Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.xvj.

1

HY quam auer tot Derben end Lystren: end zie, aldaer was eęn leęriongher mit name ^* Timotheus, eęner gheloouigher Iœdscher vrauwen zoon, auer eęns Grieckschen vaders:

* Rom.16.d.21 Philip.2.c.19 1.Thes.3.a.2

2

^* Welcker betuyght ward van den broederen die te Lystren end te Iconien waren.

* Act.6.a.3

3

Dezen wolde Paulus hebben mit hem te reyzen: end nam hem, end besneed hem, ^* om der Iœden willen die in den zeluen plaetsen waren: want zy wisten alle dat zijn vader eęn Griecker was.

* 1.Cor.9.c.20 Gal.2.a.3

4

Als zy auer de steden ouerreyßden, gauen zy hen ouer te holden de verordeninghen ^* welcke van den Apostelen end Olderlinghen die te Hierusalem waren, besloten waren.

* Act.15.d.20

5

Zo wurden dan de Ghemeynten in dem ghelooue beuestight, end namen daghlicks toe in ghetalle.

6

⁺Doe zy auer door Phrygiam end het Galatische land toghen, wurden zy gheweert van dem heylighen Gheęst te spre-

+ B

[p. 232r]

ken het word in Asia.

7

End ghekommen an Mysiam, verzochten zy na Bithyniam te reyzen, end de Gheęst liet het hen niet toe.

8

^* Doe zy auer voor Mysiam hén toghen, quamen zy hénaf tot Troada.

* 2.Cor.2.c.12

9

End Paulo verscheen eęn ghezicht by der nacht: Eęn Macedonisch mann stond dar, welcker hem bad, end zeyde: Komm hæraf na Macedonien, end komm ons te hulpen.

10

Als hy auer het ghezichte ghezien had, van stonden an zochten wy te reyzen na Macedonien, verzekert dat ons de Heęr gheropen hadde hen te euangelizeren

11

Doe voeren wy af van Troas, end quamen rechts loops tot Samothracen: end des anderen daghs tot Neapolim.

12

End van daer tot Philppis, welcke is eęn hoofdstad des lands Macedonie, [end] eęn vrije stad: end hadden onzen wandel in der zeluer stad zommighe daghen. ⁺

+ C

13

Ten daghe auer der Sabbathen, ghinghen wy hénwt voor de stad an eęnen waterstroom, daer men ghewoon was te bidden: end zettden ons, end spraken tot den vrauwen die dar t’zamen quamen.

14

End eęn vrauw mit name Lydia, eęn purperkræmersche wt der stad Thyatiren, was Godvruchtigh, end hoorde toe, welcker dede de Heęr het hert op, dat zy bemærckte wat van Paulo ghesproken ward.

15

Als zy auer end hœr huyß ghedoopt

[p. 232v]

ward, bad zy, end zeyde: Hebbet ghy my gheacht dem Heęre gheloouigh te zijn, zo kommet in mijn huyß, end blijuet daer: ^* End zy dwang ons.

* Gen.19.a.2 Iudi.19.e.21 Lu.24.d.28 Hebr.13.a.2

16

Het gheschiedde auer doe wy tot dem ghebede ghinghen, dat eęn dienstmaeghd die ^‡ eęnen waarzegghenden gheęst had, ons entmoettde, ⁺ welcke ^* eęn groot ghewinn hœren heęren dede mit waarzegghen.

‡ 1.Sa.28.b.7

+ D

* Act.19.e.24

17

Deze volghde Paulo end ons na, kreesch wt, end zeyde: Deze menschen zijn knechten Godes des Allerhooghsten, die ⁺ ons den wegh der zaligheyt verkondighen.

+ anders. v

18

Zulcks auer dede zy vele daghen: Paulus auer hierouer bemoeytt, wand zick omm, end zeyde tot dem gheęste: Ick ghebiede dy in dem name Iesu Christi, dat du van hœr wtuarest. ^* End hy voer wt ter zeluer vren.

* Marc.16.d.17

19

Doe auer hœre heęren zaghen, dat de hope hœrs ghewinns was wtgheuaren, ^* namen zy Paulum end Silam, toghen ze hén op den marckt, tot den Ouersten:

* 2.Cor.6.b.5

20

End brachten ze voor de Hoofdluyden, end zeyden: ^* Deze menschen beroeren onze stad, end zijn Iœden,

* Act.17.b.6

21

End verkondighen zeden, welcke ons niet gheorloft zijn an te nemen, noch te doen, ⁺ dewijl wy Romeynen zijn.

+ E

22

End de schare viel te hoop teghen hen: end de Hoofdluyden schœrden hœre kleęders, end hieten ze ^* gheęsselen.

* 2.Cor.11.f.25 1.Thess.2.a.2

23

End doe zy ze wel gheslaghen hadden

[p. 233r]

worpen zy ze in eęnen kærcker, end gheboden dem stockwaerder dat hy ze zekerlick verwaerde.

24

Welcker doe hy alzulck eęn ghebod entfanghen hadde, warp ze in den binnenkærcker, end maeckte hœre voeten vast in den stock.

25

Omtrent der middernacht auer ^* baden Paulus end Silas, end prezen God mit lofzanghe: end de ghebondene hoorden ze.

* Act.4.f.31

26

Snellick auer ward dar eęn groote ærdbeuing, alzo dat zick beweeghden de gronduesten des kærckers: ^* end van stonden an wurden alle de dœren opghedaen, end aller banden wurden loß.

* Act.5.d.19 end .12.a.7

27

De stockwaerder auer wt dem slaap entspronghen, als hy zagh de dœren des kærckers opghedaen, ⁺ toogh hy zijn zwærd wt, end wolde zick zeluen dooden, om dat hy meynde dat de ghebondene entloopen waren.

+ F

28

Paulus auer riep mit luyder stemmen, end zeyde: Doe dy zeluen niets quaads: want wy zijn alle hier.

29

Hy begærde auer eęn licht, end sprang hénin, end ward beuende, end viel Paulo end Sile ten voeten.

30

End leydde ze hærwt, end zeyde: [Lieue] Heęren, ^* wat moet ick doen dat ick zaligh werde?

* Luc.3.c.10 Act.2.f.37 end .9.a.6

31

Zy auer zeyden: ^‡ Gheloof in den Heęre Iesum Christum, zo zalt oock du end dijn huyß zaligh werden.

‡ Ioan.3.b.16 d.36. end .6.e.47 1.Ioan.5.b.10

32

End spraken hem het word des Heęren, end allen den, die in zynem huyze

[p. 233v]

waren.

33

End hy nam ze tot zick in der zeluer vren der nacht, end wiesch [hen] de stramen af: end ward van stonden an ghedoopt end alle de zyne.

34

End hy leydde ze in zijn huyß, end ^* zettde [hen] eęnen disch voor, end verhœghde zick, om dat hy mit ganschem huyze an God gheloouigh gheworden was,

* Luc.5.f.29 end .19.a.6

35

⁺Doe het auer dagh ward, schickten de Hoofdluyden ^‡ staddienaers hén, end zeyden: Entsla deze menschen.

+ G

‡ Gr. roudendraghers.

36

De stockwaerder auer verkondighde deze worden Paulo: De Hoofdluyden hebben hær ghezonden, dat ghy entslaghen werdet: nu tredet dan wt, end gaet hén in vreden.

37

Paulus auer zeyde tot hen: Onuerordeęlt hebben zy ons opentlick ghegheęsselt, die wy doch Roomsche mannen zijn, end in eęnen kærcker gheworpen, end wærpen zy ons nu heymelick hærwt? niet alzo, mer latet ze zelue kommen, end ons hénwt leyden.

38

De staddienaers auer boodschapten deze worden den Hoofdluyden: end zy vreęßden zick, doe zy hoorden dat zy Romeynen waren.

39

End quamen end vermaenden ze [te vreden te zijn]. End als zy ze hærwt leydden, ^* baden zy ze dat zy wt der stad toghen.

* Matt.8.d.34

40

Doe ghinghen zy wt dem kærcker, end ghinghen hénin tot Lydiam: end doe zy de broeders ghezien hadden, troostden

[p. 234r]

zy ze, end reyßden hénwegh.