum.

* Lu.24.g.46

22

⁺End nu zie, ick in dem Gheęst ghebonden, reyze hén na Hierusalem, weet niet wat my daer beieghenen zal:

+ E

23

Dan dat de heylighe Gheęst van steden te steden betuyght, end zegt ^* dat banden end verdruckinghen myner [te Hierusalem] verwachten.

* Act.21.b.11

24

^* Auer ick achte deß gheęn, ick holde oock mijn ziel my zeluen niet duerbaer: op dat ick vollendighe mynen loop mit vrœghden, end den dienst ^* den ick

* Act.21.e.13

* Gal.1.a.1 Tit.1.a.3

[p. 241v]

entfanghen heb van dem Heęre Iesu, te betuyghen het Euangelium der ghenaden Godes.

25

End nu zie, ick weet dat ghy mijn anghezicht niet meęr zien zullet, ghy alle door welcke ick ghereyßt bin end ghepredickt heb het kœningkrijck Godes,

26

Daerom betuyghe ick v an dem huydighen dagh, ^* dat ick reyn bin van [uwer] aller bloede.

* Ezech.33.b.9

27

⁺Want ick heb my niet enttoghen dat ick v niet verkondight hadde alle den raad Godes.

+ F

28

^‡ Zo hebbet nu acht op v zeluen end op het gansche kuddeken, in welckem v de heilighe Gheęst ghezett heeft tot Opzieners, te ⁺ regeren de Ghemeynte Godes, ^* welcke hy door zijn eyghen bloed verworuen heeft.

‡ 1.Petr.4.a.2

+ Gr. weyden.

* Ephes.1.b.7 Coloss.1.b.14 Hebr.9.d.12 1.Petr.1.d.19 Apoc.5.c.9

29

Want dit weet ick dat na mynem afscheyd zullen onder v inkommen ^‡ lastighe woluen, die des kuddekens niet verschoonen zullen.

‡ 2.Pet.2.a.1

30

Oock ^* wt v zeluen zullen mannen opstaen, end verkeęrde dinghen spreken, op dat zy de leęrionghers na zick affrucken.

* psal.41.b.10 Matt.26.b.20 Ioan.13.b.18 Act.1.c.17 1.Ioan.2.c.19

31

Daerom waket, end dencket daeran dat ick niet afghelaten heb dry iaren lang nacht end dagh eęnen ieghelicken mit tranen te vermanen.

32

End nu broeders, ick beuele v Gode end dem worde zyner ghenaden, welck machtigh is v op te bauwen, ⁺ end v te gheuen de ærue onder allen gheheylighden.

+ G

[p. 242r]

33

^* Ick heb niemands ziluer noch gold noch kleęd begært:

* 1.Cor.9.b.12 2.Cor.11 b.9 end .12.e.13

34

Ia ghy wetet zelue ^‡ dat deze handen tot myner nooddurft end der, die mit my waren, ghedient hebben.

‡ Act.18.a.3 1.Cor.4.c.12 1.Thes.2.b.9 2.Thes.3.b.8

35

Ick heb het v alles ghewezen, ^* dat men alzo mit arbeyden, moet de zwacken opholden, end ghedencken der worden des Heęren Iesu: want hy heeft ghezegt, Gheuen, is gheluckzaligher dan nemen.

* Ephe.4.f.28

36

End als hy zulcks ghezegt had, zettde hy zick op zyne knijen, end bad mit hen allen.

37

Dar ward auer eęn groot gheweęn onder hen allen, end vielen Paulo op den halß, end kusten hem:

38

End waren bedrouft allermeęst om des words willen dat hy zeyde, Zy zolden zijn anghezicht niet meęr anschauwen. End gheleydden hem tot an het schip.