Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap.xij.

1

TEr zeluer tijd auer slough de kœningk Herodes de handen an zommighe van der Ghemeynte, ze te verdrucken.

2

Hy dodde auer ^* Iacobum Ioannis broeder mit dem zwærde.

* Matt.4.d.21

3

End doe hy zagh dat het den Iœden anghenaem was, nam hy voor, oock Petrum te vanghen. (Het waren auer de daghen der ongheheuelder brooden.)

4

^* End doe hy hem gheuanglick ghenomen had, leyde hy hem in eęnen kærcker, end leuerde hem vier vierlinghen krijgsknechten ouer te bewaren: end wolde na dem Pascha hem dem volcke voorbringhen.

* Ioan.21.c.18

5

Zo ward nu Petrus in dem kærcker

[p. 223v]

bewaert: auer eęn gheduerigh ghebed gheschiedde’r vœr hem tot Gode van der Ghemeynte.

6

Doe auer Herodes hem zolde voordbringhen, in der zeluer nacht sliep Petrus tusschen tweę krijgsknechten, ghebonden mit tweęen ketenen, end de wachters voor der dœre bewaerden den kærcker.

7

End zie, ^* eęn Enghel des Heęren stond daerby, end eęn licht scheen in der woonstede: end slough Petrum an de zijde, end weckte hem op, end zeyde: Sta snellick op. ⁺ End de ketens vielen hem van den handen.

* Act.5.c.19 end .16.e.26

+ B

8

De Enghel auer zeyde tot hem: Gord dy op, end ⁺ doe dyne schoens an. End hy dede alzo. End hy zegt tot hem: Hang dynen mantel omm, end volgh my na.

+ Gr. onderbind dyne zolen.

9

End hy ghingk hénwt, end volghde hem na: end wist niet dat het waerachtigh was dat dar gheschiedde door den Enghel, mer waande eęn ghezicht te zien.

10

Doe zy auer de eęrste end de andere wachte voorby ghegaen waren, quamen zy tot der ijzeren poorte die tot de stad leydt, welcke hen van zick zeluen gheopent ward. End hénwt ghegaen, ghinghen zy hén eęn steghe lang, end van stonden an scheydde de Enghel van hem.

11

End doe Petrus tot hem zeluen quam, zeyde hy: Nu weet ick waerachtlick, ^* dat de Heęr zynen Enghel wtghezonden, end my verlost heeft wt der hand Herodis, end van allem wachten des Iœdschen volcks.

* Dan.6.f.22

12

⁺Als hy auer dit bezinnde, ^* quam hy

+ C

* Act.5.e.23

[p. 224r]

voor het huyß Marie der moeder Ioannis, die mit toenamen Marcus hiet, daer ⁺ vele te hoop kommen waren, end baden.

+ anders. vele broeders. etc.

13

Als auer Petrus an der poorten dœre klopte, ghingk hæruoor eęn dienstmaeghd te luysteren, mit name Rhode.

14

End als zy Petri stemm bekende, dede zy de poorte niet open van blijschap, auer liep hénin, end boodschapte, Petrus stond voor der poorte.

15

Zy auer zeyden tot hœr: Du bist ontzinnigh. Auer zy bestond daerop dat het alzo ware. Zy auer zeyden: Het is zijn Enghel.

16

End Petrus volhærde in’t kloppen. Doe zy auer opdeden, zaghen zy hem, end entzettden zick.

17

Hy auer wenckte hen mit der hand te zwijghen, end vertelde hen, hoe hem de Heęr hadde wt der gheuangnisse gheleydt, end zeyde: Boodschappet dit Iacobo end den broederen. End hy ghingk hénwt, end reyßde hén an eęn ander plaetß.

18

Doe het auer dagh ward, was’er eęn beroerte die niet kleyn was onder den krijgsknechten, ⁺ hoe het mit Petro toeghegaen ware.

+ D

19

Herodes auer doe hy na hem vraeghde, end niet vand, onderuraeghde hy de wachters, end beual dat men ze hénwegh voerde. End reyßde hénaf van Iudéa na Cesarien, end had daer zynen wandel.

20

Herodes auer was des ghemoeds

[p. 224v]

krijgh te voeren teghen die van Tyro end Sidon: zy auer quamen eęnmoedighlick tot hem, end ouerreedden des kœnings kamerlingk Blastum, end begærden vrede, daerom dat hœr land ghespijßt ward van des kœnings [lande].

21

Auer op eęnen bestemmden dagh ^* bekleędde zick Herodes mit eęnem kœningklicken kleęde, end zettde zick op den richtstoel, end dede eęn rede tot hen.

* Eccle.11.a.4

22

Het volck auer riep toe: Een stemm Godes end niet eęns menschen.

23

Uan stonden an auer slough hem eęn Enghel des Heęren, daerom dat hy niet Gode de eęr gaf: ^* end wormmaaß gheworden, gaf hy den gheęst op.

* 2.Mach.9.b.9

24

^* Het word Godes auer wieß end vermeęrede zick.

* Esa.55.c.11

25

^* Barnabas auer end Saulus, doe zy de bediening vollendt hadden, keęrden weder ⁺ van Hierusalem, end namen oock mede Ioannem, die dar toeghenaemt ward ^* Marcus.

* Act.11.d.30

+ anders. van Hierusalem na Antiochien,

* Act.13.a.5