Het Nieuvve Testament, dat is, Het nieuwe Verbond onzes Heeren Iesu Christi, Na der Grieckscher waerheyt in Nederlandsche sprake grondlick end trauwlick ouerghezett

Cap xi.

1

HEt quam auer voor de Apostels end de broeders die in dem Iœdschen lande waren, dat oock de Heydens hadden het word Godes anghenomen.

2

End doe Petrus hénop ghegaen was na Hierusalem, zo twistighden teghen hem die wt der Besnijdenisse waren,

3

End zeyden: ^* Du bist inghegaen tot mannen die eęn voorhuyd hebben end hebst mit hen gheéten.

* Exod.23.g.32 end .34.b.15 Deut.7.a.2 Ioan.18.e.28

4

Petrus auer begann end leyde hen [den ganschen handel] ordentlick wt, end zeyde:

5

^* Ick was in der stad Ioppe im ghebede, end zagh in eęner entzettinghe des ghemoeds eęn ghezicht, [naemlick] eęn vat hæraf dalen, als eęn groot lijnen laken, mit vier houcken hæraf ghelaten wt dem hemel, end quam tot my toe:

* Act.10.b.9

6

Waerop doe ick staerlick zagh, ward ick ghewaar, end zagh vieruoetighe [dieren] der ærden, end wilde end kruypende dieren end gheuoghelten des hemels.

7

End hoorde eęn stemm die tot my zeyde: Sta op Petre, slacht end eet.

8

⁺Ick auer zeyde: Gheęnßins Heęr: want dar is noyt iet ^* ghemeyns of onreyns in mynen mond hærin ghegaen.

+ B

* Leui.11.a.4 Deut.14.a.7

9

De stemm auer andwordde my andermael van dem hemel: Wat God gereynight

[p. 222r]

heeft, dat maeck du niet ghemeyn.

10

End dit gheschiedde drymael: end het ward alles weder hénop na den hemel ⁺ ghetoghen.

+ Gr. gheruckt

11

End zie, van stonden an stonden dry mannen voor dem huyze daer ick in was, wtghezonden van Cesarien tot my.

12

^* De Gheęst auer zeyde tot my dat ick mit hen reyzen zolde, zonder eęnighßinns te twijfelen. End mit my ghinghen oock deze zeß broeders, end wy ghinghen hén in des manns huyß.

* Act.10.c.19 end .15.b.7

13

End hy vertelde ons hoe hy ghezien had eęnen Enghel in zynem huyze staen, welcker tot hem ghezegt had: Schick mannen wt na Ioppen, end entbied Simon, toeghenaemt Petrus.

14

Welcker tot dy worden spreken zal, waerin du zaligh werdest, end dijn gansch huyß.

15

^* Doe ick auer begann te spreken, viel de heylighe Gheęst op ze, ghelijck als hy oock te voren op ons im beghinne [gheuallen] was.

* Act.2.a.4. end .19.a.6

16

Doe ward ick indachtigh des words des Heęren als hy ghezegt had: ^* Ioannes heeft wel mit water ghedoopt, ^‡ ghy auer zullet im heylighen Gheęst ghedoopt werden.

* Matt.3.c.11 Marc.1.a.6 Lu.3.d.16 Ioan 1.d.26 Act.1.a.5. end .2.a.4. end .19.a.4

‡ Esa.44.a.3 Ioel.2.g.28

17

^* Heeft nu God hen ghelijckmatighe gaue ghegheuen, ghelijck oock ons, na dem wy gheloofden in den Heęre Iesum Christum, wie was ick doch die God konde weeren?

* Act.15.b.9

18

Doe zy auer dit hoorden, zweghen zy still, end prezen God,

[p. 222v]

end zeyden: Zo heeft dan God oock den Heydenen ghemoedbetering ghegheuen ten leuen.

19

^* Die auer verstroeyt waren van der verdruckinghe die ouer Stephano gheschiedde, reyßden ommhær tot in Phenicien end Cypren end Antiochien, end spraken het word tot niemanden dan alleęnlick tot den Iœden.

* Act.8.a.1.4

20

Dar waren auer wt hen zommighe Cyprische end Cyrenésche mannen, welcke tot Antiochien hénin ghegaen, spraken tot den Grecisten, end euangelizeerden den Heęre Iesum.

21

^* End de hand des Heęren was mit hen: end eęn groot ghetall ward gheloouigh, end bekeęrde zick tot dem Heęre.

* Act.2.g.47 end .5.c.14

22

Uan dezen auer quam ⁺ de rede tot den ooren der Ghemeynte die te Hierusalem was: end zy schickten Barnabam wt, dat hy hén ghinghe tot in Antiochien.

+ Of, het gheruchte

23

Welcke doe hy anghekommen was end zagh de ghenade Godes, verurœghde zick, ^{+ *} end vermaende ze alle dat zy mit eęnem voornemen des herten dem Heęre volhærdighlick bybleuen.

+ D

* Acc.13.f.43 end .14.d.21

24

Want hy was eęn goed mann, end voll heylighen Gheęstes end gheloofs: end dar ward eęn groote schare dem Heęre toeghedaen.

25

^* Barnabas auer reyßde hén na Tarsen Saulum te zoucken.

* Act.9.e.27

26

End doe hy hem vand, bracht hy hem na Antiochien. Het gheschiedde auer dat zy eęn gansch iaar in der Ghemeynte

[p. 223r]

t’zamen quamen, end leęrden veel volcks, end dat zy de leęrionghers te Antiochien allereęrst Christenen noemden.

27

In den zeluen daghen auer quamen Propheten van Hierusalem ouer, tot Antiochien.

28

End eęn wt hen mit name ^* Agabus stond op, end gaf te kennen door den Gheęst, dat dar eęn groote honghernood gheschiehen zolde ouer den ganschen ærdbodem: welcke oock gheschiedde onder dem Keyzer Claudio.

* Act.21.b.10

29

Auer onder den leęriongheren besloot eęn ieghelick, na dem hy vermocht, te zenden eęn handreycking den broederen die in Iudéa woonden.

30

Als zy dan oock deden, end zonden’t ouer tot den Olderlinghen door de handen Barnabe end Sauli.